VI. D'eslections, et de cels que l'en doit eslire, et des choses que l'en doit faire par eslectton1.

§ 1.

L'en dit ci que nus ne doit estre esleuz que par l'acort de cels qui i doivent estre, et se autrement est fet, le ellections est nule.

Quant bans est criez en commune seue, cil qui vienent por acheson dou ban, pueent eslire, tout soient-il pou.

Enten que par ban est entendu assemblée en eslection, où il a compaignie [p. 29] de borgois ; et l'en ne doit pas eslire sanz commune seue, c'est-à-dire par (sans ?) ban ; et borgois devent fere le eslection de lor maor.

§ 2.

Aucuns qui voloit estre meres, enpétra letres dou roi, que l'en se consentist en lui fere meor. L'en dit ci que tel persone doit estre refusée ; issint que s'il se repent, que n'en soit nus en droit, ne en amende2.

Enten que les venes proières ne sont pas tenables, ne recevables ; et qui prie por soi d'avoir dignité, l'en doit entendre qu'il le fait plus por la digneté avoir que por le salu de s'arme (son âme).

§ 3.

L'en dit ci que quant aucuns est esleuz segont droit, l'en doit enquerre de lui et de s'âme et de ses mors, là ù il converse ; quar là le set l'en miauz3.

§ 4.

L'en dit ici que par confermement le roi, est entendu la seignorie et le poer de l'ofice ; et doit estre baillié par convenant, qu'il face as viles tel redevance com il doit fere, et qu'il la puisse fere et doie.

Enten que par le confermemant le roi, est entendu plenier poer ; et por niant demande, qui ne rient ce qu'il doit. Et li reis ne veaut riens establir que l'en ne puisse et dée soffrir4.

§ 5.

Uns qui avoit fet discorde en une vile, quant il eu cest crime amandé, retorna arrières en la vile, et se mist en la commune. Enprès, ne demora puis guères qu'il fust esleuz un des douze pers de la commune. L'en demande se s'eslections doit estre confermée, et l'en dit que oïl, s'il n'a esté esleuz de tex qui fere ne le porent, et s'il n'i a chose autre qui empêche s’élection5.

Entent : quant aucuns a esté folement contre aucune vile et il vient à esmendement, et il est receuz en la compaignie de la vile, et recovrez toz les droiz qu'il avet por ce perduz.

§ 6.

L'en dit qu'ant l'élection la pape, se il n'i a descort, cil qui sera esleuz de deux parties des cardonaux sera tenuz por pape ; et cil qui, sera esleuz de meins que de deux parties, ne sera pas tenuz por pape.

En autre élection est autrement ; car la sentence de la grignor partie et de la plus seine veit avant.

Enten : aucun est establiz por ce qu'il est à venir ; et eslections de [p. 30] pape fete de deux parz, et la tierce se descorde, est tenue por bone6.

§ 7.

Premèrement7, l'en doit requerre trois choses en celui qui est esleuz c'est à savoir dreit aage, honesté de bones mors, escience convenable. Por ce, establist l'en, premers, que nus ne doit estre esleuz an juridicion ou tenir, s'il n'a vingt anz passez, et qu'il soit niez de loial mariage ; et puis qu'il sera esleuz et sa eslections sera confermée, viene au siège de la juridiction sanz deslaer ; et s'il ne le fet, il remaint en la merci le roi.

Enprès, il dit que nus ne doit estre apelez en menors offices, c'est à entendre estre pers, s'il n'a ausi vingt anz.

Enprès, l'en dit que se aucuns ont esleuz contre ceste forme, il devent perdre poïr d'eslire en eslection portée au roi8.

Entent que l'en ne doit pas fere juge de trop jone home ; et avant qu'il soit juges, l'en doit bien savoir s'il est sages de jugier ; et quant juges est de bele menière, il done exemple au menu pueple de bien fere. Ne l'en ne doit bastart honorier, por ce que genz n'aient acheson de péchier. Et borgois qui eslisent non digne à leur esciant, devent perdre le poer d'eslire.

§ 8.

Come li borgois d'une vile se descordassent à eslire meor, il se mistrent sor le baillif de la terre, et promistrent qu'il recevroient à meor celui dom il les porverroit. Don li rois mande que cil soient parforcé à recevoir meor celui que li baillis lor a porveu, se la persone est convenable9.

Enten que l'en puet bailler à quatre poer d'eslire ; et un puet estre por toz en eslection ; et bien se mete l'en généraument en aus, l'en doit entendre, tant qu'il doie eslire convenable persone.

§ 9.

Uns meres, avant qu'il fust confermez, aministra les choses de la méerie. Li rois commenda que tot soit rapelé, quanque il fist davant ce qu'il fust confermez, et qu'il remaigne en la merci le roi ; quar avant, il ne puet ce fere10.

[p. 31] Enten : devant confirmacion, ne puet-il aministrer des choses de sa merie.

§ 10.

Tel privilége ert en une vile, que nus estranges ne fust esleuz. Uns fut esleuz encontre ce privilége, d'une partie des borgois ; l'autre partie apela au roi, que l'en n'esleust contre cest privilége. Enprès la première éleccion, ançois que ele fust lessée, la seconde fust fete, et celui vos présentez au roi. Et li rois quasse l'une eslection et l'autre, et outroie as borgois poïr d'acorder aus d'autre persone convenable, en tiel menière que la bone renomée des premiers esleuz en soit bien gargée11.

Enten que la premère eslection non quassée, l'en ne doit pas fere autre enprès ; quar eslection fete ne doit pas estre quassée sanz juridiction de plus haut ; et se eslection est refusée por péchié de bien eslire, ele n'est pas por ce mal renomée.

§ 11.

L'en dit ci12 que li baillis ou celui que li rois establira de sa bone volenté, doit conformer eslit.

