258
Ferme. — Nandin Gillebert, vigneron, paroissien de Saint-Pryvé-Saint-Mesmin, prend à ferme pour 59 ans, de Jean Boileau, curé de l’église Saint-Hillaire d’Orléans, une masure avec une place situées au Portereau d’Orléans pour 7 l. t. par an. Le preneur s’engage à y construire une maison dans les quatre ans à venir.
120 v°Et le mardi XXVIIe jour d’aoust IIIIc XXXVII, Jehan le Prestre garde etc.
Nandin Gillebert, vigneron, parroissien Saint Privé lez Orleans, lequel recongnut et confessa que il a pris et prant a rente, ferme ou pension a la vie de lui et Jehannete sa femme, au seurvivent de chacun d’eulx et de celui d’eulx qui plus vivra et aprés le seurvivent de chacun d’eulx jusques au temps de cinquante neuf ans prouchains aprés ensuivans, de religieuse personne et honneste frere Jehan Boileaue, prestre prieur curé de l’eglise Saint Hillaire d’Orleans, qui lui baille, une masure et place seant au Portereau d’Orleans sur la grant rue pavee par ou l’en va d’Orleans a Saint Mesmin du cousté des vignes, ainsi que lesdictes masure et place se comportent et poursuivent, que ledit prieur disoit a lui appartenir a cause de sondit prioré, tenant d’une part a Pierre Paligeau et d’autre part a une autre masure que Guillot Bordeau tient a rente de Colin le Pelletier, en la censive de l’eglise Saint Pere Empont d’Orleans au feur de huit deniers parisis de cens deubz chacun an le jour de Saint Jehan Baptiste, que en sera tenu paier par chacun an ledit preneur du sien propre ou nom desdiz prieurs bailleur et de ses successeurs prieurs d’icelle eglise Saint Hillaire, sans riens rabatre de la rente cy dessoubz declairee. A tenir, usfruicter et exploicter icelle masure et place par lesdiz preneurs, par ses hoirs et aians cause de lui et en prandre et faire leur les usfruiz, prouffiz, revenues et emolumens leur durant lesdictes vies et temps de cinquante neuf ans pour dix solz parisis, monnoie courant a present, au pris de VII livres tournois marc d’argent et au dessoubz de rente, ferme ou pension paiables chacun an franchement et quittement durant lesdictes vies et temps audit prieur bailleur, a ses successeurs prieurs d’icelle eglise Saint Hillaire, ou au porteur de ces lettres, au terme et feste de Saint Jehan Baptiste, premier terme et paiement commençant a la Saint Jehan prouchaine venant. Et par ce faisant, a promis et sera tenu ledit preneur, ses hoirs et ayans cause de lui, de faire ou faire faire, dedens quatre ans prouchains venant, en ladicte masure et place une maison faicte et parfaicte, bonne et convenable, qui vaille ladicte rente de dix solz parisis et mieulx et, icelle maison faicte, la soustenir bien et convenablement. 121 r° Et en la fin desdictes vies et temps la lesser en bon estat et convenable. Et paier du sien propre toutes tailles d’eglise, de ville, de puis, de pavé, de turcies et autres subvencions quelxconques qui, pendant lesdictes vies et temps, pourront estre imposees et mises sur lesdictes masure et place, a quelque cause que ce soit, et en acquitter et garentir icellui prieur bailleur et ses successeurs prieurs de Saint Hillaire qui pour le temps a venir seront. Et aussi que a chacune mutacion qui se fera des tenans et possidans desdictes masure et place, soit par mort, transport ou autrement venant du cousté dudit preneur, de ses hoirs ou ayans cause, celui ou ceulx qui les vouldront ou devront tenir seront tenuz venir vers ledit prieur et eulx obligés oudit tenement au parfait du temps qui sera ad venir comme est ledit preneur par ces presentes dedens ung an aprés ladicte mutacion. Et se ilz en sont deffaillans ou aussi de paier ladicte rente par deux ans entresuivans, en ce cas ledit prieur et ses successeurs prieurs de Saint Hillaire, qui pour le temps ad venir seront, pourront prandre et exploicter lesdictes masure et place sans contredit aucun comme leurs et a eulx appartenant. Obligent de chacune partie. Renoncent etc. Coustz etc.
Dans la marge gauche :
ff.
et au-dessous :
Grossoyé par Pierre Noblet notaire
1
1. Cf. n° 327..
