XIV. De tesmoinz amener et rapeler [rubr.]

Il est contenu en la loi Julius que l’en ne face dire [95rA] son tesmoing à nul à force contre soegie, gendre, parrastre, fillastre, cousin, cosine ; ne franchi contre ses effanz, ne contre les parenz à l’ome ne à la femme ; ne le patron contre le franchi ; ne le franchi contre le patron.

Il est establi en lois que le socre ne le gendre ne seent forcié de porter tesmoing ; et en non de gendre est entendu li espose1 de la fille ; et en non de soegre, le pere à l’esposee.

Tesmoing ne sont pas tenable à qui l’en pot commander à porter tesmoing.

L’en croit tesmoing de serf quant il n’i a autre provance à avoir la verité.

Veillart, feble gent, chevaliers ou cil qui sont hors por la cause de la commune chose ne devent pas estre forcié ; et itex persones ne sont pas tenues d’i venir.

Pere n’est pas bon tesmoing au fiz, ne le fiz au pere.

Nus n’est droit tesmoing en sa chose.

.ii. garenz sofisent la où nombre n’est nommé, car plusier se tient apaié de .ii.

Il est tretié et demande l’en se cil qui est dampné por avotire pot estre receu à tesmoing. Et je cuit que non ; donc ne vaut rien son tesmoing en droit de cité, ne il ne pot demander heritage ne sesine des biens.

L’en demande se cil qui sont dampné por communs juigemenz ‹...› ; et il n’en sont pas deffenduz par ceste loi ne par la loi Julien. Et ce que les lois entrelesserent ne sera pas lessié por l’office au juige, à qui ce apartient de enquerre de la foi que lëau home dira.

Cil qui est dampné de la loi Julius ne poet estre receu à tesmoing. ¶ {1} L’en demande se heirmafroditus – c’est à dire acoillié – doit estre receu à tesmoing. Sa qualité le demostre.

Cil qui diront faus tesmoinz, ou vers, ou qui les descovrent à parties, le juige les doit punir hautement.

Li peres et le fiz qui est en son poer, et .ii. freres qui sont au poer au pere2, poent estre tesmoinz l’un à l’autre en un meisme testamant ou en autre afere ; car il ne nuist rien à prendre plusors garenz en une meson en autrui afere.

De ce que la loi Julius deffent dire tesmoing de avotires femme qui en est cond[95rB]empnee, entent l’en que feme pot estre tesmoing.

Qui ne velt ne die pas son tesmoing, ne cil qui est hors do païs non pas por son tesmoing celer, ne cil qui moine vitalle à l’ost, {1} ne orfelin.

Le acuseor ne doit pas amener en tesmoing celui qui est condempné en commun juigement ne cil qui n’a .xxv. anz.

Cil qui est condempné por chançon mau renomee ne pot estre tesmoing. {1} Et ce doit l’en bien savoir, se la chose le requiert, non pas solement privee gent, mes grant prelat, s’il sont present, devent porter tesmoing. ¶ Encor dit le senat que le prevost doit porter tesmoing en juigement de cause de avotire. ¶ {2} Se nos somes forcié à prendre champion à tesmoing ou tele persone, l’en ne doit pas croire son tesmoing por lui batre. ¶ {3} Se tuit li tesmoing sont d’une valor et d’un pris, et la qualité de l’afere et le movement do corage au juige s’i acorde, l’en doit tenir ce que il dient. Et se aucun de cez dient autre chose et il ne sont pas veü, l’en doit croire à ce qui s’acorde à la nature de l’afere et à cez qui ne dient lor tesmoing par haine ne par amor. Et confermera le juige par son corage, par provances et par tesmoing ce que il verra plus convenable et plus pres à verité. L’en ne doit pas regarder à la moltitude des garenz mes de purté et à la lëauté de lor paroles, la où la verité est aperceue.

Bien se gardent li prelat de chascun leu environ cez qui volent porter tesmoinz, qui quierent receveors ou aus, par qui les aferes seent depeciez et que la prove des choses soit sauve.

Cil ne pot estre garent qui avant le fut en cele chose.

Il ne fut pas acordé que les garenz que le acuseor ameine de sa meson fussent garanz.

Il est deffendu que les justices se prengent garde que li avocat ne dient tesmoing en la cause dont il furent avocat. Et ausi est deffendu en cez qui font autrui aferes.