III. [87rA] En quel cas gages est fez sanz dire [rubr.]
- Traduit du Dig., liv. 20, tit. 2 : In quibus causis pignus vel hypotheca tacite contrahitur, excepté quelques mots à la fin.
§ {20.2.1} Papinianus. Senatus.
Le senat qui fust fet ou tens Marci li enpereor dit que gage qui est dont ou creancier qui preste deners por refere la meson apartendra au reanbeor qui les deners balla par le mandemant au seignor.
§ {20.2.2} Marcianus. Ponponius.
Ponponius dit que les choses que li oste avra aportees en la meson seront engagies non pas solement por les loages mes por ce s’il enpire la meson par sa colpe, et avra l’en contre lui aucion de loage.
§ {20.2.3} Ulpianus. Si orreum.
Se un grenier est aloez, ou un estage, ou une ere, Neracius dit que ce que est aporté en la meson est obligié sanz dire ; et c’est voir.
§ {20.2.7} Ponponius. In prediis.
Les fruiz qui nessent en teneures sanz dire sont en gagie au seignor dou chemp tot n’en face l’en mencion. ¶ {1} L’en doit veoir que totes celes choses qui sont aportees en la meson mes celes choses qui sont leenz à toz jorz sont en gage ; qui est plus grant chose.
§ {20.2.8} Paulus. Cum.
Quant le detor a deners pretez par amor, le creancier pot retenir des fruiz de la chose engagie segont la dete. L’en puet engagier ce que l’en a en gagie.
