IX. Comment l'en puet prendre gage des détors.

§ 1.

L'en dit que se aucuns est mi plège selon la costume, termes soit passez de la dete, je puis prendre dou sien jusques à la value de la dete. Et s'il nie la plévine, prandré-ge dou suen ? Oïl. Et s'il s'en pleint, ge recroiré jusque j'ae prove que il soit mis plège. Et quant ge l'auré prové, je seré resésiz ; et se ne la puis prover, ge l'amenderai la jotice. Et s'il n'a quant il seit mi plège, il cherra en l'amende.

Or demende l'en s'il puet prendre do détor sanz jotice ? Et l'en dit que non. Et se ge ai à aucun presté la moie chose, et le termes passe, [p. 176] je puis prandre la moie chose ; et dedanz lo terme, non ; et se aucun en a porté le mien, sanz mon congié, ou le m'a tolu, là où ge le sauré ; et se aucuns m'a emblé la moe chose, puis la ge prandre sanz congié ? L'en dit que non. Et se g'é aucune chose vendue à aucun, et il ne me rande les deners, et il en er seit (est saisi ?), puis-ge prandre la chose ? L'en dit que non, sanz jotice.

Je puis prandre à mon hoste, por le loier de meson, en la meson ; et hors non, sanz jotice.

§ 2.

Coment ataint l'en home que l'en dit qui a pris dou suen ? Et l'en dit que l'en le doit estaindre par soi et par garanz ; en toz le cas que il n'a larrecin, par soi tot seul ; et deit dire aissi : Tel home a pris dou mien tel chose, et en tel leu ; et s'il le viaut nier, jesui prez del prover et de l'amener avant, par moi et par bons garanz qui sevent ce de voir et d'oïr. Et li autres doit fere encontre tel deffense comme il doit, et l'en esgarde. Et li copables est loissanz de prendre la prove de li et de ses garanz, et de quenoistre que c'est voirs, ou d'escondire par gage de bataille.