III. De besoignes fetes par autrui.
§ 1.
Ci bans profite mout à celx qui ne sont présens, qu'il ne perdent la sésine de lor choses par défaute d'aide.
§ 2.
Se aucuns fet l'afere à aucun qui n'estoit pas présens, et qui n'an set riens, quanz l'en fet à son preu, et despent ou se oblige à autre, li doit estre randu. Et se l'en fet l'afere à un orfelin, ou à desvé, à son preu, l'en doit emplédier.
§ 3.
Mès l'en doit regarder qués aferes l'en doit fere, et de quex aferes l'en est tenuz, et l'en entent, si l'en i gaagne ; mès l'en n'est pas tenuz vers celui qui par sa volenté se mist à autrui besognes fere, dom il n'iere pas besoing1.
§ 4.
Et se ge cuide que les aferes que je faissoe fussent Johan, et il estoient Pierre, en est Pierres tenus à moi ? s'il i a gaagnié.
§ 5.
Et se ge préte à son procurator deniers à rembre ton gage, vers cui ai-ge aucion ? Et ge di que vers le segnor.
§ 6.
Et se aucuns fet son afere et le mien en une meisme chose, l'en entent qu'il le fet plus por soi que por moi ; et à ce doit l'en garder mesure, que chascuns en soit chargiez avenaument. Et se ge ne fas ces aferes por achoison de toi, et la faz por achoison de ton fiz, ou de ton serf, g'é (j'ai) auction contre toi2.
§ 7.
Se dui compagnon ont une meson qui vuelent fondre, et la puet bien retenir o point (per) de coût, et ge le vuelle fere, et li un des compagnons qui est hors dou païs n'an siet rien et li autre me deffent que je n'i face riens, et ge retien la meison à mes coz : G'é (j'ai) aucion contre les deus ou contre l'un ? L'en dit que g'é aucion contre les deus. Car il apert bien qu'il vousist avoir domage por que se compeinz i eust domage : et bone foi ne suefre pas tex choses3.
§ 8.
Ausit se aucun a aucion contre moi de mes aferes qu'il a fez, [p. 107] ausit et ge ai aucion contre lui de mes aferes qu'il aura fez mauvèsement.
§ 9.
Mès tot face-il mes aferes mauvèsement, et ge lo ce qu'il a fet, ge no puis rapeler, se ge ne faz ce par son déçoivement.
§ 10.
J. dit : Icil ne fet mie aferes, qui emprent à fere choses don l'en (n') a mestier, ou qui grève celui qui ele est. Et dit encores, que cil qui fet les aferes en bone foi, et si comme il doit, tout ne l'en chie-il pas bien, si a-il aucion de fere (d'afere) fez4.
§ 11.
Comme dui frères fussent l'un d'aage et l'autre non aagé, et avoient communes tenures à vilages, li plus granz adefiece sans reson et sanz besoing en la tenure. Quant il partirent lor teneure, il demenda les despens qu'il i avoit fez an amender cele chose. Et li frères menor estoit jà d'aage, et responoit, que por ce qu'il avoit ce fet sanz besoing, qu'il n'en voloit riens paer. L'en demande que dit droit ? Et l'en respont, que por ce qu'il fist ces choses sanz besoing, qu'il n'i a nulle action contre lui5.
§ 12.
Se Felippe nourrist la fille sa seror par prière, il n'a nule action contre lui.
§ 13.
Li sergenz qui me siert emprunte deners por feres mes aferes : l'en dit qu'il a action contre moi, et non pas contre moi com sires, mès comme sergens qui me sert en bone foi6.
§ 14.
Se aucuns rent por autre qui riens n'en set, et soit contre la volenté à celui por cui l'en a rendu, cil est quites por cui l'en a rendu. Mès débonaireté, ne naturel reison ne suefre pas que cil n'en ait action contre celui por que il a rendu. Et raison s'acorde que nos poons bien fere l'afere à celui qui riens n'en siet, tot ne le vuele-il. Mès nos ne le poons empirer7.
§ 15.
Qui fet les aferes à aucuns à son preu, et il fet despens, il puet avoir contre lui action d'afere fez.
§ 16.
Cil qui furent fet franc ou testament au mort qui estoit lor sires, ne sont pas tenu de rendre reson por les aferes qu'il a fez au vivant au segnor8.
