194
Vente. — Catherine, veuve de Jacques Luillier, demeurant dans la paroisse Saint-Maclou, en son nom et celui de ses enfants dont elle a la garde, en présence de ses parents et amis, vend à Martin de Maubodet, notaire du Châtelet, et à Marion sa femme, une maison, ses dépendances, sept quartiers de vignes et un quartier de terre situés dans la paroisse Saint-Marceau, au prix de 50 saluts d’or qu’elle a reçus devant les témoins. Les acheteurs s’engagent à payer ce que Catherine doit cette année à Louis Margueriteau par contrat de métayage sur les vignes.
102 r°Et le samedi premier jour de juing mil IIIIc XXXVII. Jehan le Prestre, garde de la prevosté d’Orleans etc.
Katherine, vefve feux Jaques Luillier, en son vivant procureur et conseiller en court laye, demourant a present a Orleans en la parroisse Saint Maclou, en son nom et comme aiant la garde de ses enfans, laquelle en la presence et par le conseil, consentement, advis, deliberation et voulenté de maistre Raoul Chartin, licencié en lois, Charlot Luillier, Jehan Mignon, Thevenon de Montdidier, Jacquet Cormereau, Jehan Pasvé, Girart le Vassour et Marguerite sa femme, seur d’icelle Katherine, tous bourgeois d’Orleans, parens, affins et amis d’icelle Katherine 102 v° et des enffens dudit Jaques Luillier et d’elle, recongnut et confessa de sa bonne voulenté, sans contrainte que, pour le cler et evident prouffit d’elle et de sesdiz enfans, elle avoit et a vendu, cedé, quitté, transporté et du tout en tout delessé des maintenant a touz jours mes a Martin de Maubodet, notaire et examinateur dudit Chastellet et a Marion sa femme, a ce presens et aceptans pour eulx, leurs hoirs ou aians cause ou temps advenu, une petite maison sur seulles couverte d’esseaune, avec la court, jardin, puis et sept quartiers de vignes derriere, mal peulplee et encharnelee, que ladicte Katherine avoit de son propre heritaige assis ou cloux de la Prasle, devant la croix et en la parroisse Saint Marceau lez Orleans, ainsi que lesdiz heritaiges se comportent et poursuivent a present en toutes leurs appartenances et appendences quelxconques, tenant a l’eritaige des hoirs feux Gilet Buduniere d’une part et a l’eritaige Jehan Pavé et a la ruelle par laquelle l’en va d’icelle croix au pressouer de la Sigoigne d’autre, frappant d’un bout sur le chemin pavé d’Olivet et de l’autre bout sur les vignes dudit pressouer de ladicte Sigoigne. Item, ung quartier de terre assis oudit clox, lez le pré Regnault, tenant a Colin Mahy d’une part et a Jehan Parent et Robin Taibert d’autre, en la censive de maistre Girard Boilleve et de la fille feux Roulet Liberge, au feur de douze deniers parisis de cens par an pour tout, a droit de relevoisons du denier six deniers, et en la disme du prieur Saint Marceau, au feur de deux solz parisis l’arpent, francs et quittes au seurplus de toutes autres charges, reddevances et ypotheques quelxconques de tout le temps passé jusques a hui. Ceste vente faicte pour la somme de cinquante saluz d’or bons, loyaulx et marchans, comptez, paiez, nombrez et livrez en la presence dudit notaire par iceulx achatteurs a ladicte venderesse, qui de ce s’est tenue contant et en a quitté et quitte a touz jours iceulx achatteurs, leurs hoirs, aians cause et tous 103 r° autres a qui quittance en puet et doit appartenir. Et par ce faisant, ont promis et seront tenuz lesdiz achatteurs de paier et acquitter tout ce que ladicte venderesse doit a Loys Margueriteau a cause des mi deniers d’icelles vignes pour ceste annee presente, et aussi tenir et acomplir ledit contraut de mi deniers. Dessaisie, saisie etc. En la presence et au consentement des dessusdiz. Promettent etc. Non venir contre et garentir etc. Coustz etc. Renoncent etc.
Dans la marge gauche : f.
