V. De restablissemenz.
§ 1.
Ci titres si est mout profitables à mout de genz : quar en mout de menières avoit l'en domage, en ce que l'en n'estoit restabliz des choses don aucuns s'estoit mis en seisine, sanz droit qu'il il eust. Et l'en secort en meintes menières à cels qui sont déceu, ou par peor, ou par conchiemant, ou por ce qu'il n'estoient pas présent, ou por ce que lor estat fust muez, ou par autre droite error1.
§ 2.
L'en doit sofrir toz ratablissement, quant l'en a oï por quoi et veu se c'est voirs ; et doit l'en fere droit. L'en ne doit pas celui restablir qui demende une petite chose, se il fet tort de gregnor. Ne cil n'est pas hors de la chose, à cui ballis a dit qu'il la li rendra.
§ 3.
Enfanz ne sunt pas restabli solement, (mès) desvé et muz et sorz, et cil meismes qui sunt hors dou païs por le roi ou por le commun, et cil qui est outre-mer, qui muert seisiz de la chose en veraie seisine2.
§ 4.
Nos apelons veraie sésine, quant aucuns remaint sési an et jor comme sires, et par jostice, à le veue et à la seue de celui qui demender puet, et ne veaut demender, et se test.
§ 5.
Et se aucuns est forbeniz dou païs, le nunbre dou tens, et quant il ce vient (revient), si se trove désésiz, sera-il restabliz arière en sa sésine ? Et l'en dit que nenil, s'il a esté désésiz par jugement. Quar se il a esté désésiz par défaut, ç'a esté en ses copes, com il doie metre procurator an ses choses défendre ; et se il a esté désésiz selon la deffense de son procurator, il ne doit pas estre resésiz, por quoi li procurators a menée la procuracion que prodome doit mener. Qui pert sésine an tel quas, anprès l'an et jor, il puet plèdier de la seignorie, et de la sésine non.
§ 6.
Et se aucuns est en guerre de ses enemis, qu'il ne puisse venir son droit deffendre, ou sorpris de guerre, sera-il restabliz ? Et l'en respont que, se il est en guerre que droiz doie sofrir, ou pris por son droit qu'il défant, il sera restabliz ; se non, non.
§ 7.
[p. 111] Se li pères muert, li enfes a tel droit ès choses, an estre restabliz, com li pères eust. Se cil qui n'est pas de âge est déceuz an son fet, ou à fet son tutor, l'en le doit restablir arières, aagé ou il non aagé : fors en ce s'il fet ce que prodome et sage doit fere, et son tutor ausit, il ne sera mie an ce restabliz.
§ 8.
Johan de Beaumont manda à un provost qui estoit metres, de aidier à celui qui avoit perdue sa chose, qu'il n'estoit pas présanz, et li manda tex paroles : Totevoies se l'en ne doit riens muer de restablissemanz, l'an doit aidier là où l'en voit que mestiers en est à fere. Et se aucuns estoit semons et ne respondi pas, et por ce dona l'en contre lui sentence ; enprès il vint à toi, quant tu tenoies tes plez, et requist à estre restabliz de la sentence à fesant droit, et com cil qui onques n'avoit esté semons : et quant il fust issint, il n'i ot point de copes, si commendons qu'il soit restabliz3.
§ 9.
Ne cil secors n'est pas solement en tel menière, mès en autres : car l'en secort à tex qui sunt déceuz sanz lor copes. Maimemant se lor aversères lor fet boidie, il doivent estre en ce restabli que égauté lor querra : car l'en doit plus tost leissier plez max renomez, que tenir les.
§ 10.
Tel différence est entre celx qui n'ont vingt-un an, et cels qui sont hors dou païs por aus, et entre celx qui sunt hors por le commun : li menor sunt deffendu par tutors ou procurators ; cil qui sunt por aus hors, ou por lor cope, sunt deffendu par procurators ; cil qui sunt hors por le commun profit doivent un poi plus estre déporté4.
§ 11.
Mès se aucuns est forbeniz de son païz, et enprès vienge frans de la chose que l'en li met sus, l'en le doit restablir : car il n'i doit mie avoir domage en tort fet de juge. Et tex doivent estre restabliz.