Enten que aucuns puet fere par autre ce qu'il ne puet ne ne veaut fere de soi.

Aucuns fust esleuz, se eslection fust quassée. Enprès il fu esleuz en une autre vile, où il ala ester. L'en demende se cele eslections doit estre confermée ? Et l'en dit que oïl, se la premère eslections ne fust quassée por le vice de sa persone, mès par la menière de esliction13.

Enten : se vice est provez une foiz en menière de barre, ce n'empêche pas autre foiz eslection ; et s'empêchiez est sanz la menière de l'eslection, li esliz est empêchiez en tel ynglise ou en autre.

§ 12.

Come une ville fust venue en tel dépècement que li borgois avoient getez et gastez les biens de la vile, quant lor mere fust morz, il ne retrovèrent nul en la vile qu'il peussent prandre à meor ; et requéroient un borgois d'une autre vile à meor, qui avoit esté de bone vie et de bon renom. Li baillis le lor bailla ; et il le présentèrent le roi, et li rois conferme cest ordenement14.

Enten que borgois qui vienent (vivent) dissoluement et qui dépiècent et dégastent les biens de la vile, ne sont pas por ce desposez de [p. 32] eslection, ains sont tenu à amender lor forfet ; et eslection de meor det estre fete des borgois de la vile.

§ 13.

Tel costume ert en une vile, que quant eslections avenoit à fere meor, que li borgois de la vile menoient les persones de la vile au prévost, et que le prévost de la vile eust poer d'eslire quel borgois qu'il voudrait. Et li rois dampne cete commune (coutume), et mande que droite menière d'eslire set gardée en totes viles, et tant de diligence mete l'en en ce, jusque l'en ait porveu à la ville ; et quant ce sera fet, s'il est costume que l'en requière la volenté dou prévost et que l'en requière la confirmacion dou roi, soient requises15.

Enten que costume ne vaut riens contre la franchise de la vile, et ellection doit estre fete là où li esliz doit estre, et ce que la plus sene partie de la vile fet, toute la vile le fet.

§ 14.

Uns esleuz et confirmez demendoit que il porroit fere de ses borgois ; que quant il les prenoist ou les lor choses, quant il forfesoient, font corones et se tornoient as clercs, et disoient que li meres ne les poit forcer sanz espéciau commendement de la pape ? Li rois commende qu'il soient forcié à amender le torfet qu'il ont fet, come il ne soient mie queroné fors por tolir autrui son droit16.

Enten : meor puet fere amender forfet par sa juridiction, et clerc qui fet querone por tolir autrui son droit et por achever (eschever) ses meffez, ne doit pas avoir privilége de clerc.

§ 15.

Contens ert de deus borgois en une vile, que chacuns dit qu'il ert esluz pers de la commune. Les parties vindrent devant le roi. Johanz dit que li meres avoit oï les contens, et que Perres avoit fete pez pardevant le meor, et avet resiné à sa esliction, et li meres avet confermé Johan. Li rois sot par bones genz que ces choses devant dites furent veres, et loe le fet au meor17.

Enten : meor puet quenoistre dou droit de l'eslection des pers, et bone pez fete devant le meor doit estre tenable.

§ 16.

Une ville estoit vuide de meor. Li borgois eslurent un borgois de la vile ; et cil esliz, avant qu'il fust confermez dou roi, tint juridiction [p. 33] et dona sentence en jugement contredit ; et d'autre part il n'ert pas sages de sciance ; et por ce li rois quasse se élection, et quanque est fet por lui est néant18.

Enten que esliz à meor ou à per ne doit aministrer jusqu'il soit confermez, et se il aministre, s'eslection est quassée.

§ 17.

Quant li meres d'Arraz fut morz, dix des plus riches homes de la vile, qui estoient hors de la vile, mandèrent as autres borgois de la vile, par certain message, qu'il ne nonmassent nule autre persone, jusque il (y) fussent. Porquoi li borgois qui estoient présent, asignèrent terme, segont la commune (coutume) dou païs, à cels qui n'i estoient mie, et qu'il venissent à faire le eslection ; et demandèrent lo roi savoir se li lontain devent estre atendu ? Et li rois respont qu'il eslisent, et quant auuront esleu, qu'il li présentent l'esliction, et il la confermera comme rois19.

Enten que (qu'en) eslection de meor, de borgois tant lonctens (lointains) ne devent pas estre atendu ; car demore est moult sospeceneuse et domageuse en eslection ; et aucun aporte auscune foiz les fez à deus persones.

§ 18.

L'en dit ci20que quant li borgois furent tuit ensemble por eslire, li uns apela que l'eslection ne fust fete ; et com il se fust issuz de là où il s'estoient assemblié, li autre eslurent un sergant le roi. Et comme il fussent devant le roi, li apeleor distrent contre la eslection que ele estoit fete enprès apel, et de persone d'autre vile, comme il aient en cele vile assez convenable persone. A ce disoit l'en que bien fut fete le eslection, ce ne poet riens nuire, com l'en ne doie apeler sanz gref ; et dit l'en que cil n'est mie d'autre vile qui est serganz le roi, com li membre dou chief ne sont mie estrainge dou cors. Quant ce fut oï, com l'en ne deist riens contre la persone, li rois enquiert de le science et des mors de son sergant ; de ce il le trova bien soffîsant ; et il ne pot pas estre certains se il avoit vingt anz, et por ceste chose et por ce que plus ert profitable au servise le roi que à la vile, il lor done congié d'eslire.

Enten que apeau ne vaut rien, se ce n'est fet por quoi l'en apele ; et office de roi est d'anquerre de la persone ; et li rois est chiés des viles, [p. 34] et si sergant sont li membre dou chief, et la vile si est li cors ; don nos disom que li membre dou chief ne sunt mie estrainge dou cors.

