XI. De haute devise des choses1.
§ 1.
La haute devise des choses est devisée en deus articles : quant li un sont dou devin droit, et li autre dou terrien. Dou devin droit sunt saintes choses et religioses, et les autres choses sunt dou terriens droit. Et nus ne puet fere fiance qui est dou droit devin. Et ce que est dou droit terrien est aucune foiz en biens d'aucun, et si repuet (se puet) estre que nus n'i a seignorie : quar choses de héritage, avant qu'il i ait eu (eir), sunt à nul. Cez autres choses qui sont par humain droit sunt privées, sunt à chascuns par soi. Unes choses sunt qui ont cors et autres que l'en ne puet atochier. Celes ont cors que l'en puet atochier par lor nature, si comme une terre, un home, or et argent, et trop autres choses. Celes sanz cors, que l'en ne puet atochier, si com sont les choses qui parmainent en droit, si comme est héritage, usage, obligacions. Ne ce ne fust pas à ce (que) les choses corporex sont en l'éritage ; et ce que l'en nos doit d'aucune obligacion puet l'en tochier, ausint comme home, deners : quar le droit d'éritage et d'usage et de obligacion est sans cors, c'est-à-dire l'en ne puet tochier. Et en tex numbres sont les droiz de teneoires, de citez et de viles, et l'en apele ce servises2.
§ 2.
Unes choses sont communes à toz par naturex droiz, et unes choses à toz par autre menière, et autres choses sont à nul et autres à chascun, que chascuns conquiert par diverses choses. Et celes choses sont communes par droit naturel, si comme est l'air, le aue contraint et la mer, et por ce li rivage de la mer3.
§ 3.
Petites perres, et perres précioses, et autres choses qui sont de la gravele, que nos truvon, sont nôtres. Donques nus n'est défenduz d'aler à la rive de la mer, por achoison de poechier, en tel menière [p. 64] qu'il ne face por ce viles ne maisons ou rivage : quar a (elles) ne seroient pas communes ausit com la mer, et c'et atabli de pescheors4. Li rois Phelippe et la reine Blanche dit : Tuit flueve, tuit port à bau prou (à peu près) sont communes. Blanche dit : li huages (usages) des rivages est communes par le droit de gent, si cum li fluves ; et i puet l'en sa nef ariver et ses cordes lier as arbres qui (i) sont nés, et séchier sa raiz, et destroser sa nef, et metre à terre sèche : chascuns puet ce fere, ausint comme il puet mener son chalant par le flueve. Mès cil (qui) ont desus lor teneueres, il i ont seignorie, et por ce sont li arbre lor qui i nessent ou rivage. Johan de Beaumont dit : Li seignor puent iqui fere solement meisons, et an sont segnor tant com li adefice dure, et quant il faut, si retorne tot en l'ancieine menière. Et se aucuns i fet mesons sanz commendemant, ele sera au segnor5. Unes choses sont communes à toz, et non pas à chascun par soi, si comme sunt moters, temples, chapeles communes as citez. Ne serf de communes des citez n'est pas propres à chascun par soi, mès à toz ; et por ce li rois escrit droit, que se li serf commun fesoient chose qu'il ne deussent, l'en la puet communément tormenter, non pas chascun por soi. Et por ce n'est pas mestiers que li franc home de la cité6 quierge congié au commun, s'il tret an plet aucuns des citiens.
§ 4.
Les saintes choses et les religioses sont à nul. Celes sont saintes choses qui sont sacrées apertement, non pas privéement : car se aucuns se fet fere aucune chose privéement, ale n'est pas por ce acomeniée meins ; et s'il i a adefice de aucun loi sent, et là où il dépièce, li leus remaint sent. Chascuns puet fere religios leu à sa volenté, et i puet mort enterrer, s'il veaut ; et en commun cimentière, maugré toz, puet l'en enterrier, et en autrui leu puet l'en lo cors metre, se li sires se consant et li leus est religieus, tot an pait-il amprès au segnor. Et acordée chose est que li leus est religieus, si com li rois l'ont tesmoignié7.
§ 5.
Li leus est tenuz por saint qui n'a garde d'injure d'ome ; et en forterece de saint leu dit l'en que li mur sunt saint. Et Johan de Beaumont [p. 65] en respondi droit, et dit que il convient deffendre que l'en n'i aport riens. — Cil leu sont seint qui sont publiaument desdié, soent en cité, soent en vile ; et l'en doit savoir que li leus est lors sainz, quant li princes le dédie ou qu'il li baille poer dou dédier. Et l'en doit savoir que une chose est sainte chose, et autre sacré : sainte chose est la sacré ; et la sacrée est ce où l'en met les saintes choses, et puet estre au privé édefice. Et sunt aucuns qui vuelent franchir celui leu par l'otroi dou seignor et par la reson de la religion dou leu ; et de ce nus ne puet oster la sentence. — Nos apelons propremant saintes choses, qui ne sont ne saintes ne dessaintes ; mès sont confermées par consécracion. Ausint com sont les lois, qui sunt apoïes et tenues par confermement. C'est saint ce qu'est confermé, tot ne soit-il sacrié8.
§ 6.
Blanche dit que ausit com ceaus que l'en adeffie sus la mer est privé, ausit ce que la mer souprent est commun.
§ 7.
Se aucuns viole les murs de la cité por i mal fere, il doit estre puniz à la volenté le roi. Li citien des viles ne deivent issir hors de la cité par allors que par les portes9.
