XXI.

§ 1.

Saiez pas ne familiez à toz, mès aiez quenoissence à toz : quar po avient que de grant familiarité ne vegne péril de juridiction.

§ 2.

Li rois deffent que nus qui ait juridiction ne griève ses ostes de son règne de trop granz despans, ne qu'il n'ait sergant, s'il ne sunt prodome. Et meauz est qu'il allent senz femes ; et s'il moinent lor femes, il sont tenu d'amender, s'eles forfunt. — Et quant il iront par les contrées por fere droit et por tenir jostice, il doivent fere savoir qu'il vient : et bien puent aler prandre maufessant aucunes foiz privéement. — Cil qui ont juridicion feront bien et corteisie, s'il font savoir le jor qu'il doivent venir. Et quant il a antré en la cité, il doit antrer par la grant porte et la grant rue de la cité1. — L'en deffent que quant cil qui ont juridicion ne pregnent fors petit don, com viandes à passer le jor, ou joiaus, et si petit que nus preudom ne set ameuz à fere mauvesté por si petit don. Et li proverbes dit issit : Ne totes choses ne toz tens ne passe, qui aucuns dons ne prent ; mès petites choses doit l'en prandre2.

§ 3.

Se cil qui a juridicion vient en la cité où il a juridicion, il doit soufrir que l'en le lost et que l'en li face grand fête : car cil de la province i sont tenu ; et font semblant que cil soit sires, por qui il le font. Cil qui a juridicion, comme prévolz, ou baillif, doit voir les yglises ou les saintes mesons, hantées les autres choses qui sunt convenables à la ville ; et doit veoir qu'en tex choses ne faille riens. Et s'il i a riens commencié, qui soit à eschiver (achever) au meauz que l'en porra, et doit amonester cels qui s'entrametent des ovres de bien fere ; et s'il ont mestier d'aide, il lor doit doner3.

§ 4.

[p. 72] Cil qui a juridicion doit estre sages et cortois et débonaires à celx qui auront à fere devant lui, et as avocaz : et tout par mesure, si qu'il ne soit tenuz por musart. Et s'il en trove nus qui alongent les causes ou qui reimbent les causes, il les ostent par droit. Et puent délivrer par droit que li enfant honneurent père et mère, et lor patron li serf. Et se li pères se plaint de son fiz, il puet le fiz menacier et espoenter, s'il ne se contient en bone menière. Et doivent fere que les péticions as genz soient oïes justement, que en dementres qu'il ot aucun par sa richeté, ou aucun par sa engrestié, li poure ne seront pas oï, por ce que n'i porront avenir, ou por ce qu'il (n')ont pris (avoquaz. Et doivent donner) avoquaz à cels, aucune foiz, qui le demendent ; c'est à savoir as femes pouvres et as orfelines et as orfelins, ou à foibles genz, ou à celx qui ne sevent demander lor droiture. Et (se) aucuns li dit qu'il ne puet avoir avocaz por le poer à son aversaire, il le li convindra donner. Il ne convient pas que le plus fort trète mal le feble : et ce apartient à la cure de cez qui ont juridiction que, se aucuns est si otrageus et si maus, que nus ne ose estre avoquaz contre lui, lequel office de avoquas est à toz, cil qui a juridicion i doit metre conseil4. — Et doivent deffendre tôtes et forces, et vencons et plévines, meismement celes où l'en ne paie riens ; et doit-on encore (deffendre) que nus ne gaaint de mauvèse menière : quar la vérité de la chose n'empire pas par la folie d'aucuns. Et doit garder que li plus puissanz ne face tort as menues genz, et que li avoquas de fauses quereles ne facent tort à celx qui ne l'ont déservi. Il doivent deffendre guerres, batalles que droiz ne puet soufrir, et s'il les trueve, il les doit punir. Et si doit garder que l'en demande chose que l'en ne doive, ne ne doivent pas sostenir mauvèses marcheandises, ne ne doit pas soffrir que l'en punisse cels qui ne l'ont forfet, et doivent encore porveoir que nus ne face tort as bones genz5.

