VIII. De secorre cex qui ont esté déceu par male tricherie.

§ 1.

Li rois secort par ceste loi cex qui ont esté déceu par tricherie et par mellée, que li malicieux et li tricheor ne gaignent pas por lor malice, et que li simples n'i perdent. Les paroles le roi sunt teles : Ce que l'en fera par mal tricherie, quant nos auron oï la cause, sera rapelée1.

Estiene de Sancerre dit que tricherie male est itele quant l'en fet à aucuns conchiement por autrui décevoir, et quant l'en sent une chose et l'an fet autre.

J. B. dit que male tricherie est de fere conchiement, décevance, angin à autre décevoir ; por ce, fut dite male tricherie. Bone tricherie puet estre fete, cum aucuns fet contre son enemi ou contre larrons. J. B. dit : Se dan (dom) Tybert déçoit aucuns orfelin de qui il est tutor ; par son conchiement, il ne doit pas avoir aucion de tricherie contre Tybert ; mès de ban qu'il li rende sa chose. Et se le tutor n'a que rendre, lors doit-il avoir aucion de tricherie. Ci n'a nule aucion contre son aversaire qu'il n'a que paier2.

[p. 115] En toles les choses où cil qui n'a vingt-un an est conchiez, la chose est rapelable.

Se ta beste me fait domage par ta tricherie, je ai aucion contre toi de tant com le domage monte.

Johan de Biaumont dit que se aucuns deslie mon serf por l'en fere foïr, que je avoie lié, je ai aucion de tricherie contre toi, et J. dit que se tu le fes sanz miséricort, tu fais larrecin ; se tu le fais par miséricorde, il a contre toi aucion de fet3.

§ 2.

Uns patrons franchi son serf por ce qu'il remaindroit à lui servir, et cil par sa male tricherie ne le vost servir. L'en demende qu'en dit droit ? Et l'en dit que cil le puet remestre arière là où il le prist.

Se uns procurators fet par tricherie que mis aversères gaigne la querele qu'il demende contre moi, j'ai contre lui aucion de tricherie et contre l'aversaire aucion de demender4.

Se aucuns aferme que aucuns soit bien rendables, et il le dit en bone foi, et il fust povres, je n'ai pas contre lui aucion de tricherie ; mès s'il savoit que il fust povres et afermast qu'il fust riches et bien rendables, j'é (j'ai) aucion contre lui de tricherie, quant il loa fausement ce por moi décevoir.

Se aucuns aferme que aucuns héritage soit ou grant ou petit, et il ne soit pas, et aucuns l'achate : se il l'a veu, il n'a pas contre lui aucion de tricherie ; et s'il ne l'a veu, il se fie en celui ; il a contre li auction de tricherie5.

§ 3.

Se plusors font trecherie, et li uns rent por toz, tuit li autre sont délivré. Ceste aucion est contre l'air de tant comme il en est plus riches.

Cil a aucion de tricherie contre celui qui li presta poisqu'il savoit bien qu'il n'estoit pas bons.

Cil qui nea (vend), se li pois est trop granz, cil n'a point de tricherie. Cil qui achate, se li pois est trop petiz, ci a tricherie à celui qui vant, s'il le sot.

Se je me met au serement d'aucun, et il se parjure, ge n'ai pas action contre li de trecherie : la poine dou parjure sofist6.

[p. 116] Se mon légat fet entendre à l'ériter que la chose au mort vaille plus que li testement, et il ons croit par le tesmoing de celui sanz voir la chose, et la chose vaut meins, l'en a contre le loeur auction de tricherie.

J. dit que li hers n'est pas tant tenuz por le forfet com por la cause ; quar il n'est pas tenuz au forfet. Se aucuns efface le testament qui est escriz, li oir et cil sor qui il ont lessié, auront sor li aucion de tricherie7.

Se li marcheanz qui vent sa chose aferme que ele soit bone et ele soit mauvèse, et l'en ne se fie pas an lui, l'en n'a pas contre lui aucion de tricherie.

L'en n'a pas aucion de tricherie contre non aagé ; mès il a auction contre autre.

§ 4.

Uns hons si dit à un autre qu'il est déceuz par sa tricherie an ce qu'il se fioit en lui d'un arpent qu'il acheta qu'il n'avoit pas veu, et li fist entendant qu'il estoit de fromentes, et il estoit de roiges, don la chose vaut moins ; et l'ofre à prover par soi et par garanz qui est prez à fere champ et batalle. Et li autres fet encontre tel ni et tel deffense com il doit, l'en demende qu'en dit droit ? Et l'en respont que ci a gage.

Entent que la tricherie solement ne fet pas le gage, mès le chatel ; et si n'i a chatel, il n'i a point de gage fors serement.