XIX. De l'ofice au baillif.
§ 1.
Li baillis a sor toz cels de sa baillie seignorie et poer, non pas solement sor cels des citez ; mès sor toz cels de sa baillie. Li baillis aura la jotice des sers qui s'enfuiront par la cruauté de lor seignor ; et des pères qui auront besoing, que lor fiz ne lor vodront bien fere, en auront poer ; et puet envoier en essil ceaux qu'il vodra, qui forfet l'auront.
§ 2.
Au commencement de l'espitré dit li rois : Ausit comme nos t'aien baillié nostre baillie, par ta loiaime (loïauté) et par ton sen, tot la forfet que l'en fet au la baillie apartient au baillif ; et se l'en passe les bones de la baillie, li baillif n'i a poer. Et se aucuns met sus à un home qu'il ait fet avotiere, ou à la feme à un home, li baillis s'en (l'en) orra de ce, et de murtre, et de rat, et de larecin, de traïson, d'omicide, des membres tolir, de sanc, de boce, de plaie, et de force aperte et non aperte, et de male renomée, et de mobles et d'éritages, et de lutors et de curators qui se sont malement mené ès choses qu'il gardoient : li baillif les punira ; et de cels qui ont par loier les baus des orfelins, et de celx qui porchacent que li orfelin aient mauvès tutor, et de cels qui par lor conseil font que l'orfelin maumet ses biens. Et fut commendé que le prévost oie les pleintes des sers, s'il se pleignent de lor [p. 70] seignors ; et ausit orra-il les seignors, s'il se pleignent des sers. Et de celx qui moinent gordement les sers, ou par cruauté, ou par dureté, ou par félonie, que l'en les contraigne à fere contre nature : conchiement montré au baillif, il en fera droit, et deffendra les sers, qu'il ne soient forcé à fere riens contre nature.1.
§ 3.
L'en puet apeler de duc, de conte, au baillif, s'il fet tort, an petiz aferes.
§ 4.
Encor i a que li baillis doit garder les changeors et les autres marcheanz, qu'il saient en bone manière, et qu'il se gardent de fere chose encontre lor mestier. Et se li patrons se pleint que si franchiz le tient vil, ou li fet vilenie, ou le despit, ou sa fame, li baillis les chastiera segont la querele : quar itel menetères doivent estre puniz. Ou s'il encuse son seignor ou s'il fet conspiracion contre li, ou qu'il le descovre contre ses anemis, li baillif doit envaer tel home en essil2.
§ 5.
Encor apartient au baillif que char soit vendue à droit pris, et les autres viandes, et que droites mesures corgent. Et doit li baillis garder le repos dou pueple ; et que, se li prévolz (li baillis ?) envoie aucun en essil, il le puet envoier hors dou réaume. Et commenda li rois que fussent acussez devant le baillif, qui tienent mauvèses compaignies ensenble3.
§ 6.
Se li baillis est hors des bonnes de sa baillie, il ne puet jugier ; mès il puet commender4.
§ 7.
Baillif ne puet quenoistre de chose qui apartiegne à la borse le roi. L'en otroie que l'en puisse apeler de baillif, s'il fet tort.
§ 8.
Li baillis pot baillier sa juridicion à un autre, ou mander ; mès li autres ne la puet baller à autre, ne envoier.