§ 5.

Il apartient à celx qui ont juridicion, et à prodome qui la baille, que ce qu'il governe soit en pais. Et ce fera-il longuement, s'il oste cels qui sont mauvès de la baillie, quant il doit scercier les escomeniez, et les larrons, et les murtriés, et punir chascuns segont ce que il aura fet ; et [p. 73] ausit celx qui les recètent : sachiez que li larron ne puent longuement durer. Et se l'en ne puet tenir aucun desvé, il doivent metre aucun consel et remède qu'il soient mis en prison, et issint le commende li rois. Et li rois dit que l'en se devoit prendre garde au desvé qui tue son père, s'il l'avet fet en bon sen ou en desverie ; et s'il l'avet fet en bon sen, il le doit comparer6 — Et se tu sés certainement que il l'ait fet en forsenerie, qu'il ne sache qu'il face toz jorz, et qu'il n'entende riens, n'en i ait point de sopeçon contre lui, tu porras en une feintise estramper sa paine, quar il est assez tormentez de sa desverie : et totes voies le doit l'en bien garder. Et se tu vois que bien soit, bien le puet fere lier et garder ; et la garde et la poine de lui apartient à ses amis. Et s'il avient, comme aucunes foiz, que aucuns sunt desvé une foiz et autre foiz sont sein, et fust seins en celui point où il fit le fait, tu l'enquerras diligement ; et se tu le sés, tu ne li pardonras pas ; et s'il est issit que tu saches qu'il l'ait fait par félonie, droiz est qu'il soit tormentez. Et s'il est ensi, en tel point où il fit le fet, que si ami l'eussent en garde, qu'il le deussent garder, tu dois apeler cels qui le devient garder en cel tens qu'il fist le fet : et se tu trueves qu'il aient esté si négligent que par lor négligence soit li forfez fet, droiz dit que l'en les doit metre en poine. — Quar la garde est baillie de forsenez à lor amis, non pas solement por aus qu'il facent mal, mès qu'il ne facent mal à autres.

Et se li desvé font chose qu'il ne doivent, l'en doit par droit metre lor colpes sor cels qui les doivent garder, comme il face tel fet par mauvèse garde7.

§ 6.

Il convient que li baillif se montre au peuple, et cels qui ont juridiction, et qu'il soient débonaire à cels à qui il auront afere, en tel menière qu'il ne se suefret à despire. Don l'en commende que li mètres des provinces ne monstrent familiarité à cels dou païs, plus grant qu'il ne daient : quar de conversement iuel nest contenz de dignité. — Et là o (où) il quenoistront des causes, ne doivent pas estre âpres à cels qui plaident devant els. — Ne ne convient pas qu'il pleure, se il voit aucun plorer devant soi, quar ce n'apartient pas à fere qu'il motre par dehors ce qu'il panse. Et il doit rendre droit si bèlement, que droit ne [p. 74] périsse entre ses mains. — Se cil qui a juridicion la veaut lessier, il ne puet sans le roi8.

§ 7.

Totes les choses qui sont otroïes espéciaument,. ou par loi, ou par baillif, ou par establissemant de princes, ne sont pas otroïes toutes à celui qui le (l'en) mande juridiction. — Cil qui mande n'a poer de mender que segont la segnorie qu'il a ; ne celi à qui l'en mande n'a poïe qu'en ce que l'en li mende. — Cil qui a juridiction de mendement n'a riens propre ; mès il use dou poir à celui qui le mende. — Et si dient li grant seignor que la juridiction passe à celi à qui l'en mande9.

§ 8.

A toutes les foiz que aucuns use de mendement, il ne fet riens por soi, fors por celi qui le li mende, à toutes les foiz qu'il use dou mandement10. — Serf ne bastart ne doivent pas avoir juridiction, se li rois ne lor fet grâce : quar tex genz ne doivent pas estre honorez.

§ 9.

Cil qui a juridiction ne doit pas jugier sols, mès assez de sages genz ; et s'il ne se puent acorder en trois jors, cil qui a la juridicion jugera par la plus saine partie11.