II. De lois et de longue tenue1.

§ 1.

Lois est communs commandemanz de sages homes et consoil, et chastiemant des torzfez que l'en fet à escient et sanz esciant ; et est loi commun plégen de toute commune chose.

Il convient establir droit en ce qui est establi ou en ce qui avient sovant.

Por un quas, se il avient aucune foiz, n'establist l'en mie droit ; mès l'en doit plustost amener droit à ce qui avient sovant qu'à ce qui po avient2.

Loi a tel vertu qu'ele condampne, ele deffent, ele suefre, ele dampne les mausfétors3.

A toutes les foiz que aucune chose est fete por grever la loi, ce qui est fet ne vaut riens4.

Droit ne sont pas por chascun espéciaument, mès por toz5.

§ 2.

Je ne dote pas que li baillis ne puisse fere droit. Ne les lois, ne les establissemans as seignors ne puent pas estre totes escrites, que l'en puisse comprendre toz les quas qui avienent ; mès il soffit que l'en retiengne ce que avient aucune foiz plus sovent, et por ce doit l'en [p. 5] establir plus certainement de ce qui fut establi au commencement, par déclarement ou par establissement de bon prince6.

Tuit li article ne puent pas estre chascun par soi en loiz ou en establissemanz ; mès quant lor sentence est aparissanz en aucun quas, cil qui est juges doit jugier de chose semblable, semblable ; et ensint en doit l'en fere droit7.

Uns metres dit que toutes les foiz que une chose ou autre est amenée en loi, bone chose est de sostenir, ou par apelement ou par certaine juridicion, les choses qui tendent à un meisme profit8.

Ce que est receu contre reison de droit, ne doit pas estre tenu.

Nos ne devons pas siure rigle de droit en ce que [est] establi contre reson de droit.

Droit sol (jus singulare ; est qui est amenez contre raison, por aucun profit, par l'autorité de cels qui l'establirent.

Savoir loi n'est pas tenir les paroles de la loi ; mès savoir la force et le pooir de la loi. L'en doit apeler la loi si soef, que lor volenté de ce qu'eles volent dire, soit tenue.

Quant il a doutouse parole en loi, l'en i doit metre tel entendement qui soit sanz blasme ; meismement quant l'en i puet entendre la volenté de la loi de ce que ele veaut dire.

§ 3.

L'en ne puet pas rendre reison de tot ce que li seigneur establissent ; et por ce ne covient-il pas enquerre les reisons de lor establissemant ; et qui voudroit ce fere, mult i auroit de bestorné de ce qui est bien atorné.

Quant la loi done aucune chose au tens qui est passé, il n'est pas entendu dou tens qui est à venir.

L'en ne doit pas apeluer ce que est certainement apelué.

Vilene chose est, se l'en n'a toute la loi bien veue, de jugier ou de respondre por un petit de la loi, si l'en l'a veue9.

Nule reson de droit ne de bonté ne sueffre que nos menains à cruauté, contre le profit au pueple, ce que est establi por le profit.

Les premières lois sont tretes as derrenières, ne ce n'est pas novele chose.

[p. 6] Por ce que l'en a usé que des vielles lois sont tretes celes que vienent enprès, et toz jorz, convient que l'en croie la loi de ce que apartient et as persones et as choses, qui aucune foiz sont senblables.

Les lois fetes derrenières apartienent as premières, s'eles ne sont confrères, et ce est prové por maintes raisons.

Cil fet contre la loi, qui sauve la parole de la loi et conchie et déçoit la sentence de la loi.

L'en fait boisdie à la loi quant l'en fet ce que ele deffent ou ce que ele ne veaut pas.

Li princes n'est pas sus la loi, mès la loi est sus le prince ; quar il li donèrent tiel privilige comme il avoient10.

§ 4.

Quant nos ne avon eu en causes lois escrites, ou nos n'en usuns pas, garder covient ce que est tenu par bones mors et par costume. Et s'il i a faute par aucune chose, l'en se doit tenir à ce que est tenu de plus près ; et se l'en ne retrove costume en cest quas, l'en doit garder le droit qui est communs à toz.

Costume bien anciene est tenue à droit por loi, et c'est ce que l'en apele droit establi par bones mors ; quar com les lois ne nos tienent par nule autre cause que por ce que li pueples les a receues, por droit tendront tout ce que li pueples loa sanz escrit : c'est costume. Et il convient que li pueples esclaire sa volenté pour aider à la costume, que par aus, que par lor choses, que par lor fez, est-il tenu et gardé à droit que les lois soient abatues par désacostumance, non pas solemant par l'aide de celui qui fet la loi, mès par le taire et par le consentement de toz11.

Longe costume seaut estre gardée por droit et por loi en choses qui ne sunt pas escrites12.

Quant aucuns requenoist cotume de cité ou de province, ge di que l'en doit savoir se cele costume a esté confermée en jugement contredit13.

[p. 7] Cil droiz de costume est de si grant autorité et est si loez, qu'il ne est pas mestiers qu'il soit mis en escrit14.

§ 5.

Se l'en demande que viot dire la loi : premièrement doit l'en voir de quel droit la cité a usé çà arières en cest quas ; quar costume fet bien entendre la loi15.