§ 19.

Une vile ert sanz meor ; li borgois eslurent un borgois de la vile ; il le présentèrent le roi. L'en dit encontre, et il méismes quenurent desporveuement qu'il n'estoit pas de léal mariage nez. Li rois ot conseil, et trova un droit qui deffent que bastart ne soit honorez, porce que l'en n'aist acheson de pécher ; et trova un droit autre, qui disoit donques qu'il soit nez, qu'il doit estre honorez s'il est prodom. Mès li establissement le roi et de l'ostel le roi ne deffent pas seulement tex estre esleuz, ainz punist ceux qui tex eslirent, por oster acheson que l'en ne pèche. Jà soit ce que mout de bones mors feissent que cil fust confermez, li rois ne le vout pas, quar li borgois ne l'avoient pas requis humblement, ainz l'avoient esleu desporveuement. Il quasse le eslection par l'autorité de l'establissement de sa cort, et aparne (épargne ?) moult à la vile, (en lui permettant) qu'il puisse eslire un autre ; et s'il eussent autre esleu avant qu'il receussent ceste sentence, li rois quasse cele eslection21.

Enten que l'en ne doit pas bastart eslire ; et nus n'est contraint de prover sou crime quant il le quenoist en tel quas ; et li rois fet bien grâce à bastart, quant il set en lui bones mors et qu'il est sages de sciance.

§ 20.

Come un borgois de Crépi fust esleuz à mere de Compigne, uns, borgois de la vile apela por soi et por autres borgois de la vile, et dist que cil borgois avet mauvese maladie, por quoi se eslections avoit autrefoiz esté quassée, et por ce qu'il ert d'autre ville, et l'en en trovoit assez de convenables en la vile. Et corn uns borgois de la vile, compegnon celui eslit, qui portoit le seau de la vile sanz le seu as autres qui avient apelé, venissent au roi et requissent que l'esliction fust confinée (confirmée), por ce que l'en avoit dit au roi et fet à savoir que l'eslection n'ert pas bien fete, et comme l'en vost enquerre de l'eslection, l'autre partie apela au roi. Enprès les parties furent devant le baillif et lessièrent lor apeau, et se mistrent en lui, qu'il i donast meor. Et com li borgois de Crespi euz apelié au roi de ce grief, li rois ne vout pas celui [p. 35] confermer, et mande as juges que com cil borgois de Crespi ait esté esleuz, sil se consentent à s'eslection, et li apeau remènent, et il soit seins, que il soit confermez, et bien se soient li autre mis au baillif por ce meor ; quar il ne poient lessier la première eslection ; et se li esliz ne s'i vout consentir, si soit l'eslections confermée, s'il est sains22.

Enten que por petite maladie n'est esliz quassez ; et là où la mere partie s'i acorde et se tient, là dit l'en que est la vile ; et aucuns qui n'est pas présent puet estre esleuz ; et li borgois ne puent muer tel eslection, se c'est encontre le eslit, ne vaut riens.

§ 21.

La merie de Maante ert vuide de meor ; dui i furent esleuz, de deus parties. Enprès la cause fu envoïe sor certaine forme, de par le roi, au baillif de Gisort : que se les parties se consentoient, qu'il donast sentence ; si que non, renvoiât la cause au roi, et il asignât jor as parties qu'il fussent devant lui. Cil baillif fist le commandemant le roi, reçut le tesmoign de çà et de là, et les allégacions, et envoient dons au roi et mistrent jor as parties. Et quant l'autre partie vint à cort, c'est à savoir Guillaume, l'autre n'i vint pas, c'est à savoir Pierres. L'en dit por la partie Guillaume qui est présente, que li greignor et li plus digne de la vile s'i estoient consentu, et qu'il ere loable por aage et par escience et par mors. L'en dit encontre l'eslection, que bien fust-il esleuz de deus parties, il n'est pas suffisanz en escience, ne en aage, ne en mors. Por ce que li rois sot que la cause ne li fut pas bien envoïe, li rois le envoia à autres juges, en tel forme, que si Johanz, au tens qu'il fust esleus, n'iert sofisanz, qu'il confermassent Pierre ; se que non, qu'il confermassent Johan et quassassent l'autre, et lou feissent tenir por meor23.

Enten que droit d'eslire est gardé en eslection, et se le numbre est d'une part et d'autre yves (égal), la dignité sormonte ; et la règle dit que l'ofice dou juge n'est pas solement metre en seisine, ains doit deffendre celui qui l'en i met.

§ 22.

Com une vile fust sans meor, li un requistrent le meor d'une vile ; qui ot nom Guillaume ; li autre eslirent un borgois de la Ovile. Et com l'en deist contre le meor qu'il avet aministré en la vile de la mairie sanz le congié le roi : dont li rois mande à un baillif, que s'il savet que li [p. 36] meres eust aministré en cele vile, que il quassât se eslection et confermast le eslection as borgois, bien fust-il esleuz enprès l'apeau, et bien fust-il esleuz de pou. Quar cil qui avoient requis le meor, por ce qu'il avoient sanz congié receu dou roi, avoent perdu lor poer d'eslire, et ert retorné à cels qui eslirent le borgois, bien fussent-il pou. Li juge de avantage reçurent les tesmoinz de çà et de là, et lor reisons, et quassa la requeste dou meor et conferment l'eslection des borgois24.

En la seconde part25, l'en dit que cil confermez alast à cort por mercier le roi, et l'autre partie apela au roi, et dist deus choses sor l'eslection : l'une fut, que enprès apel fust esleuz ; l'autre, qu'il fu esleuz de pou de genz. Et contre le procès aus juges, il disoient deus choses : l'une qu'il ere corrumpu por loier ; l'autre qu'il les avoit apelez en leu soupeceneus, sanz apeler l'autre partie donèrent mauvese sentence contre le meor. Et quant toutes ces choses anéantées par bones reisons, li rois loe ce que li juge li firent d'endroit le borgois.

