XIII. De noteniers, de taverniers et hosteliers, commant il sunt tenu des choses qu'il reçoivent1.

§ 1.

Ulpianus. Ait pretor. Li prévoz dit : Tavernier, nautonier, ostelier, s'il ne rendent loiaument ce que l'en lor balle, ge donroi jugement contre aus.

Ci a mout grant preu : car il convient aucune foiz croire soi à aus baller lor ses choses, ne ne cuit nus que ce soit establi durement contre aus : car il est en aus de recevoir autrui choses ou de lessier, et se ce n'estoit establi, il auroient matire d'estre compainz à larrons ; ne ancor ne s'en gardent-il pas de fere tricheries.

Or doit l'en voir qui sunt cil qui sunt tenu ; et li prévoz dit que li notenier. Nos devon entendre notenier, cil qui moine nef, jà sé ce qui l'an apele noteniers toz cels qui sunt en nés ; mès li prévoz antant solement dou mestre de la nef : car il ne doit pas, ce dit Johanz de Beaumont, estre obligié par le guoverneor de la nef, ou par un des autres ; mès por soi, ou por les metres, jà sé ce qu'il est commendé baller la chose à aucun des noteniers ; et lors sanz dote doit-il estre obligié. Et si a uns qui sunt mis an nés por garder les, et se aucuns reçoit riens de tex, je cuit que l'en doit doner aucion contre le mestre, porce qu'il commendent, qu'il reçoivent la chose, tot face celi notoniers, ou li metres ; et se l'en ne set li quex ot la chose, li notoners est tenuz de la recete. [p. 121] Labeo dit qu'il doit issit estre establi des metres des nés, et nos tenons ce droit.

Nos apelons taverners et osteliers qui moinent taverne ou otelerie, ou lor serjanz. Et se aucun use de mein métier, si comme pateor, triboleor et itel menestères, il ne sont pas de ce tenu.

Et ce que li prévoz dit que ce qui recevront soit sauf, c'est à entendre de quanquez il recevront. Et Johan dit que ce apartient à cest ban, se l'en lor balle robes, unes et autres choses, don nos avon chescun jor besoing. Et Johens dit que poi se monte, se nos ballons à garder nos choses, ou au noteniers ou au mestre, que il nos convient qu'il soient sauves, ausi bien comme à cex à qui il sunt. Et se je praing merz ou gage por deners de notenerie, li noteners sera plus tenuz à moi que au deteur ; s'il les a receuz avant il convient qu'il soient sauves, se les choses sont mises en la nef, ou seignées ; ou s'el ne sont seignées, por ce solement qui sont mises an la nef, sont-il receues ? Et je cuit qu'il doit de tot recevoir la garde. Le fet au noteniers ne li apartient solement que des avainturiers.

§ 2.

Gaius. Sicut. Ausi comme li taverniers est tenuz de cex qui vunt lor chemin.

§ 3.

Ulpianus. Et ita. Et issit escrit Johan de Beaumont dou fez aveinturiers, et ausi en dit com se les choses n'estoient encore en la nef receues, et issi sont perdues ou rivage, et il les ont prises en garde, le péril en est lor.

Li prévoz dit : S'il ne les rendent, je donrai jugemant contre aus. De ce ban ist demende de fet ; mès l'en doit voir s'il est nécessere ; car de ceste cause puet l'en avoir aucion de cité, s'il i a loer de loage, et se tote la nef est loée, et cil qui la loa puet plédoier de loage et des choses qui li fallent ; et se li noteniers les prist à porter, il est tenu de loage ; s'il les prist en garde, Johan dit que l'en a contre lui auction de chose ballié à garder. Or s'émervoille Johan porquoi auction de prévost est otroïe comme ele soit de cité, se n'est por ce que li prévoz i met poine por chastier tel rebauderie, et por ce que cope est an loage et tricherie en chose ballie. Et en cest ban est tenuz cil qui reçut la chose, tot soit la chose perdue sanz sa cope, ou s'il i a domage ou par avanture ou [p. 122] por nef froissie, ou par galies, Johan dit que c'est droit que li metres ait exception.

Ausit doit l'en dire des hosteliers et de taverne, s'il i a juerie : ausit en sont-il tenu. Et s'il recevent autrui chose hors lor office, il ne sont pas tenu. Se fiz ou serf reçoit autrui chose par la volenté au père, au seignor, chascun d'aux puet estre trez en plet por le tot. Et se serf amble ou fet domage, aucion de forfet n'aura pas leu ; mès il sera tret en plet par ice ban, parce qu'il a la chose reçue. Et s'il le fet sanz la volenté au seignor ou au père, l'en aura aucion contre lui de son chetel ; et ceste aucion si est por la chose porchacier, comme dit Pomponius, et por ce est-ele donée à toz jorz contre lo er.

Au derrenier, convient voir se l'an puet avoir aucion deus, une de prévost, autre de larrecin, an nom d'une meisme chose. Johanz en dote ; mès miauz vaut que cil qui balle la chose, se l'an ne la li rent, s'an tiegne apoié de l'ofice dou juge, ou de barre de tricherie.

