École des chartes » ELEC » LI NEUVIESME LIVRES » XIII. De creance d’instrumant [rubr.]

XIII. De creance d’instrumant [rubr.]

  • Traduit du Dig., liv. 22, tit. 4 : de Fide instrumentorum et amissione eorum, et des trois premiers frag. du tit. 5, de testibus.

§ {22.4.1} Paulus. Instrumentor.

Tot ce doit estre entendu et pris en non d’estrumant dont la cause pot estre enseignie ; et par cez garenz et persones sont en leu d’estrumanz.

§ {22.4.2} Idem. Quicumque.

Quicunqu’est tret en plet de la borse l’enpereor ne doit pas estre tret en plet de juige, ne par essemple de aucunne escriture, mes par autentique ; issi se la foi do marchié pot estre mostree et escriture mauvese ne doit pas avoir force en plet.

§ {22.4.4} Gaius. In re.

En chose qui est obligee ne monte rien en quex paroles est ce fet, ausi comme il est en cez choses qui sont fetes por acordement. Et s’il est acordé sanz escriture que il soit en gage, et prové, le gage tendra don le convent fut fet. L’en fet de ce letres que l’en puisse plus [94vA] tost prover ce que a esté fet ; et sanz ce, vaut ce que a esté fet, s’il i a prove ; et noces fet l’en, tost n’i et il letres.

§ {22.4.5} Calistratus. Si.

Se une chose est fete sanz seel et sanz letres, il ne vaudra pas moins por ce que il n’i ot fet nules letres.

§ {22.4.6} Ulpianus. Si de tabulis.

Se l’en plede des tables do testamant et l’en ne set à cui eles deent estre baillies, nos metron toz jorz le veau au jeunre, et les plus haut au plus bas, le masle à la femele, le noble au franchi.

§ {22.5.1} Archadius. Testimoniorum.

Usage de tesmoinz est moult necessere ; et cex doit l’en apeler à ce que il sont creable. {1} Tesmoinz poent estre amené non pas solement en causes criminaus et encor en causes de peccune, si comme mestier est ; et il sont tel que il poent estre garant qui ne sont deffendu por nule loi. {2} Et ja soit ce que aucunnes lois devisent nombre de tesmoinz, les princes les ont emesurez ; et le juige que l’en enmene tant comme il cuiderent, si que moltitude de garanz ne seent amené à genz travaillier por poeir defrené.

§ {22.5.2} Modestinus. In testibus.

En tesmoinz devent estre requis la foi, la dignité, les mors, la hautece ; et por cez, garenz que chancelent contre la foi de lor garentie ne devent pas estre oïz.

§ {22.5.3} Calistratus. Testium.

Foi de garenz doit estre examineee. E por ce, en lor persone en cerchera l’en prisyer lor estat, s’il est de haut ou de bas, ou s’il est prodome ou s’il est ribaut, ou s’il est blasmé ou repris, ou riche ou povre qui meste tot por gaagnier, ou s’il est anemi à celi contre qui il porte garentie, ou s’il est ami à celi por qui il le porte. Car s’il n’a point de sopeçon en tesmoing por ce que il est prodome, et ne het celui ne n’i gaigne, le tesmoing est recevable. {1} Et por ce divus Adrianus ‹escrit à› Varo, legat en Sezile, itex paroles : « Cil qui juige pot trop bien savoir combien sont lëau li garent » ; et dit issi : « Tu poz savoir combien sont lëau li garent, et de quel digneté et de quel esme et comment il ont apris à parler, et s’il aportent parole devant por pensee, ou s’il respondent à tex demandes et do tens et de autres deffides ». ¶ {2} Et cil princes meinsme dit tex paroles à Valerien des garanz : ¶ « L’en ne pot avoir argument sofisent d’avoir esprové [94vB] des chascunnes choses, ne certaine meniere ne pot estre dite ; ausi comme il n’est pas toz jorz, issi n’en a l’en pas toz jorz letres de chascunne chose ne la verité. An aucun leu vent nombre de garenz, aillors dignité, aillors autorité, aillors renomee qui s’acorde à la chose don l’en quiert la foi. Et je te mande ce à une summe, ne l’en ne doit pas amener toz jorz une maniere de prove, ne une maniere de sentence, mes il te convient juiger segont que tu troveras en ton corage de ce que tu croiz ou de ce que tu cuides ». ¶ {3} Cil divus1 dist Julio visconte de Grece que il devoit croire as tesmoinz non pas à lor diz ; et itex furent les paroles que il li manda : « Alexander proposa devant moi mout de crimes ; et por ce que il ne provet ne n’amenoit garanz, ainz voloit user de tesmoinz qui n’ont pas leu devant moi, car je les soil enquerre, et mander au seignor de la province qui l’enqueist de la foi es garanz. Et s’il ne feist ce que l’en li manda, il fut envoiez en essil ». ¶ {4} Cil prince meisme dist à Gaio Seio itex paroles : ¶ « Autre est l’autorité des garanz qui sont presenz et autre de lor paroles qui solent estre recordees ; or te porpense dons, que, se tu veauz ce retenir, done lor depens ». ¶ {5} Il est contenu en la loi Julius que l’en ne poist pas dire tesmoing contre le reus, meesmement cil qui l’oste de sa meson et de son pere, ou cil qui sont .xiiii. anz, ou qui sont dampné en commun juigement, ou cil qui a sa feme lessie, ou cil qui est en prison ou qui se loe à combatre as bestes, ou cele qui gaegne à son cors, ou qui dist tesmoinz por loer. Et li un ne sont pas receu por lor reverence, li un por lor legereté, li un por la note de lor ribauderie. ¶ {6} L’en pot bien tesmoingz mener longue voie ; mes chevaler n’i devent pas estre apelé s’il sont en ost ou chevauchié, et ce dist divus. Et le enpereor distrent que il apartient à garenz amener et il apartient au juige de encerchier quel costume il i a en cele province où il juige ; car s’il est prové que garent augent de cité en cité por porter tesmoing, n’est pas dote que le juige n’i puisse apeler cez que il savra dont la cause a mestier.


1 divus] dimus dans le ms., cf. lat. divus Hadrianus