Enten : qui est meres d'une vile et passe en une autre por estre meor, par s'autorité, sanz commendement, doit perdre l'une et l'autre ; et cil en apele en aide por néant la loi, qui fet contre la loi ; et présuncions est por le juge qu'il ait dreit fet.

§ 23.

Com la vile de Maante fust sanz meor, tuit li borgois se assemblèrent por eslire. Une partie de la vile eslurent Perre, qui n'est pas bien nez, et l'autre partie eslut Johan ; laquel eslections ne vaut riens, non pas por le vice des esliseors, mès por autre cause. Les dui élections furent quassées. Et cil qui eslurent Johan, por ce qu'il n'avoient pas péchié en eslire, apelèrent l'autre partie à eslire, et traitèrent de l'eslection. Et comme il ne se peussent acorder en nule persone, il alèrent au roi, et disoient qu'il avoient esleu Tiébert et Cortin, et que l'eslections n'epartenoit pas as autres, et qu'il avoient perdu leur poeir de eslire, et dévoient perdre, por ce qu'il eslurent apenséement mauvèsemant. A ce l'autre partie respondi que, bien fust-il mauvèsement nez, il n'en lor anuisoit pas, quar li rois li avet fet grâce de ce, et l'avoit moller (légitimé) en tel chose. A la parfin dit li rois que, por ce que la partie qui n'avet riens forfet avet apelée l'autre à fere l'eslection seconde, et cele [p. 37] eslection avet été treite de toz ; dun li rois juga que tot fussent receu à l'eslection, et que l'eslection fust tenue26.

Enten : rigle (est) que cil qui eslisent non digne persone à lor esciant, perdent poer d'ellire, au meins une foiz ; et li rois puet restablir cels qui pèchent en tel chose, et li rois puet en tel chose fere molier (légitime) qui ne sont pas de mariage.

§ 24.

Come li rois feist enqueste en la vile de Pontoise, trois borgois de la vile requistrent trois choses dou meor, por quex trois choses il ne se porent consentir à sa eslection, et por quoi il avoit perdue à avoir la maerie de Roan27.

Enten que requenoissance de forfet fete hors jugement, ausin comme confessions, nuist ; et qui eslit à esciant non digne persone, pert le poir d'eslire.

§ 25.

Pierres fu esluz à estre meres d'une vile. L'en dit trois choses contre lui : l'une qu'il ert symoniaus, en ce qu'il avoit doné loier por estre meres ; et que se eslections n'estoit pas fete segont droit ; et qu'il n'estoit pas borgois de la vile, com de costume nus n'ert borgois s'il n'avoit esté an et jorz. Des deus premières choses28 l'en ne fust pas certains : de ce qu'il n'avoist pas esté en la vile an et jor, et de ce qu'il n'ert pas borgois encore ; et de ce qu'il iert symoniax, l'en fut certains ; et (l'on) mende que l'eslection soit quassée, et qu'il s'asemblent et qu'il aillent eslire dedenz quarante jors29.

Enten : qui n'est borgois de la vile, ne puet estre esleuz en discorde.

§ 26.

L'en disoit contre le meor de Senz et contre s'eslection, que le eslection avet esté fete enprès le nonmement de trois, et anprès apiau de quatre qui i devoient estre à l'eslection ; et contre la persone, disoient l'en qu'il avoient aministré et que l'en avoit apelé au roi, et sor ce, l'en avoit esleu. A tout ce l'en respont que le nomemant de trois choses30 ne li nuit pas à s'eslection, à celz qui furent nomez31 ; [p. 38] et que l'apeau le roi ne tint pas leu, com l'en n'ait riens fet en tort com simple nomemant, mès droite eslection doie estre présentée au roi. Et si li averseres ne voudrent venir, ne ne porrent, l'eslection ne doit pas estre enpêchié por ce, s'il n'i furent, si autre nuisance n'i avoit. Et s'il i furent lessié à apeler par despit32, l'ellection est nule, se les parties ne s'acordent par bone pez33.

Enten que plus nuist en ellection le despit d'un que contredit de moz ; que par noméement de persone, n'a chil qui est nonmez nul droiz.

§ 27.

Com une vile fust sanz meor, po des borgois de la vile eslirent Robert ; li autre pluisor eslurent Geffroi, qui ne vost pas estre meres en discorde. Cil qui eslurent Geffroi apelèrent au roi, que li autre n'éleussent sanz le mere34 consentement de la vile. L'autre partie eslut Robert, et apela que l'en ne feist riens contre l'eslection ; et c'est la première partie35. Enten : en la seconde partie, dit l'en que la greignor partie de la vile eslurent Geffroi contre l'apiau, après l'apeau et avant que la première eslection fust quassée. Quant li rois sot ce, il quasse l'une eslection et l'autre. La première, por ce que ele fust fete de moins que de la moité des borgois de la vile ; la seconde, por ce que ele fust fete enprès la première, qui n'ert pas quassée, et enprès apel.

Enten que ce qui ne vaut riens premèrement, ne vaut riens enprès, et en quel forme ellection doit estre sollenpnés.

§ 28.

Come la vile de la Rochele fust sanz meor, dui i furent esleuz par descort : c'est à savoir le meor de Saint-Liz et un borgois de la vile. Quant il furent devant le roi, l'en dist por le meor de Saint-Liz : et que deus furent esleuz, et que cinq esliseor devoient eslire, et celui que li cinq ou li trois d'aus esliroient, s'il ert convenables, seroit receuz des borgois de la vile sanz contredit ; et fu establi dou commun, que se li trois s'acordoient por une persone, li autre dui s'i acordoient. Il avint que li troi eslurent le meor de Saint-Liz, et mistrent leur requeste [p. 39] en la volenté le roi, et la puplièrent au commun ; et li autre dui eslurent le borgois de la vile36, et apelèrent li troi que l'en ne feist riens contre aus : et c'est la première partie37.