§ 4.

Gaïus (Paulus). Sed et ipsi. Au taverniers meismes aviant aucion de larrecin, aucun péril la chose est perdue, s'il meismes ne l'an emblée, et se l'an la li emble anprès ; ou se l'an la li emble, cil noteniers n'a par avainture de quoi paier.

Se noteniers, hosteliers, herbergeors, taverniers, reçoivent autrui choses, il en sont tenu inelement.

Johan dit que ce ban apartient à celes choses qui sont mises an la nef, anprès les marchandies et anprès les aloés, tot n'en doie l'en rien de voiture, si comme de robe et de despanse de chascuns jor : car totes ces choses sunt de loage des autres choses.

§ 5.

Gaïus, Noute. Notenier et tavernier et ostelier prenent loer, non pas por garder ; mès por porter la voiture et li voituriers. Et li taverniers qui sofre les joeors, li establer qui sofre les jumanz estre establées en l'estable, et si est-il tenuz de garder les : car li folon et li chartrener n'ot pas solement por la garde que por le mester, et totevoies sont-il tenu de la garder por le nom de loage.

Rien que nos avon dit de larecin, ausit doit l'en antendre de domage : quar l'en ne doit pas doter que cil qui prist en main à fere sauf, ne soit tenu de domage et de larrecin.

§ 6.

[p. 123] Paulus. Licet. Tot sois-tu passé par noiant ou an antrer en taverne por noiant, l'en ne t'aniera pas aucions en fet, se l'en t'a fet honte ou domage. Se tu as ton serf an taverne ou en nef, et il me fet domage ou larrecin, tot aie-je aucion de larrecin et de honte et de domage et d'injure, j'é (j'ai) ici contre aucion de fet, an nom de mon serf. Ausit est s'il est commun, et tu n'ies tenu an son nom ou de partir ou de compagnie, o (ou) se tu achatas sa partie o il (ou le) tot, je sui dou loage obligié à toi. Et se aucun fet à celui domage qui est en la nef ou à la taverne, qui fet li prévoz ? Priser, s'il ne cuide pas en tel nom bone aucion.

Le tavernier est tenu de aucion de fet por cels qui sont antré an taverne por i habiter ; et cestes choses n'apartienent pas à celui qui i entre demanois, ausi comme cil qui vet sa voie.

Nos poon user d'aucion de larrecin et de honte contre noteniers, se nos menon le plet dan Tibert ; mès nos ne devon tenir amne. Et se nos plédeon contre le metre, nos li devon fere noz demendes, tot ait li metres aucion contre aus de loage. Et se le mestres est quites de cele aucion et emprès plédoie l'en contre le notenier, il aura barre qu'il ne soit tote jor travaillié por un forfet. Et se l'an plédoie dou forfet, ce fu home, et anprès plédiei l'en d'aucion de fet, il aura barre.

§ 7.

Ulpianus. Debet. Li metres doit rendre reson de toz ses noteniers, soient-il franc ou serf, et par droit, com il lessa (les a) à soi pris à son péril, ou à son preu ; mès il e rant (il le rant) ausi com se le domage eist esté fet an la nef : car s'il est fez dehors, il n'i est pas tenuz. Et s'il dit avant que chascun gart sa chose, ne s'il i ont domage qu'il n'en rendront rien, et il s'i acordent, il n'i est pas tenuz.

Ceste aucion de fet est (du double), se li noteniers s'entre-font domage, li metres n'en a que fere. Mès se aucun est noteniers et marcheant, bien se gart : car l'aucion est contre lui, et li autre notenier sont tenu ausi, si sont notenier qui ne randront rien de portage.

Se li sers et li notenier font domage, tot ne soit-il serf notenier, est que l'an ait aucion contre le mestre ; et li mestres est tenuz de sa cope an ceste aucion, por ce qu'il li mist en sa nef tex menateres. Et s'il meurt, il n'en sera jà relevez ; mès il est tenuz sanz plus de forfet de [p. 124] ses sers : quar quant il met estranges en sa nef, il doit voier de quel foiz, de quel bunté il sont. Se li sien li forfont, pardoner li doit-on, s'il met tex et quex à sa nef garder. Se pluisors moinent la nef, chascun est amplédiez par sa partie. Ces juigemenz, tot soient-il de provosté, il durent ; mès ce n'est pas contre le ier. Et por ce, se le serf fust en la nef et morit, l'en ne donra pas aucion de chetel au sers contre le segnor, ne dedanz l'an. Mès se li sers ou li fiz moine la nef ou la taverne ou la herbergeresse, je cuic que cete aucion est contre aus, chascun por le tot, por ce qu'il reçurent toutes les choses qu'il i avoient, chascun por le tot.

§ 8.

D'osteliers, de taverniers, de notonners, cil qui prandront en garde, s'il ne le rendent loïaument, B. dit : l'en donra jugement contre aus, et de ce ne puet nestre batalle ; mès prove par léaus tesmoinz.