362
Vente. — Jean Piquault, laboureur, paroissien de Saint-Vincent-des-Vignes, vend à Étienne Servellet, paroissien de Saint-Flou, pour 59 ans à partir du 1er novembre 1435, la moitié de masures et jardins situés dans la paroisse Saint-Euverte et qu’il a pris à ferme de l’abbaye Saint-Euverte pour 40 s. t. par an. L’acheteur ne devra en payer que 20 s. t. par an à Jean Piquault. La vente est faite au prix de 3 royaux d’or et 16 s. p. et avec l’obligation de faire ce que Piquault s’est engagé à faire auprès de Saint-Euverte.
145 v°Et ledit jour de dimenche.
Jehan Piquault, laboureur parroissien Saint Vincent des [Vignes d’] 1 1. L’encre du coin supérieur droit de ce feuillet est effacée.Orleans, recongnut et confessa que il avoit et a vendu, vend, cede, quitte, transporte et delaisse, de la feste de Toussains qui fut [mil CCCC] XXXV jusques au temps de cinquante neuf ans prouchains aprés ensuivans, a Estienne Servellet, parroissien Saint Flou, pour lui, ses hoirs, la moittié et tout tel droit comme ledit vendeur a et peut avoir en unes masures et jardins entretenans, que souloient tenir feu Thomas Thomas et André Tibourdeau, assis en la parroisse Saint Euvertre, ouvrant sur la grant rue d’illec et en la rue de Bourc Neuf, partissant avecques messire Guillaume Tribedeau qui y a l’autre moittié, tenant a l’eritaige que Andre du Boys tient de l’eglise Saint Euvertre d’une part et Jehan Martin espicier d’autre part. Lesquielx heritaiges ledit Piquaut vendeur prist naguieres jusques audit temps de messires les religieux abbé et couvent de Saint Euvertre d’Orleans a la somme de quarante solz tournois a avaluer et prandre le [marc] d’argent a VII livres tournois et au dessoubz de rente, ferme ou pension. De laquelle rente de XL solz tournois dessusdiz ledit achatteur ne sera tenu paier que XX solz tournois aux termes et festes de Noel et de Saint Jehan Baptiste, a chacun terme la moittié. Laquelle rente de XX solz tournois ledit achatteur sera tenu paier chacun an durant ledit temps ausdiz termes dessus declairez audit Piquaut vendeur, a ses aians cause ou au porteur de ces lettres. Et au seurplus faire tout par la forme et maniere que ledit Piquaut y est tenuz et obligez, et le en acquitter, garantir et deffendre envers lesdiz religieux abbé et couvent de Saint Euvertre et tous autres qui aucune chose lui en pourroient demander au temps ad venir. Ceste vente faicte pour et parmi le pris et somme de trois reaulx d’or, en or, et seize solz parisis de la monnoie courant a present, paiee et baillee dudit achatteur audit vendeur si comme tout ce ledit vendeur congnut et confessa et dont de tout ce se tint pour contant. Et d’icelle somme quitta et clama quitte a touz jours icellui achatteur, ses hoirs et aians cause de lui. De la moittié desquielx heritaiges dessusdiz ainsi venduz et transportez comme dit est dessus, ledit vendeur se dessaisit et devestit etc. Et en saisit et vestit etc. Promettent garantir etc. Obligent etc.
Dans la marge gauche : f.
