École des chartes » ELEC » CI COMMENCE LI PREMERS LIVRES » V. De postulacions.
[p. 25]

V. De postulacions1.

§ 1.

Come li chasteaus de Conpeigne fust sanz meor, li borgois de la vile s'asenblèrent por eslire le maior. Les dui parz s'acordèrent que l'en requist le meor de Crépi. Li autre eslirent un borgois de la vile. La chose fu portée devant le roi ; et distrent li borjois qu'il fessoient postulacion dou meor de Crépi, com il fust preudom et honeste, et plus profetable en celui leu que en celui où il ere, et bien avoit menée sa juridicion ou profit dou pueple. Contre ce, l'en respondi qu'il avoit recelez les forzbaniz le roi ; porquoi il ne devet estre meres, ne ne poet. A ce, la partie au meor de Crépi respondi et dist que, bien eust-il celui receté, il ne savet pas que il fust forsbeniz. Et li autre dient encontre que forbenissemanz, qui est fez en généralité, ne porte pas acussacion2. L'en demande qu'en die droit ? Et l'en respont : quant il fu forbeniz en général, il ne convint pas que il fu dist à chescun ; car générau forbenissemanz amoine commune seue. Don li rois quasse sa [p. 26] requérance par trois reisons : l'une si est por ce que l'en n'ait achesun de forbenissemant receter ; l'autre por ce que l'en ne puet pas à chascun dire tel forbenissemant ; l'autre si est, por ce qu'il requenuit qu'il l'avet receté, mais il non sevet pas que il fust forbeniz3.

Quant la postulacions fut quassée, que li borgois de Conpeingne avéent fet dou meor de Crespi, li baillis qui estoit lors, les manda en la meson de la commune, et lor dist qu'il esleussent, et dit que s'il ne s'acordoient en une persone en cele vile, il en feroit enprès ce qu'il verroit que biens seroit. Et une partie de cele vile voudrent renoveler la postulacion quassée, et li autre requistrent au roi que lor eslécion fust confermée. Porquoi li rois entendi que cil voloient renoveler la requérence quassée, et avoient perdu le pooir d'eslire, cum cil qui avoient requis persone non digne à lor esciant, et estoit doné le pooir ès autres ; tot fussent-il pou, il avoient plus sain conseil quant il eslurent le borgois de la vile : li rois le lor fet, et conferme l'eslection4.

Enten que cil qui eslisent persone non digne à lor esciant, perdent le pooir d'eslire, et est donez à la menor partie.

§ 2.

Come la vile de Senliz fust sanz maior, il eslurent un sergant le roi ; li autre requistrent le maior de Pontoise. Et com les parties furent devant le roi, cil qui requérient le sergent le roi, disoient que plus de deux parties s'estoient acordées en lui. Li autre disoient que les plus dignes persones avoient requis le maior de Ponteise, en droite forme et segont la forme de la mise ; et issint fut fete la mise, qu'il esliroient à meor borgois de la vile de léanz, persone convenable. A ce respondi l'autre partie, que ce n'estoit pas voirs, et s'il iert issint, il poient par droit requerre le sergant le roi, com les membres dou chief ne sont pas estranges dou cors.

Quant li rois ot ce oï, il aléga por une partie et por l'autre ; et por ce que li serganz ert plus profetables au réaume que à la cité de Senzliz, il ne l'otroia pas ; et quassa le meor de Pontaisse, por ce que la requérance estoit fete dou meins que de la tierce partie. Et li rois n'a mie acostumé tel requeste recevoir en descorde, com requête doivent plus estre célébrées de grâce que de droit. Don li rois manda à cez borgois [p. 27] qu'il eslisent à meor persone convenable, ou par élection ou par requeste, ou par persone nomée5.

Enten que li juges puet dire ce que faut as parties ; et gregnor bien est avant le menor, et commun profit est avant le privé, et otroi de requeste est plus de gràce que de rédor de droit ; et trois menières sont de prover maor en vile : c'est à savoir élection, requeste et nomée persone.

§ 3.