En la segonde partie, disoit l'en por les borgois : que cum cil esliseor se descordassent, li borgois lor ostèrent le pooir d'eslire, et por ce que li troi apelé ne vindrent as borgois, li borgois eslurent un borgois de la vile ; et sor ce mostroient les letres au (du) séneschal de Poito de lor confermemant.

En la tierce partie, dit l'en que, toust eust li séneschaus bone entencion en celui fet, il fut déceuz, et les letres furent enpétrées por boisdie, com il n'avoient fet nule mencion au séneschal dou meor de Saint-Liz, qui avoit esté requis de cels à cui li communs avoit doné poir d'eslire ; et le chapitre ne poet pas rapeler, come il avoient jà esleu, et li troi s'acordoient à une persone.

En la quarte partie, quasse li rois le eslection as borgois de la vile, non mie por le vice as borgois38, et mende que l'en enquière de la requeste au meor de Senz-Liz, et s'il est profetable à estreper (extirper) par la trecherie de la Rochele, qu'il soit mères de la vile39.

Enten que cil puet nomer persone à qui l'en a doné poer d'eslire ; et commune puet tout metre le poer, sor un tout, d'eslire. Et quant droite eslections est fete, avant le rapiau dou poer, l'eslections vaut ; et l'en ne puet home requerre, se autres est requis, jusque l'eslections [p. 40] soit quassée ; et l'eslections n'est pas bone soulement por persone, mès por la menière d'eslire.

§ 29.

Come li chanoine de Paris eussent esleu évesque, et le présentèrent le roi, li rois ne le vost recevoir, ne rendre son régale. Com de costume évesque ne puet estre esleuz sanz requerre le congié le roi, l'en demende se l'eslections doit estre quassée, ou que l'en doit estre ? Et l'en respont com il ne devent eslire sans congié, et il eslurent, il firent ce qu'il ne devoient pas fere ; et qui fet ce qu'il ne doit pas fere, en tiel quas il ne fet riens40.

§ 30.

Uns meres eslut un borgois de la vile à estre pers de la commune comme un des pers fust morz. Li borgois de la vile ne le voudront recevoir, et disoent, segont droit qu'il le devoient eslire, et segunt costume. Li rois commende que la eslections que li meres fist, soit quassée, com de droit naturel l'eslections apartiene as borgois de lor pars eslire et de lor meor41.

§ 31.

Come il fausist en une vile un meor, et li meres fust morz, li borgois de la vile baillèrent à trois poer d'eslire, et jurèrent qu'il tindroient celui à meor que cil trois borgois esliroient de la vile ; et cil troi jurèrent qu'il esliroient meor en bone foi. Li trois oïrent la volenté de chascun, et eslurent Renaut, borgois de la vile, et la vile s'i otroia, et li baillis reçut et tint l'eslection à bone.

Et cum l'en deist devant le baillif qu'il ert trop jone, avant qu'il fust confermez, li baillis dit par droit qu'il ert de bon aage. Et por ce que aucuns contredisoit de noveau l'eslection de celui, cil élis le fist tere. Enprès, dit l'en devant le roi que, cum li troi esliseor fussent tenu d'eslire celui qui seroit de la vile, ou de la greignor partie nomez, seroit tenu por meor ; ne li esliseor ne gardoient pas bien la forme qui lor fust baillié, ançois eslurent Renaut à poi de cels de la vile, dunt la vile fust gabée ; et disoient que Renauz ne fu mie esleuz segont [p. 41] naturel reison42. Don li rois commende que li contradiseor jurent que par malice ne diront riens contre l'eslection ; et li esliseor jurent ausin qu'il diront vérité quant de ces borgois se consentirent à l'eslection Renaut43 ; et se li troi ou li dui de cels qui eslirent, dient que la mere partie des borgois si s'en consentist, li contrediseor ne soient plus oï. Et cum lor prueve ne soit pas soffisant en chascun d'aus, l'en dit que l'eslection Renaut soit quassée.

En la fin, l'en dist que Pierres, borgois de cele vile44, perde cent mars comme il se obliga, que li esliz ert trop jouenes, com (quoique) li baillis deit par droit qu'il avoit droit aage ; et la sentence pasoit jà en chose jugée, com (puisque) l'en n'eust pas apelé devant le roi dedenz les huit jorz45.

Enten que tot ne puisse pas li baillis lâchier droit sus aage d'aucun, donques ne puet-il pas doner sentence. Et se vile est sanz meor, persone digne puet estre esleus, non pas la plus digne ; et vaut le eslection. Et cil qui propose barre, doit jurer que par malice ne la dit. Et qui est sengles46 en son tesmoin, n'est creuz. Et santance donée de barre mise avant, et passé par l'espace de huit jorz en autorité de chose jugée, ert ausint comme sentance diffinitive.

§ 32.

Come li meres d'une commune fust mors, la vile dona poer d'eslire per, en tiel forme que cil que six ou la mere partie d'aus esliroient, la vile lou tendroit por per. Il avint que li uns d'aus fust nommez des quatre, et uns autres d'aillors fust nommez des deus. L'en demende laquele eslection dut avant valoir ? et l'en dit à droit que cele qui fust nomée des quatre, se il (si l'élu) se consentoit à eslection, et se autre chose n'empeschoit47.

[p. 42] Enten que quant poer est donez à aucuns d'eslire, il puent eslire aucuns d'aus ; et por ce, s'il [ne] puet se eslire, il [ne]48 se puet bien consentir en eslection qui est fete de lui.

§ 33.

