IX. De la devise de droit de persones1.
§ 1.
Ci a autre devise de droit de persones (et) est tele : li un sont seignor de soi, et li autre sont à autrui ; or convient voer de ceaus qui sont à autrui : quar se nos savons qui sont teles persones, nos saurons bien qui sont les autres. Li serf sont au poer lor seignor, et gent establirent ce droit. Li sires a poer sor son serf, et quanquez li serf conquiert, il est au seignor. Mès ore li seignor ne puent fere outrage à lor serf sanz cause et sanz reson : car, se comme Jehanz de Beaumont, chevaliers de France, le establi et dit : Cil qui aucit son serf sanz cause, ne doit pas meins estre puniz que s'il avoit ocis autrui serf. Et la constitucion Johan de Beaumont atempre la cruauté as seignors2. Se sires est cruex3 à son serf, ou lor fet force, fax seremant, l'en en doit fere droit, si com li rois mande à ses baillis par itel paroles : Il convient que li seignor aient poer en lor sers, ne ne convient pas que nul home perde son droit ; mès as seignors apartient qu'il ne lor facent cruauté, ne que ne's laissent geuner, et ne facent chose qu'il ne doient. Et doit l'en oïr la querele à ces sers qui s'enfuiront de lor seignors ; et se tu truives que l'en les ait outre menez ou par fain ou par injure, commende que li serf soit hors de son poïr, et tot l'amende-il, ne doit-il pas avoir le serf, s'il n'a sa cruauté atemprée4.
§ 2.
Et ci dit li rois que nos enfanz sont en notre poer5, et cil droiz [p. 58] est propres à tote gent. Li fiz de mon fil est en mon poer, se m i fi est en mon poïr ; ausint les filles ; et cil sont au poer, jusque il aient quatorze anz passez, et les mères les ont ausit. Quar cil qui naît de moi et de ma feme est en mon poer, et cil qui nest de mon fil et de sa feme, est mis niés et ma nièce, et lor enfanz sunt en mon poer6.
§ 3.
Se aucuns menor remaint, qui n'ait père ne mère, li plus près l'ara en son poer, par ce qu'il li face son preu ; et si autres li veaut meaus fere, ou il le lerra ou li fera autant ; et c'est de vilenage. Et ces choses sunt fetes par le juge. Et se aucuns tient en fié franc, la garde de l'enfant et des choses sont ou pooir au plus près, et il sunt tuit li crois des fruiz et dou fié à celi qu'il l'a en garde ; et li doit la chose tenir en bon poer et en bon point. Ou point où l'an trove la chose à l'orfenin, en celi point l'ara cil qui l'ara en balle, et paera les detes. Et feme est d'autretel seignorie cum ome an fié, si n'i a que fomez, et en vilenage. Et cil dou fié sera ou poïr jusque vingt-un an, et s'il se viaut marier à quatorze anz ou à plus, aura-il ses choses ? nenil, devant vingt-un an : et le vilenage il ara.
§ 4.
Nos apelons celui fiz qui nest d'ome et de feme espousée. Or poson que li mariz soit hors par dix anz dou païs, et quant il revient, si trove l'enfant en sa meson. Il nos plest à siegre la sentence Geufroi de la Chapele, qui dit que la sentance est tele que li enfes n'est pas au mari : quar la putain ne doit pas avoir profit en sa lécherie. Et dit que li mariz qui demore assiduemant à sa fame et renie son enfant, ne doit pas estre oïz. Mès il m'est avis, et droiz s'i acorde, que se certaine chose est que li maris n'ait pas géu à sa feme par aucune espace de tens, ou par maladie ou par autre cause, ou par foibleté, ou s'il est tel qu'il ne puet engendrier, cil qui est nez en sa meson, tot le sachent li voisin, n'est pas sis fiz7.
§ 5.
Se li pères est forsenez et la mère est sage, por ce ne remaint pas que li enfes ne soit ou poer son père et sa mère : quar cum droit [p. 59] de poïr est establiz par bones mors, il ne puet faillir que aucuns enfens ne soit ou poer son père, si n'an vint en quas qui issent ; et s'il n'en isent, il i remainent. Et se li pères et la mère son desvé, li enfant sont en son poer, ensint que li enfant8 ; et li desvez et la desvée seront an la mère (main ?) au curator, por le conseau dou juge. Quar le père et la mère devet avoir preu en son enfant, par le droit de la norreture que il ot fet an aus et por ce que li enfes lor doit fere solaz. Et n'est mie reson que en tel quas, nul perde son droit qu'il avoit devant, quar plus li a mestier qu'il ne solet.
§ 6.
Mi fiz ne puet estre por moi en cause, se ge n'é (n'ai) essoine perpétuel, et lor i sera si com d'aage. Et ge puis estre por li, tant com il sera en mon poer. Se li enfes dit qu'il est fiz au père, porce que l'a nori, l'en doit bien enquere, savoir s'il est tis fiz : quar la cause de norrir l'enfant ne fet nul tort à la mère. Fiz naturel, qui sont hors de bail, ne retorne pas ou poer lor père contre lor volenté ; non pas solement naturel fiz, mès tot autre, et fiz et filles9.