Li maires de Maante fu requis por l'ecort (accort) as borgois de Senz, à estre meres de Sanz, par-devant le roi. Une ville qui ert delez Senz se mist encontre, qui disoient qu'il avoient fete la requeste qu'il ne pooient fere de droit, sanz eus. apeler. A ce respondirent li borgois de la vile, que aucune foiz il avoient esté apelé de grâce. Et com les parties fussent devant le roi, ne li rois ne fust pas certains de ce, il commende que se li borgois vuelent tenir lor requeste, que cil soit meres, et s'il i avint contredit, que les parties venissent à cort ; et se li borgois6 lessoent lor contredit, et la ville tenissent lor requeste, feissent autel ; et se li borgois contredissoient et la vile ne quidast avoir droit, il esleussent autre persone à maor. Ceste est la première partie.

En la segonde, l'en dit que quant il orent ce mandement receu, li un se tindrent à lor requeste et apelèrent que l'en ne feist riens contre aus ; et li autre laissièrent la requeste qu'il avoient présentée communément au roi, et la lessièrent justement, et eslirent le prévost de la Vile-Nove à estre maior de Senz ; et nus de ceus de la vile qui requéroient premièrement à estre (à l') élection, ne s'i acordèrent, fors que un. Et li rois, por le descorde qui fut en la vile, et por ce qu'il avoient fet contre l'ordreit de droit7, et por le péril qu'il i sot, ne reçut mie lor requeste ; et lor manda que, s'il ne porvoient à lor vile dedenz quarante jors, o l'asentement des borgois dou vilage, s'il estoit costume, que il les porveroit par son office.

L'en dit, en la tierce partie, que cil borgois se tindrent au segont mandement, et apelèrent à concorde les borgois dou vilage, sanz celui qui [p. 28] avoit eslu, sauve lor droiture, en après, dom il soufroient a jà, et prièrent le roi por le maior de Mante, et apelèrent à lor acort cels qui avoient esleu l'autre, et envoerient au roi de lor borgois por avoir miséricorde de lor requeste. Et li rois, por ce qu'il sot qu'il orent fet segont la forme dou commendement, lor ostroia lor requeste8.

Enten que requeste est plus de grâce que de dreit ; et se li rois outroie aucuns fez aucune chose, de sa débonaireté, il ne fet pas tort ; et esleuz ne doit pas estre esleuz, mès requis ; et confermement que rois fet, done plenier pover à la persone ; ne l'an ne puet persone porter de çà en là, sanz le congié le roi : ceste chose est aperte.

Enten que par requeste nul droit n'est conquis à celui que l'en requiert ; et par procurator qu'il a plenier poer de son seignor, sunt entendues les persones présentes, et quanque est fet par aus, est ferme, ausint com se li seignor fussent présenz9.

§ 4.

Une vile ert sanz meor : li borgois esleurent par acort le meor d'une autre vile. Et com li rois fust requis des borgois qu'il donast congié à ce meor qu'il avoient esleu, de passer en lor vile, li rois quassa le esliction, por ce que esliz esleuz ne puet estre esleuz, mès requis ; et qui eslit home où il n'a poer, l'eslection ne vaut riens : c'est à entendre home qui n'est de lor juridiction10.


1 Ce titre est extrait du titre 5, De postulatione prœlatorum, au livre Ier des Décrétales de Grégoire IX.
2 Excuse d'ignorance.
3 Decret. Greg. IX, lib. 1, tit. 5, c. 1.
4 Ibid., ?. 2.
5 Decret. Greg. IX, lib. 1, tit. 5, c. 3.
6 De la ville qui est delez Sens (voir plus haut).
7 Contre l'ordre de droit ?
8 Decret. Greg. IX, lib. 1, tit. 5, c. 4.
9 Ces maximes ou brocards que le coutumier extrait de la discussion précédente, semblent se rapporter, en même temps qu'au chapitre 4 ci-dessus cité, au chapitre 5 dont notre manuscrit ne présente aucune espèce de paraphrase.
10 Decret. Greg. IX, lib. 1, tit. 5, c. 6.