Come li ballis le roi eust loié le eslection de un, qui avoit non Phelippe, et li chapitres s'i fust consentuz, fors trois dou chapitre, qui alèrent au roi, et disoient issi : Cil ballis qui loa cele élection fut quenesseor ou elliseor ; s'il fust esliseor, il fist tort, qu'il mist sa faucille en autrui blé ; s'il fust quenesseor, il fist mal, quar il ne apela pas les parties aversaires. A tot ce li rois respont, que cil baillis ne fut pas esliseor ne quenesseor ; mès il fut dénunceor : quar il dénonça la persone Phelippe convenable, non pas Pierre, par maintes reisons.

En la seconde49, il monstre par mout de raisons que la persone Pierre n'est pas digne, por ce qu'il iert parjures le roi, et ala contre les choses del roiaume et guerroia le roiaume. Et por ce li rois quasse se eslection et loie l'autre.

Enten que qui est parjures dou règne et hors de la foi le roi, li rois n'est pas tenuz à lui recevoir en sa terre, quar aparissans seroit que bien vendroit à home de mal fere.

§ 34.

Uns meres fu morz ; li borgois (se) devisèrent en l'eslection : l'une partie eslut le fil au meor qui morz ère, l'autre partie eslut un borgois de la vile, et distrent contre l'eslection au fiz au meor qui [p. 43] morut, qu'il ne devet pas estre meres, com cil qui n'avoit pas escience ; et por ce que li droiz de l'eslection porroit périr, et por ce qu'il seroit aparissant que le droit de l'eslection alast par héritage. Li rois quasse l'une eslection et l'autre : cele dou fiz au meor, por ce que li droiz de l'eslection porroit périr en ce, por ce qu'il fu filz de l'autre meor ; l'autre, por ce qu'elle fut fete de la menor partie50.

Enten : lignages n'a pas leu en eslection de meor par droit commun, se prévilége ne li done. Et eslection en discorde fete de la menor partie n'est pas droite menière d'eslire.

§ 35.

Come l'en contençoit sor l'eslection de un meor, l'en dit que l'eslection soit quassée, por ce que li borgois de deus jornées d'iqui51ne furent pas semons ; et lor done l'en poer d'eslire52, et ce que la greignors partie et la plus saine establira, soit gardée.

Enten que pis vaut, en eslection, le despit d'un que contredit de mouz ; et cil qui est à deus jornées est apelez (à être) présens, et ce que li greignor et li meillor font, doit estre gardé53.

§ 36.

Come li meres de Saint-Quentin fust malades, li borgois mendèrent un lor borgois qui estoit hors, et nommèrent jor d'eslire. Emprès, li borgois trétièrent de le esliction, quant li meres fu morz, mès il n'ert pas encore enterrez : il eslurent Symon, per de la vile ; li autres qui ert somons, vint au jor qui li fu mis, et dist que li autre avoient perdu le poer d'eslire, com il avoient despit qu'il avoient esleu sanz lui, et avoient tresté l'eslection avant qu'il fust morz54, et avoient esleu avant qu'il fust enterrez ; et eslut Bernart. Et com les parties fussent devant le roi, li rois quassa l'une eslection et l'autre : l'eslection dou seul, por ce qu'ele ert fete avant que la première fust quassée ; et la seconde, por trois causes : por ce qu'ele fut fete avant que li meres fust enseveliz, et por ce que cil borgois fu despiz, et por ce qu'il fu trétié de ellection avant sa mort55.

[p. 44] Enten que quant la première ellection n'est quassée, l'en ne doit pas autre fere ; et quant meres est morz et n'est pas enterrez n'est pas bele chose de eslire meor ; et plus nuist en eslection le despit d'un que contredit de mouz ; et qui ne puet estre en eslection puet doner son poer à un de cels de la commune.

§ 37.

Pierres pria les borgois d'une vile qu'il vossissent qu'il fust borgois de la vile, por ce qu'il le feissent meor. Et le fisent borgois, et (le) fisent meor, et le présentèrent le roi. Et li rois sot ces choses, et quasse l'eslection por ce que ele ne fust pas fete de droit56.

Enten : nus ne se doit loer en tel quas.

§ 38.

Uns fu esleus à meor, et uns fut à l'eslection qui avoit esté geté de son païs por son forfet. L'en demende se l'eslection vaut ? et l'en dit que s'il fu geté de son païs por son forfet, dom il deust perdre la vie, le eslections ne vaut riens, com cele qui est fete de non digne persone, ne l'en ne doit pas tel home honerer. Mès s'il est hors de son païs por autres menuz forfez, le eslection vaut, com tel ne doit pas estre deshonoret57.

§ 39.

La vile de Ruan fu sanz meor ; li borgois devisèrent lor volentié en divers senz ; issit que li uns eslurent un borgois de la vile, et li autre requistrent le meor de Faloise. L'en demande qu'en dit droit ? et l'en respont que se li nombres des requéreors fust au double, la persone dou requis doit estre confermée, se ele est convenable ; et l'eslection doit estre quassée. Se li nombres des requéreors ne sormonte pas le numbre des esliseurs, le eslection soit confermée, et la requeste soit quassée, se il n'i a autre empêchement. Et se li nombres des requéreors est mere au double, et il ne soit pas digne, soit quassé et la requeste et l'eslections. Et se la mere partie ou toz eslisent à escient non digne, qu'il perdent por ce le poer d'eslire, et s'il est dignes, en cest quas soit confermée l'eslections58.

Enten que quant aucuns est esleuz, l'en doit enquere de sa vie à cels environ cui il a conversé. Et si li numbres des requéreors est au double plus granz que li numbres des eliseors, la requeste doit valoir.

[p. 45] Et quant aucuns eslisent néant digne à lor esciant, il perdent le pouer d'eslire.

§ 40.

