IV. De tricherie.
§ 1.
Tricherie est une chose que l'en ne doit mie soutenir, ainz la doivent tuit prodomes estreper à lor pooir. Et action de tricherie dure dedens l'an : quar assez i a de tens à regarder se l'en li a fet tricherie ou non. Mès nos en metons hors menors, et desvez et autres genz qui n'ont point de demende par aucune droite cause : quar itex puent demender dedenz l'an que il vendront en lor bon estat.
§ 2.
Li rois deffent ci que l'en ne donast deners as juges, ne loers : car moult est périlleuse chose à juge de prendre d'autrui : car covoitise esmuet le juge, quant cil est devant lui por fere sa cause bone ; et por ce deffent li rois que ce ne fust pas fet, ne que ce ne fust pas pris1.
§ 3.
Se aucuns a aucun marchié qui soit à unchérissement, et aucuns vigne à lui, si li dit qu'il li enchercira son marchié, ou il li donra dou sien ; et s'il li done : l'en dit que tel don est fez par tricherie, et que tex deners sunt receuz par tricherie.
§ 4.
Quar tex don si est fez por enpirer la condiction dou marchié ; et bone foiz ne sufre pas que tex dons soit fez, ne que tex dons soit receuz. Et doit perdre ce qu'il a doné, et doit estre à celui por qui domage il fu fet ; et li autres doit estre puniz, se que l'on voit que raisons sera.
§ 5.
Se aucuns vent les choses à autrui, et il prent loer por la vente fere, l'en a action contre lui de trecherie : et tel trecherie vaut autant comme larrecins. Car aperte chose est, quant cil qui donne por la chose avoir, charge le marchié.
§ 6.
Se aucuns a convenant aucun qu'il li fera son affere, et il ne li fet pas, et sa chose périst : en ce a-il action contre lui de domages et de trecherie. Et l'en doit bien ce noter.
§ 7.
Qui done deners à aucun por fere aferes de vilenie, il ne le puet redemender por la vileine convenance qu'il est ; ne li autres ne's aura pas, ainz les aura li rois : ains les porra li rois punir, segont ce qu'il verra qu'il devra fere.
§ 8.
[p. 109] Se aucuns prent deners de moi por fere mes aferes contre toi, et prent deners de toi qu'il ne les face, l'en a action contre lui de aperte tricherie, et de traïson mellée ensemble2.
§ 9.
Ceste action est contre l'eir dedanz l'en (l'an) de tant que comme il en a eu : quar l'en establi que l'en ne puet demender à l'eir la chose que ses pères a eue par trecherie, tout soit li termes de la trecherie passez ; ausit comme l'en done à juge loier por dire faus, ou por doner mauvèse sentence, ou s'il a pris loier por vendre la chose le roi : et tout ce que (l'en) a doné, li hers rendra3.
§ 10.
Or demende l'en que (se) cil qui done est perçoners de la tricherie ? Et l'en dit que oïl, puisque cil qui le reçoit que par lui est mené la trecherie. Et en tel chose prescripcion ne cort pas contre le roi.
§ 11.
Or demende l'en dou tens qui passe, comment l'en le doit entendre, ou quant li deners sunt paez por la trecherie, ou quant la trecherie est fete ? Et l'en dit que li anz commence quant l'en set que la tricherie est fete, et quant li deners sont baillié.
§ 12.
Se uns procurators qui a plenier poer fet por moi aucune de ces choses, et ge l'estable, il vaut autant com se je l'avoie fet ; et se non, non ; ainz sera li procurators tenuz d'action de trecherie. Cil qui reçoit deners, et set que l'en ne les li doit pas, fet apertement tricherie4.
§ 13.
Se aucuns ballis prent deners d'aucuns non aagé por aucun crime que l'en li met sus, et n'est mie prové que il ait fet, et est aparissanz que li deners sont à tort pris : l'en a action contre le ballif de la chose r'avoir et de trecherie ; et li rois le doit punir segont ce que droit le requiert5.
§ 14.
Enprès demende l'en comment l'en puet home prover de tricherie ? Et l'en respont que, en quas dont la chose est si petite que batalle n'en puet nestre, ce doit aler par sairement, (et le choix de la preuve) est à celi à qui l'en demende. Si comme est trecherie de cinq sols, la prove n'est pas garanz. Et qui prove tricherie, si doit dire les moz por quoi batalle i soit.