II. De procurators1.
§ 1.
Ce fut establi por bones mors, que li menor, que li muat, que li orp, que li desvé, les fames prestes de anfanter, cil qui sunt malade de maladie durable, cil qui sont en marcheandise et en pélerinage, et cil qui sunt por le commun, et cil qui sunt pris de gerre, et celx qui sunt en garde par hayne, puent metre procurator por aus, si com vos porret ci-près oïr.
§ 2.
Se menor demande deniers, éritages, estre rétabliz en la sésine son père, injures de laidissemanz : en ce il puet metre procurator por soi, et demender. Et si l'en li demende chose don sis pères mori saisis, an ce il metra procurator en ce que la cause désire : c'est à savoir à alégier sanz plus que il ne respondra jusque li enfes soit d'aage. Et si li menors bat et fiert un home, ou tue, li juges le contraindra à metre procurator, et respondra, et amendra, s'il l'a forfet. Et li procurators sera mis par l'autorité au juge.
§ 3.
Mais orp, sort, cil qui sunt malade de maladie durable, puent metre procurator en toutes causes.
§ 4.
Feme qui est preste d'enfanter n'et pas contrainte à metre procurator, ains doit l'en atendre jusqu'el ait enfanté.
§ 5.
Home ou feme qui sont en santé ne puent metre procurator en cause d'éritage, ne l'en ne li recevroit mie ; mès l'ome por sa feme. Mès en cause de moeble puet l'en metre procurator.
§ 6.
Evesques, arcevesques, contes, barons, toutes autres menières de genz, puent metre procurator en la forme devant dite, ne plus ne meius.
§ 7.
Et se aucuns a perdue sa cause, et il nie que le procurator ne soit pas por li, recort de bones genz corra sor ce, et sera estable sor le recort, ne en ce n'afiert pas batalle.
§ 8.
Procurator doit doner plége, qui feront atable ce que l'en fet por celi, si en viaut hon aver bones letres qui seil autenticié ; et sera estable ce que l'en fera por celi à qui l'en demende.
§ 9.
[p. 106] L'an ne puet metre procurator en cause de crime, qui toche à dampnement de cors.