L'en dit en cest chapitre59 que citez ne chasteaus ne doit pas estre plus de quarante jorz sanz meor, ne plus de huit jorz sans pers.

Enten que se dedenz celui jor ou tens n'est fete le eslection, li poer d'eslire est portez au roi ; et li rois li doit porver60. Et lonc tens ne doit pas nuire à cels qui n'ont poer d'eslire ; et aucuns d'autre vile ne soit pas esleuz en la vile, tant com l'en truisse persone convenable.

§ 41.

L'en dit ci61 trois choses : La premère, si est que, se vile est sanz meor, et tuit cil sont présent qui vuelent, et doivent, et puent bien fere le ellection, trois d'aus soient esleuz, qui enquiergent la volenté de chascun. Et quant il auvront ce escrit, lors le dient au commun, et soit esleuz cil à qui la greignor partie s'acordera, ou le poer d'eslire soit doné à aucun, que por toz porvoit cele vile. Et se l'eslection est fete autremant, ele ne vaut riens, se par la volonté d'aus toz n'est fete communémant.

En la seconde partie, dit l'en que nus ne doit establir procurator en ellection, s'il n'est si lonctans (lointain) en tiel leu don il ne puisse pas venir ; et lors à un des borgois de la vile porra bailler son fet.

En la tierce partie, dit l'en que élection fete en repost62 ne vaut riens ; que quant ele sera fete, si soit dite sollempnement.

Enten que ci baille l'en droite forme d'eslire ; et se aucuns apèle que l'en n'élisse segont la forme de droit, apiau ne vaut riens ; et cil qui n'est pas présens puet metre procurator por soi en eslection ; et élections reposte ne vaut riens.

§ 42.

L'en dit ci63 que se aucuns se consint à eslecciun fete de soi par [p. 46] poesté de clers, se eslection doit estre quassée ; quar ele est contre droit de cité ; et li esliz ne doit jamès estre esleuz à aucune honor sanz la merci le roi, et cels qui font cele eslection doivent estre en la merci le roi.

Enten que se aucuns consent élection fete de soi por poeté de clers, l'esleccions ne vaut riens ; et tel ne puet estre esleuz par droit à autre dignité sanz la merci le roi.

§ 43.

L'en dit trois choses en cest chapitre64 : l'en dit premièrement que se aucuns est esliz, cil à qui le confermement apartient doit examiner la menière de eslection et la persone de l'eslit ; quar se par négligence est aauciez65 home de poure escience, ou qui n'est pas d'ahage, ou qui n'est pas de bone vie, soit geté fors. Et s'il est seu que cil aient ce fet par malice, qu'il soient puni en la volenté le roi.

Ou segunt, l'en dit que li rois et li baron doivent ahaucier cels qui sont dignes as honors, s'il ne vulent estre blasmé.

En la tierce partie, dit l'en que quant aucuns est esleuz non dignement, cil qui est esleuz n'est pas puniz seulement ; mès cil qui l'eslit : et chascuns doit estre puniz en ce où il pèche, à la volenté le roi ; et que plus doit estre puniz cil qui pèche à esciant que cil qui pèche par folie ; et costume doit estre gardée en vile, cele costume qui vient de débonaireté.

§ 44.

Quant la vile de Bapaumes fu sans meor, li borgois despendirent moult en eslection. L'en demande d'on l'en doit ce paier ? et l'en respont que des biens dou commun de la vile doivent estre renduz les despans qui furent fet en eslection66.

Enten que li despans que l'en fet renables en eslection, doivent estre paez des biens dou commun.

§ 45.

Come uns fust esleus communaument de toz, la vile le présente le roi por confermer. Li rois, quant il ot enquis de la chose, quassa l'eslection ; quar emprès ce que l'en sot la volenté de chascuns, ne fut pas fete demenois67 l'eslection ; et por ce que, avant que l'eslection fust fete, requesirent la volonté de l'eslit68.

[p. 47] Enten que eslection est quassée, quant l'en eslit niscement. Et le consentement de celui que l'en doit eslire ne doit pas estre requis jusque l'eslection soit fete.

§ 46.

Come une ville fust sanz meor, dui Chevalier distrent qu'il devoient estre à l'eslection de celui meor ; la vile ne vost. Il apelèrent au roi, que l'en ne feist riens contre aus. Et comme il fussent devant le roi, l'en lor demenda por quel droit il devoient estre à esleccion de celui meor. A ce il respondirent qu'il i devoient estre, porce que li maires Guillaumes et li borgois de la vile lor avoient ostroié qu'il auroient voiz en eslection dou meor de cele vile ; dont li rois tint ceste raison por nule, et empose sor ce tésir à cez chevaliers69.

Enten que borgois ne puet pas aliéner la chose de la commune sanz le commandement le roi, ne mestre seignorie sur le droit commun.

§ 47.

Come la vile dou Pont-Audemer fust sanz meor, li borgois départirent leur volentés en divers lius : li un eslirent Phelippe, borgois de la vile ; li autre eslurent Guillaume, borgois de la vile ; li autre eslurent autres persones. Et com l'en eust assez plesdié de ce devant le roi, il quassa l'eslection Phelippe, porce que ele ne fust pas fete de la mere partie, et porce qu'il ne puplièrent et tindrent por meor après le apiau. Et l'eslection Guillaume fu quassé emprès, (porce) qu'ele fut fete enprès ceste que n'estoiet pas encore quassée70.

Enten que en eslection apèle l'en la mere partie dou chapitre, et cele mere partie qui est entendue de tost le chapitre.

§ 48.

