École des chartes » ELEC » LI TIERS LIVRES » VI. De forbannissemanz.
[p. 111]

VI. De forbannissemanz1.

§ 1.

Ceste chose est por bien establie, et por punir celx qui meffont. Car se aucuns a fet aucuns meffet, et s'enfuie, por ce ne le doit l'en pas lessier en pez. Car qui les larroit en paiz ceste genz, les autres genz au [p. 112] roient matière de forfere. Si doit l'en garder segont reson comment l'en an doit ovrer de cez qui s'enfuient por lor forfet : or doit l'en garder por quel quas l'en doit home forbanir.

§ 2.

Se aucuns doit, et il ne puet, ou ait assez, et ne veaut paier, et s'anfuit, l'en demende se l'en le doit forbenir ? Et l'en dit que non, segont droit. Et segont la costume d'Orliens, s'il n'a riens et s'il ne puet paier, il aura terme de quarante jorz à soi paier ; et au terme, s'il ne se puet paier, il forjura la vile, jusque il se puisse paier. Et s'il a héritage, il aura licence de quarante jorz de vendre, et s'il n'a vendu dedanz ce, et ne se soit paiez, la jotice vendra, ou ele contraindra à vendre.

§ 3.

La costume de l'ostel le roi n'est pas tele, ainçois est tele que qui n'a riens, riens ne li chiet : einsint que cil qui ne se puet paier jurra sor sainz que au plus tôt que il porra et aura poir de soi aquitier, qu'il s'aquitera.

§ 4.

L'en demende por férir home, ou por laidir de paroles, ou fere li sanc ou en chaable, sanz mort et sanz mahaing, et il s'enfuit, se l'en le doit forbenir ? Et l'en dit que non.

§ 5.

Enprès demende l'en, si l'en li met sus murtre, ou larrecin, ou rat, ou omicide, ou membres tolu, ou roberie ; ou s'il a pris de l'autrui à force, ou s'il ne vient avant por doner trives, et il s'enfuit : savoir, se l'en le doit forbenir ? Et l'en dit oïl. Car tel chose apartient à dampnement de cors, et à perdre perdurable salu.

§ 6.

Or demende l'en, se aucuns fet guerre que droit (ne doive), ne que droit ne puisse sofrir, et ne veaut venir avant por fere droit et por avoir droit, se l'en le doit forbenir ? Et l'en dit que oïl, por le péril de la guerre, por le gastement des biens de sus terre, et por l'ocision de genz.

§ 7.

Nus ne doit estre forbaniz por son don, ne guerpir son païs.

§ 8.

Or est à savoir comment l'en doit forbenir, et en quel tens, et combien de tens l'en se doit sofrir enprès plainte, et enprès ce que l'en l'aura sopeceneus dou fet.

§ 9.

Premièrement, l'en le doit fere semondre en son ostel, et s'il n'a ostel, là où l'en quidera qui repere plus. Et si ne veaut, l'en doit prendre le suen, et doit estre en la main au juge. Et se aucuns l'acuise [p. 113] (l'excuse) de convenable asoine, recroira l'en la soe chose ? Et l'en dit que oïl à son ami, por qu'il preigne en main qu'il ne mefface, et qu'il vendra à jor por soffrir droit, autrement non. Et se li corpables vient por droit avoir, aura-il ce que l'en a pris dou suen quite, sanz recréance ? L'en dit que oïl, avant que il reponge.

Ci dit l'en que avant que home soit forbeniz, que l'en le doit fere semondre par trois jorz : chascuns d'uit jorz ; et si ne vient dedanz, l'en doit mander de ses amis prucheins et dire leur qu'il ait à un jor ; et se l'en la aveut (l'aqueut) cortoisement d'assoine, l'en le doit oïr.

L'en doit laissier passer qu'an aut anprès le tens de quarante jorz, et dedanz ce, s'il ne vient, l'en doit forbenir ; et s'il est pris enprès en la suite dou forbenissement, il est dampnez dou fet.

Ci dit l'en que se aucuns est forbeniz enprès quarante jorz, et il vient avant dedanz les trois pruchenes assisses, et fet des assoines ce qu'il doit et vuelle soffrir droit, l'en le recevra ; et se ne vient dedanz les trois assisses, il sera dampnez dou fet que l'en li metra sus.

Et se aucuns fet apertement fet devant le pueple, et se destorne, et par malice ne veaut venir avant, aura-il le terme de quarante jorz ne des trois assisses ? L'en dit qu'il n'aura plus terme qu'il ne soit forbeniz ; mès il aura le terme de la dampnacion, c'est à savoir de trois assisses : que l'en doit mout soffrir et atendre, avant que home soit livrez à mort ; car mout est granz chose à deffere ce que Dex a fet, et à fere ce qu'il ne veaut fere.


1 Ibid., tit. 5 : de Capite minutis.