182
Prix-fait. — Pierre le Berche, charpentier d’Orléans, s’engage par contrat avec Jean Turineau, marchand d’Aubigny, à lui faire un chaland avec une tour pour le prix de 56 francs et un tonneau de vin. Jean s’engage à fournir le bois et les clous, à verser tout au long du travail 56 l. t., dont 6 l. t. à Gien en juin prochain, à donner au charpentier un chêne, à lui payer ses déplacements pour voir le bois et à lui verser 2 royaux d’or s’il annulait le contrat avant le 24 juin. Pierre promet de commencer le travail au 24 juin et de livrer le bateau avant Noël prochain, ainsi que de prêter un homme au marchand pour aider à la fabrication du chaland.
98 v°Ledit jour de venredi.
Pierre le Berche, charpentier d’Orleans, confessa avoir contraicté et marchandé avec Jehan Turineau, marchant demourant Aubigny, de lui faire ung chalan de XIX toises de long, de XIIII bors et aussi de XII piez de rable, pourtant les bois sur V bors et les II bors dessus d’un pié et leur cousture et les autres bors ainsi comme il appartient audit chalan, garni comme il appartient de tous ses membres. Avec ce sera tenu ledit Pierre le Berche de faire la tour, comme il appartient audit chalan, et avec ce faire une santine portant deux tonneaulx de vin. Cest marché fait pour et parmi le pris et somme de cinquante six frans, monnoie courant, et ung tonneau de vin. Et par ce faisant sera tenu ledit Pierre le Berche de querir et bailler la monte dudit chalan et ledit Turineau lui bailler tout bois et clou qu’il y convendra, sur le port de Saint Satur ou au port de Menestreau ou a autre port ou bon leur semblera au prouffit d’eulx deux. Et rendra ledit Berche tout fait et parfait dedens Noel prouchain venant. Et a promis ledit Berche de commencer a faire lesdiz oeuvres a la Saint Jehan Baptiste prouchaine venant. Et aussi promect et sera tenu ledit Turineau de paier audit Berche ladicte somme de LVI livres tournois en faisant lesdiz oeuvres. Sera tenu aussi ledit Turineau de bailler audit Berche ung chesne pour en siez bois et, avec ce, faire les despens dudit Berche pour aller veoir ledit bois. Oultre plus sera tenu ledit Berche, et aussi a promis, de bailler et querir audit Turineau ung homme pour aller signez les corbes et faire les autres choses qu’il esconvient faire pour ledit chalan. Et plus a promis ledit Turineau de bailler audit Berche, pendant ledit temps de Saint Jehan Baptise, en la ville de Gien, la somme de VI livres tournois, monnoie courant a present, lesquelles il sera tenu desduire et rabatre audit Turineau sur ladicte somme de LVI livres tournois. Et se il advient que pendant ledit temps de Saint Jehan Baptiste ledit Turineau ne voulsist tenir ledit contrault, en ce cas il sera tenu paier audit Berche deux reaux d’or. Obligent de chacune partie. Renoncent etc. Coustz etc.
Dans la marge gauche : f.