Come une vile fust sanz meor, li borgois et dui chevaliers qui avoient en eslection voiz, jor fu mis à eslire. Li clerc de la cité disoient qu'il devoient estre en eslection, (et) furent receu en tel menière, que lor voiz ne vausist riens por droit ne por costume. L'en fist crestine (scrutinium) segont la forme d'eslire : dui furent esleu ; et por le contens l'en porta l'afere au roi. Li rois quasse ceste eslection, porce qu'il n'avoient pas esté esleuz de l'autre (la mere) partie de la vile, ne ne fust pas trové que le chapelain ne li clerc deussent eslire de droit, ains fut fete l'eslection contre la forme d'eslire, et despollent les esliseors ceste feiz d'eslire71.

[p. 48] Enten que aucun puent estre en eslection por requérance ; et double foiz fete, une chose amoine costume, bien n'i soit-ele pas receue, ne par lonctens maintenue ; et l'en doit metre jor à fere l'eslection.

§ 49.

Li rois sot que une vile ot fet convent à un évesque qu'il ne porrunt eslire mere sans lui. Li rois sot que droit d'eslire meor ne puet chaoir en main de clerc, et mende à cele vile que cele convenance ne soit guardée, et mande qu'il aient poer d'eslire celui qui sera profitables à la vile, et ensint qu'il le dénoncent au patron et à autres, s'il i ont droit72.

Enten que covenenz fet d'eslire meor, fete o clers, ne vaut riens, se ele n'est fete par la volenté le roi.

§ 50.

Come une vile fust vuide de meor, li rois manda as borgois que dedenz quarante jorz esleussent et ussent porveu à cele vile de meor ; et com jors fust mis à eslire, li borgois donèrent poer d'eslire à six, jusque une chandele fust arse ; et com cil eslisseor se fussent acordé en Symon, il quistrent conseil à lor compaignons. Et uns de lor compaignons respondi, que quant il auroit eu conseil, qu'il lor respondroit ; et cil eslurent, sanz atandre la response, celui Symon. Et com li aferes fust portez au roi, il manda à deus prodes homes, que s'il savoient que cil esliseor eussent tracté de l'eslection, que cil fussent requis de doner le conseil en l'eslection, et il ne le feissent, se la persone est convenable, que l'eslection soit confermée ; et s'il ne quistrent le consoil comme il le devoient fere, ou la persone ne fust pas convenable, qu'il dépiècent cele eslection. Et cil afere fust renvoiez de chief au roi, porce qu'il ne fust pas prové que le conseil à l'autre fust requis en tens convenable ; il quassent cele eslection, non pas por la persone ; mès por la menière d'eslire73.

§ 51.

Com une ville fust sans meor, li borgois furent assemblé entre aus por eslire, et com douze borgois se fussent consenti en Robert, qui estoit pers de la vile ; et dix-huit, et quatre procurator d'un qui n'i estoit pas eussent esleu Guillaume, borgois de la ville ; et com Guillaume eust plus et Robert meins, Guillaume fu esleuz de sa partie. Et cil qui avoient esleu Robert quidoient qu'il eussent eu poer d'eslire, por [p. 49] ce qu'il avoient esleu home sage, et il eslurent Robert et apelèrent au roi. Et quant les parties furent à cort, cil qui eslurent Guillaume requirent que lor eslections soit confermée, com cil qui plus en avoit à sa partie et com cil qui ert convenables ; et requéroient que l'autre fust quassés, com cil qui ert fete dou meins, enprès la premère eslections, qui ne fut pas quassée. Dont li roi mande au ballif, que se Guillaume est sages et convenables, qu'il conferme se eslection, et que l'autre soit nule, si que non, qu'il conferment Robert74.

Enten que por faute d'escience aucuns pert dignité.

§ 52.

Li pers d'une vile fust esleuz à meor. Une partie ala encontre, et comme il fussent devant le roi, l'en dit qu'il ne devet pas estre meres ; et cil qui ere jurez de la vile, et avoit alé encontre la costume de la vile, et cele costume ert saelée et escrite au seau le roi : com tex homs fust parjures, et tel home l'en ne doit pas honorer, et cil qui onques n'avet fet satisfacion à la vile. Et (de) ce demendoit l'enqueste, à savoir se ce estoit voirs, et se ce n'i valoit, près estoit dou prover, si comme il devoit, par soi et par guaranz, en champ et par bataille. A ce li pers respont, com il fust esleuz à per sanz contredit, il ne veaut que cele misse que l'en li dit soit sor lui, comme il soit aparissant qu'il se consentirent en l'eslection de lui fere per, et donc il puet estre meres. L'en demende qu'en dit droit ? et li rois respont que en eslection n'afiert pas bataille, mès inquisicion de la menière de l'eslit. Et por ce, s'il fu esleuz soutement ou sagement, ne laira pas li rois qu'il ne face enquerre de son afere ; et s'il est tex qu'il le doie estre, bien le soit ; et s'il est tex qu'il ne le doie estre, quassez soit75.

Enten que en eslection n'afiert pas bataille ; mès prove par tesmoinz et enqueste. Et li rois puet enquerre de la menière de l'eslection et de la vie de l'eslit et de ses mors, et se aucuns eslit non jutement, por ce ne pert pas li sires son poer.

§ 53.

Li borgois d'une vile recevoient les clers de costume, à eslire meor ; li rois deffent qu'il n'i soient receu dès ore en avant ; et [p. 50] s'en eslit qu'il i soient, que l'eslection soit nule, bien i ait costume encontre76.

Enten que l'eslection fete de clers, des choses laies, ne valent riens.

§ 54.

Antan que quant li borgois d'une vile sont en descort d'eslire, l'en les puet contraindre d'eslire : li quas est toz aperz77.

§ 55.

Uns fut esleuz, et l'eslections fut quassée, porce qu'il en dona loier qu'il fust pers, et par son seu. L'en dit ci que nus ne li en puet fere grâce fors le roi. Autre chose fust, s'il l'eust eue par symonie en tel menière qu'il ne seust ; et légièrement poit lors avoir miséricorde78.