X. Por quele cause cil qui sont greignor sunt restabli a lor choses.

§ 1.

Nus ne porra nier que cil bans ne soit droiturées : quar li droiz est recovrez au tans que li graignor estoit en l'afere de la commune, ou en autre afere don il ne se pot délivrer. Les paroles de ce ban sunt teles : Se l'en prant aucune chose des biens à celui qui n'est pas ou païs, sanz male tricherie, s'il est hors dou païs por commun, ou s'il est en prison don il ne se puisse issir, ou en servage, ou en gerre, ou s'il a apelé devant le roi, ou s'il estoit empêchiez qu'il ne poist riens demender, je le restablirai, se je voi que la cause soit droiturère1. Cil est bien hors par peor, qui a peor de mort ou péril de son cors ; et ce doit estre seu par le juge. Cil qui sunt hors por le commun de la vile, sanz male tricherie, doivent estre restabli.

J'apele male tricherie quant cil ne vient pas et puet revenir, et remaint plus por son preu que por le preu dou commun ; il ne sera pas secoruz de ce que l'en fera contre lui en icel tens2. Nos n'antendons pas que cil soient secoruz qui sont por la commune, comme ballis, provoz, servanz, et sunt ou païs où l'an lor demande ; mès nos entendons cil qui sunt lointains. Ausit secort l'en à celui qui est en prison : l'en apele prison, prison de grant seignor, prisons de larrons, prison de anemis. Nos entendons que cil sont au liens qui sunt si liez qui ne puent venir avant sanz honte. Ausit secort l'en celx qui sont sers, et sert son seignor en bone foi qui venir ne li lesse3. L'en ne secort pas les pereceus ; mès celx qui sont destorbez par besoignes de lor choses ou de lor cors, ou par autre destrece de tens. L'en ne doit mie entendre que l'en restablisse les gregnors por gaigner, ne por fere domage à autrui4. L'en demende commant l'en puet prover ces choses devant dites ? Et l'en dit que li juges doit ce savoir par loiaus enquestes et par tesmoinz de bones gens.

Gaius. Omnibus.