XVII. De l'ofice au prévost1.
§ 1.
[p. 68] Il convient parler briefmant de l'ofice au prévost qui tient les plez, et dom an vint le commencement2.
§ 2.
Li rois en son conseil esgarda qu'il convenoit as citez et as viles prévoz, qui tenissent les pleiz, et eussent grant poer ; et furent esleuz qu'il feissent droit, et tenissent les communs plez, et ne peussent fere que droit ; et otroie l'en que s'il font tort, que l'en puisse d'aus apeler au baillif. Et vout l'en que tex persones fussent apelées en tel dignité par lor san (sens) et par lor loiauté, et qu'il seusent jugier par lor sapience et ne poussent plus jugier mès que li prince devent fere3.
§ 3.
Prévolz ne puet tenir plet qui atoche à la borse le roi. Prévolz puet tenir jotices de terres, de vignes, de mesons, de prez, de cens, de mobles, et puet fere jotice de fet. Que nus prévolz ne doit tenir plet de chose où il a plus de XL sols d'amende, et de mains puet tenir le plet.
§ 4.
Et toz ceaus de sa prévôtez devent obéir à lui. Duc, conte, baron, chastelain, sont, de lor choses, de la jotice au prévost. Prévoz n'a poer qu'en sa prévôté, et en celi poer que l'en li a doné. Prévoz puet prandre des choses aus barons amonétez por rendre, ou por recréance avoir de ce que li devant dit conte, duc, prendra de cels que li prévoz ara à governer ; et l'en entent de ce que droiz ne doit sofrir. Duc, contes, barons, ne devent pas estre tret en plet devant prévost, dou fet de lor cors, ne de lor demeine : quar chascune tele persone ne doit estre jugiez que par le roi, qui li doit foi, ou par ses pers.
§ 5.
Prévolz doit quenoistre des communes injures ; mès il ne puet pas fere pez, se droit ne s'i acorde.
