I. De jotice et de plet1.

§ 1.

Premièremant savoir convient à cui est savoir droit, d'où descent le non de droit. Droiz est apelez de droiture ; quar, si comme li mestre dient, droiz est art de bien et de igauté ; et pour ce aucun par droit apelent cels qui font le droit : mestres. Nos tenons et gardons droiture, et savons bien et loiauté ; et devisons loiauté de tricherie, et ce que l'en doit fere de ce que n'est pas à fere ; et convoitons ce à fere, non pas por paor de paine solemant, mès por atente de loier ; et convoitons veraie filosofie, non mie fause2.

§ 2.

C'est estuide de deux piez, l'un privé, l'autre commun : droiz communs est qui apartient à l'estat de la chose de Rome, et li privez est celui qui apartient au profit de chascun. Unes choses sunt profetables communémant, et unes privées.

Droiz communs est en saintes choses, en provoires et en seignories.

[p. 2] Droiz privez est partiz en trois : il est cuilli de naturel commandemant, de vilains ou de borjois de citez, ou de chevaliers3.

§ 3.

Droiz naturex est qui nature enseigne à toutes bestes qui nessent en ciel et en mer et en terre, et est communs à oiseaus ; et de ce droit descent jeointure de mâle et de fumele, que nos apelons mariage, et engendremant de meismes, et la noreture que nature enseigne ; et nos veons bestes sauvages et autres bestes jostisier soi par ce droit4.

§ 4.

Uns autres droiz est de genz, dom il usent, qui se devise de liger de droit naturel ; quar celui droit naturel apartient à totes bêtes, et celui droit de gent solemant as homes communs est : ausi comme nos obéissons à nos parenz par le commandemant nostre Seignor5.

Droiz s'acorde que nos ostains force et enjure, se l'eu la nos fet. Que se aucuns fet riens por deffendre son cors, l'on li otroie qu'il face par droit ; et com nature aist establi entre nos un cosinage loial, desloial chose est que nus homs face conchiemant, ne barat à autre6.

Franchises sunt establies de droit de genz, et franchise est dom de franchise ; car tant comme aucun est en servage, il est soz main ; et se il est franchiz, il est hors dou pooir son mestre. Et ceste chose vint de droiz des genz ; car par droit naturel, toz homes nessent frans ; et com l'en ne savoit riens de cuvertage, l'an ne savoit riens de franchise ; mès enprès ce que droiz de genz trova cuvertage, enprès fu trovée franchise. Et com toz fussent homes par nom, par droit de genz, trois menières de genz commençarent à estre : frans, et sers, et franchi7.

Et de cest droit de genz furent establies batailles et genz devisées ; et li règne et le seignories ; chans, vignes, prez, mesons furent fetes ; marchez, venençons, loages, aloemant, gages, obligemant sunt establies, estre (outre) unes autres qui furent establies des droiz des citez8.

§ 5.

Droit de citez est qui ne se part pas dou tot de droit nature, ne de droit de genz, ne le sont pas dou tot ; et quant nous ostons ou ajoustons aucune chose en droit commun, nos fesons droit propre, c'est à savoir droit de cité. Et cil droiz est escriz ou saint escrit de [p. 3] Rome, si comme François l'usent. Droiz de citez est qui est fez par le pueple et par les seignors et par l'autorité des princes sages ; et cil droiz est par le commun profit9.

Totes genz qui sont guovernés par lois et par coutumes, usent en partie dou droit qui lor est communs à toz. Car chascun droit que li pueples establissoit por soi, cil est propres droiz de cité. Et ce que naturel raisons establist en totes genz, ce est gardé ausi comme partout ; et est apelez cil droiz, droiz de genz, qu'avisés totes genz en usent10.

§ 6.

Jostise est permananz et perdurable volenté qui rent à chascun son droit.

Li commendemant de droit son tiel : vivre honestemant, ne fere mal à nul, rendre à chascun sa chose. Fè ce que tu voudras que l'en sache.

Le sen de droit est de savoir ou avoir les quenoissences des choses dou ciel et de la terre, et de tort et de droit11.

§ 7.

Droiz est apelez en pluisors menières : en une manière que l'en dit que droiz est bone chose et juel, si comme est droiz naturel. En autre menière est droiz diz ce qu'est profetable à chascune cité ; et cil droiz est apelez droiz de cité. Le prévost dit l'en meismes qu'il fet droit, tot face-il sovent tort ; mès l'en doit avoir regart à ce que il doit fere, non pas à ce que il fet. En autre menière dit l'en droit le leu où l'en fet droit, et est por ce issi apelé por l'ofice que l'en i fet ; lequel leu nos poons issit dire que là où li prévost siet, sauve la digneté et sauve la costume as serganz, celui leu puet estre apelé droit. Aucune foiz apele l'en droit, besoing : si comme droit en aucune chose ou par lignage ou par affinité12.

§ 8.

Quant ge vul espondre les lois, ge voil dire dou commencemant ; non pas por ce que ge vuelle tenir les mestres qui parlèrent avant por gengleors ; mès por ce que ge m'aperçoif en totes choses que c'est proufiz au pueple.

[p. 4] Je vuel dire dou commencemant des choses. Commencemant est le pooir de chascune chose ; car se li avocaz dient lor cause devant le juge sans fere li entendre le commancemant, lède chose sera s'il ne le dient ; et se ge ne sui déçeuz, la parole dou commencemant, qui est dite devant la matière, fet plus volentiers oïr la besoigne et plus volenters entendre.

Il nos est avis, et mestier est, que nos mostrons l'orgine de droit et les préos.

Com nos somes aperceu que li pueples fut sanz certaine loi et sanz certain droit, nous feimes cest presciens ordeneemant13.