VII. De ce que l'en fet par force ou par cautele de peor.

§ 1.

Li rois dit : Je n'aurai pas estable ce que l'en fera par force, ou par cause de poor : car issint dissoit l'an ancienement que force ere quant l'en fesoit contre la volenté à celi contre qui l'en la fesoit. Peor est cause de péril, qui est à venir et tranblement de priesse. Et por ce ne fet l'en pas mencion de force que toute n'at pas fete sanz force, ne force sanz peor. Force est efforz de genz don l'en ne puet deffendre1. Et tel cause contient paor et force ; et se aucuns fet aucune [p. 114] chose por force ou por paor, qu'il doie estre en hardi home, li rois commende qu'il soit restabliz en sa chose. Nos entendons force cruel, ce que l'en fet encontre bones mors ; non pas tiel force comme li metre font, li ballif, li provoz, por lor droit ou por lor seignorie. Nos apelons force ce que autres fet ou que li metres fet sanz droit ou sanz seignorie2. Nos apelons force paor de mort. Quant la force de mes braz vaint la peor de autrui, je cuit que ausint i puet l'en metre peor de cuvertage, issit com aucuns fet aucuns cuvert où il ostroiast ce que il daist.

L'an ne doit mie entendre chascune chose por peor ; mès peor est de greignor mal que l'en n'a.

Nos dison que peor de coart home n'apartient pas à ce ban ; mès peor de hardi home3.