École des chartes » ELEC » LI NEUVIESME LIVRES » I. De changier choses but à but et à torner, et quex choses l'en ne puet vendre.
[p. 173]

I. De changier choses but à but et à torner, et quex choses l'en ne puet vendre.

§ 1.

Premièrement, l'en dit ci1 que changes est manière de vente  ; car chose baillie por la chose que l'en change, et la chose receue, fet le change, por quoi ce soit fèt en bone foi. L'en puet chengier blé por blé, et vin por blé, blé por héritage, dras por vin, à tornés ou sanz tornés ; et vendre por deniers.

Or demende l'en se l'en puet changier le doere à la feme à mobles ? L'an dit que oïl, por quoi la feme s'i consente sanz force et senz paor ; et s'ele ne s'i consent, non. Et le puet l'en chengier à héritage ? Oïl, se c'est ses preuz ; mès la chose chengie sera asint comme son doere ; et mise en sauve main, qu'ele n'i puisse avoir domage enprès la mort son seignor2.

§ 2.

L'en puet bien eschangier son serf à autre, ou sa serve à son sergent, le terme que l'en l'aura, por qu'il soit à la volenté au sergent ; et se non, non. L'en ne puet changier sa feme à autre, ne son fil, ne sa fille, ne l'en ne puet changier cors de franc home3.

§ 3.

Le tutor ne puet changier les choses à l'orfelin, par quoi ses preuz n'i soit ; et se ses preuz n'i est, li changes ne vaut rien, tot l'ostroit celui qui sera en garde.

§ 4.

L'en ne puet changier les choses sa feme, se n'est par son otroi. L'en ne puet changer, ne vandre choses, à totes les foiz que mariage [p. 174] est fez, et héritages est joinz au mariage, ou conquis en mariage ; l'en ne le puet changier, ne vendre, se n'est par l'acort as deus parties, ne conquest, s'il i sont fet ; car si tost comme conquez est fez en mariage, il est tornez à héritage, issint que feme ne puet aler encontre le fet son seignor, tant comme il vive, tôt n'otroit-ele pas son fet ; mes ele le puet rapeler emprès sa mort, fors en mobles4. Mès hon puet fere, au vivant sa feme, de mobles vandre et changier à sa volenté, sanz ce qu'ele le puisse rapeler.

§ 5.

Se aucun apèle autre, par soi et par garanz, de vente ou de change, et ele soit niée, en tel chose n'a que sormise, se li autres fet encontre tel ni et tel deffanse comme il doit ; ci n'a que prove, et li chois est à celi qui l'en demende.


1 Decret. Greg. IX, lib. 3, tit. 19 : de Rerum permutatione ?
2 Ibid., chap, 2 ?
3 Ibid., chap. 3, 4 ?
4 Decret. Greg. IX, lib. 3, tit. 19, chap. 2 ?