École des chartes » ELEC » LI TIERS LIVRES » IX. De cex qui n'ont quinze anz.
[p. 116]

IX. De cex qui n'ont quinze anz.

§ 1.

Ciz establissement est por aider à celx qui n'ont quinze anz. Li rois vit nature et reson en ce ban, por quoi il prist le ban de celx qui n'ont pas san de lor biens governer : car comme li consauz de tel aage apartienent au roi, li rois le provet (promet aide) contre le conchiement que l'en lor fet.

Li rois dit : Ce que en sera fet à menor de seize anz, je saie ce qui fera. Il apert que li rois promest aide à celx qui n'ont seize anz : quar enprès seize anz, il sont en aage de vigor, et ancor li valet sont guoverné en tel estat procurators, ne ne puent estre seignors de lor choses, tot [p. 117] sache-il mener ses biens, et jusque il ait tel aage ; et nos entendons ce de celx qui n'ont ne père ne mère1.

G. dit que se aucuns fet marchié ou enfant qui n'a que douze anz, et la dete i veigne au tens qu'il a seize anz, l'en demende se l'en doit regarder le commeincement ou la fin ? Et l'an dit que nos devons avoir regart ou commencement.

Se aucuns vient aagé et il tiegne à fet ce que il a fet quant il n'iert de aage, il ne puet apeler restablissement de rechief2. L'en dit que l'en doit regarder la chose où il demende restablissement, se il i est conchiez, et (s') il fet ce que sages hons fet, il ne doit pas estre restabliz.

Je cuic que l'en doit secorre celx qui sont plédoiez et dedanz tel aage, et désessi de muebles et de héritages, et de marchiez ou d'autres obligacions an ce où il est déceuz.

G. dit que l'en doit secore celx qui sont dedenz tel aage, non pas solement quant il perdent riens de lor éritages ; mès an totes poines et en toz despans3. Ce qu'an l'an fera o celui qui est non aagé sera nul. Nos devons entendre, s'il fet en queque menière, s'il achète aucune chose, s'il vant, s'il entre en plévine, si prant plaige, se l'en li rent, s'il antre en compaignie et se cil qui desvoient son père li rendoit se il perdoit. An cel choses il sont restabli : car se il tient en plet nului por acheson d'aucune chose, il ne serient pas oï se n'ière por l'autorité de lor tutors ou por le commendement dou juge. Et se aucuns menor est déceuz sanz male tricherie, par l'autorité son tutor, toutevois li doit l'en secorre ; et por ce défant l'en que nus n'achate riens de celui à l'orfelin, tot le face l'en en bone foi.

Item. Menor ne doit pas estre restabliz an gaaing qui vient d'aventure quant il est fez por le tutor en bone foi, et il n'i a apert barat, comme en gaaigner terres, ou en fere vignes à moitié, en achater vergiers, ou en loier ovriers4.

J. dit que de ce ne dote l'en pas que se li menors ne rant ce que il doit de tele chose, où il ne puet demender restablissement, l'en a bone aucion contre lui ; et se menor enpruente deniers et en achate tenemanz [p. 118] plus que ele ne vaut, aura l'en demende contre lui ? Et l'en dit que oïl, de tant quant il sera plus riches.

Se cil qui est non croit deners à celui qui est moins de âge, cil a menor cause qui l'argent balle que celui qui le reçoit5.

§ 2.

J. dit que menor ne doit pas estre quite de forfet, s'il le fet, se li juges n'a pitié de lui por son aage.

Se li menors vit en avotire et il soit coneu, nul pardon ne li ait, ou s'il vit de larrecin ou s'il vit de ce que feme gaigne à f....., ou s'il prent loer por sofrir f....., ou por murtre, ou por traïson, ou por tex vilains fez : ne acusement (excuse) ne li a mestier, quar il fet contre les commendemanz de la loi, et por noiant apele l'en la loi en aide qui fet contre la loi6.

§ 3.

Uns menor qui n'estoit pas de âge vendi un héritage, par si que se il le poet raimbre quant il seroit d'aage, il auroit dedenz le demi-an. Il fu de âge, enprès il mori, et achei la chose à celui à cui ele devoit escheer, à un qui n'estoit pas de âge, et ne rendi pas les deners au terme.

Or demende l'en se il sera restabliz ? Et l'an dit que non, com li ancessor se consenti au marchié que il avoit fet non de âge quant il fu de âge, ne li autre n'i avoit que le droit que cil i avoit.

G. dit que tot ce que li menor font n'est pas quassé ; mès ce solement que il font ou par lor folie ou par lor négligence, ou s'il perdirent ce qu'il avoient, en ce qu'il porrent gaagner, ou si le lièrent à celui fès qu'il ne porent porter7.

§ 4.

Se menor qui a esté non âgé et sera venuz à âge, s'il ne demende dedanz l'an et dedanz le jor restablissemanz, il ne sera pas oïz dès iqui en avant.

En rétablissement de menor n'a point de gage ; mès enqueste savoir s'il est droiz ou non.

L'an ne doit pas respondre à menor an cause où il a gage de batalle devant qu'il ait vingt-un an, ne an chose de fié, ne à feme tant com ele soit en garde, s'ele n'est marié et ele le face por la volenté son seignor ; et s'ele est hors de garde et ele n'ait point de seignor, l'an ne li doit respondre devant onze anz.


1 Dig., lib. 4, tit. 4, frag. 1 : de Minoribus viginti quinque annis.
2 Ibid., tit. 4, frag. 3, § 1.
3 Ibid., frag. 6.
4 Ibid., frag. 7, pr., § 1, 2, 8.
5 Dig., lib. 4, tit. 4, frag. 34.
6 Ibid., frag. 9, § 2, 3.
7 Ibid., frag. 44.