Loys rois dit que costume doit valoir loi : quant aucune doutance ist de la loi, ele doit avoir l'autorité des choses qui tozjorz sunt jugies. Ce qu'est amené avant par folie, sanz reson au comancement, et enprès est tenu par cotume, ne deit pas tenir en autres quas semblables.

Acort de genz fit tot droit, ou besoing l'establi, ou costume le confirma.

Tot droit parmaint ou au gaagnier ou eu garder ou eu perdre ; si comme aucuns fet que aucune chose soit soe, ou que il garde sa chose, ou que il la met hors de sa main, ou que il la pert16.

§ 6.

Un home fist deux demandes contre un autre, et dist en l'une que c'est costume, et dit en l'autre que c'est lois ; et ofri ce à prover par soi et par guaranz, et par champ et par bataille ; et ses averseres fit encontre tiel ni con li deit. L'en demande : qu'an dit dret ? Et l'en respont que ci n'a pas gage ; mès li juges doit fere enquerre se c'est loi ou costume ; car loi ne costume n'est pas, s'el n'a esté longuement tenue an jugement contredit. Et loi et costume est chose que juges doit savoir ; et tes choses ne puent estre nues (mues ?) sans commun acort de bons princes.

Li bochier d'Orliens prennent sor chascune beste six deniers, et metent en une boete à défendre cels de lor borc contre autres genz. Li rois deffent que ce ne soit plus fet, car tel cotume amène plus content que pez, et est doumageuse au peuple.

Uns dit à un autre qu'il l'encharciroit un marchié qu'il avoit achetié, s'il ne li donoit quarante livres ; cil les li dona, et dit qu'il pot ce fere par loi et par costume. Et l'en deffent que ce ne soit fet, c'uns telz dons seit fez por fere domaige à autrui et par covoitisse, et est fet contre bones mors.

Costume qui est doumageuse à juridiciun ne puet tenir17.

§ 7.

[p. 8] Une coustume ert en un païs, que quant aucuns avoit deffié un autre de guerre por aucun forfet qu'il li avoit fet, si disoit qu'il poet aucun de son lignage ocirre qui riens ne savoit de la chose ; et ce voloit fere por loi et por costume. L'en deffent que ce ne soit fet, car lonctens tenir mauvese coutume ne apetize pas péchié, ainz le croist ; et trespassemant de bone costume amène péril de perdurable salu18.

Uns fit marchié à un autre par paroles acordées ; li acheterres demanda son marchié, li autres dit que, pour ce que il i a paumée, est marchié par cotume ; et il n'i ot point de paumée : que por ce veaut-il que li marchiez fust nus. L'en commande que li marchiez soit, que covenances acordées par bones mors font le marchié, non pas la paumée, et li cuers doit siure la parole ; et otroie l'en bien que qui voudra fere la paumée, qu'il la face, car paumée est sennefiance que l'en revest l'achateor par bone foi de marchié.

Une costume ert en un païs que l'en apeloit cels communément qui venoient oïr pleider pour juger. L'en deffent que ce ne soit fet, mès de plus sages homes de tot le païs face l'en jugeors.

Entent que l'en ne doit pas fol ne musart apeler à nul jugemant, ne à doner consoil19.

§ 8.

Costume ert en la cité de Roan, que nus ne poet deschargier avoir en la vile, se par le grié as borjois ne le faisoit. Li borgois distrent que il ne voloient que li rois il descharjast nus de ses biens pour vendre, ne acuns qui de lui les eust achetiez. Et l'en respont que li rois puet deschargier et vendre en la vile, come il ne soit mie entendu, qui done privilége en bone foi, qui soit doné au damage de celui qui le done et de celui qui achate la chose dou roi. Nous ne disons ore plus, jà soit ce que tiel costume soit contre naturel droit et contre naturel costume ; car se je vels user d'un droit contre aucun, aucun doit user contre moi de celui droit meismes.

Uns chevaliers tenoit un fié dou roi ; cil chevaliers voloit fere marchié en un leu où n'en avoit unques point eu en celui fié. Uns autres chevaliers aloit encontre, et disoit devant le roi que cil marchiez li estoit [p. 9] domageus au sien marchié qui avoit tozjorz esté por costume, et de ce estoit près d'atandre l'anqueste dou païs. A ce li autres respondi : com il tenoit ausi franchemant comme lui et plusors autres qui marchié avoient, il veaut aver marchié en sa vile. L'en demande qu'en dit droit ? Et l'en respont que de naturel droit l'en ne puet pas à home véer qu'il ne amande sa chose sans fere domage à autrui apresséemant ; dont l'en commande qu'il face le marchié à tel jor qu'il ne face domage as autres marchiez.

L'université dou païs avoient une confrérie et avoent seel et fesoent tailles sor aus, et cez deners prenient et metient en une boeste. Et quant aucuns de cele confrérie mesfesoit à aucun des confrères, li mestre d'icele confrérie en voloient tenir droit. Com de costume tuit sunt de la justice le roi, l'en demande s'il poeent ce fere ? Et l'en respont que non, et deffent l'en qu'il ne le facent plus ; car tiel costume est domageuse as seigneurs ; ne costume n'est pas tenable s'ele n'est commune ou establie par la bone volenté au prince.