IV. De gage prandre sanz jostice.

§ 1.

Un home si a loée sa meson à un autre ; li termes passe qu'il doit avoir son loer ; cil prent les choses qu'il trove en la meson. L'en demende s'eles sont son gage ? Et l'en dit que oïl.

Quant li venderres prist en gages un champ por dix livres, et l'en li rent cent sols, l'en demande s'il pot tot vendre le champ qui vaut dix livres ? Et l'en dit que non, mès il puet vendre del champ cent sols.

§ 2.

Cil qui autre deffant done plège de rendre la chose juigie, et li plèges baille gage ; la chose eschiet à celui por qu'il plévit : ne il n'est plège, ne li gages n'est gages. Li créanciers demende le gage, et cil qui [p. 175] tient la chose velt tendre la chose por gage : l'en dit que l'en ne puet le plège nanter por quoi la chose vaille l'argent.

§ 3.

Une chose est vendue par si que se il trove meillor marchié dedanz un jor, que la vente est nulle ; il engage la chose dedanz celui jor, et dedanz celi jor trove meillor marchié : l'en dit que li gages est nus, se n'est par la volenté au vendeor.