VIII. De droit de persone1.

§ 1.

[p. 54] Tout le droit don nos usons apartient à persones ou à choses ou à demandes. Come tot droit soit establiz por home, nos diron premièrement de l'estat as genz, et emprès por ordre, si comme la chose le suefre.

La bone devise de droit des persones, des gens, est tele que tot homes ou il sont franc ou serf2. Franchie est naturex poers que chascuns puet fere sa volenté, se droit ou force ne le défent. Servages est droit de genz, par quel aucuns est, contre nature, sougiez à aucune seignorie. Serf est apelé de servage que droit suefre, et de ce que li empereor et li roi soloient commander vendre les prisons, et qu'il fussent gardé sans tuer les3.

§ 2.

Li serf ont une condicion4. De frans, li uns sunt franc noble et li autre sunt fiz de franchi. Et li serf remeinent an nostre seignorie par droit de gent. Cil sont noble qui sont nez de franche mère et de franc père. Assez est se ele est franche quant li enfes (est) nez, tot fust-ele cuverte quant ele conçut, et encontre, s'ele estoit franche quant ele conçut, et quant à l'anfanté est serve, droit dit que li enfes est frans. Ne n'et pas encontre s'il est de mariage ou bâtart ; quar la chaitiveté la mère ne doit pas nuire à celi qui est en son ventre. Et por ce demende l'en se aucune feme serve enceinte et amprès est franche, et emprès est serve ou chacie de la cité, et ele enfente, se cil enfes est frans ou sers ? et l'en quide qu'il doit nestre frans ; et li sofit à celi qui est ou ventre, qu'il ait eu franche mère en icel tens5. Cil qui est ou ventre doit estre gardé ausint com cil qui est nez, à toutes les foiz que l'en parle dou preu de l'enfant : l'en le doit fere, tout ne valle-il [p. 55] riens à autre, quant il est nez. Ne li estaz ès femes ne doit pas estre sordeirez por letres, s'eles sunt fetes mauvesement, et an meins leus de nos droit est peor la condicion as femes que as homes. L'en demande à qui l'en doit compaigner hermofronditus, qui ot nature d'ome et de fame ? et ge respons : à la partie d'om il i a plus6.

§ 3.

L'en dit ci7 que si li enfes qui est nez au vivant au père, et riens n'en sot, a(est) droit fis. Car seue chose est que enfes puet estre parfet en sept mois, par l'autoreté Ypocras, qui fu sages hom ; et por ce doit l'en croire que cil qui est nez en sept mois de droit mariage, est droiz fiz. Se li sires apèle son serf de sa teste ou de larrencin, et il s'an sofre (s'enfuit), por ce n'est-il pas franc. Cil qui naissent contre nature, est menière de bestes, (ne) ne sont pas conté ou les frans ; et cil qui nest ou plus membres que n'est coutume, sera conté o les frans8.

§ 4.

L'en dit que se Johana a trois enfanz, l'en commande qu'ele soit franche, ele en ot un en premer enfantement ; au segont, un ; et au tiers, si en ot trois. L'en demande liquex d'aus estoit frans ? Quar quant la condicion estoit acomplie, la fame devoit estre franche. Et l'en dit que li dui derrenier nesquirent frans, quar nature ne sofre pas dui enfans ne trois nestre ensemble. Quar quant la feme commence à enfanter, la convenance fet que li enfes nesse de franche feme, qui emprès nest. Et se ele est franche par tel convenance : se ge done franchise à Berte en l'ore qu'ele enfantera, se la convenance est achevée par lui ou par autre, l'en dit par droit qu'ele estoit franche en l'ore quant ele enfanta ; dons est li enfes frans. Ausi sera se Johana enfantoit deus enfanz et emprès deus becons ; l'en ne puet pas dire que l'un et l'autre soit frans ; mès celui qui nest derrenier tant solemant est frans, et ceste chose apartient plus à fet que à droit9.

§ 5.

Li rois Loïs menda et commenda à ses baillis que feme franche grosse, damnée à mort, enfant auroit franc, et que l'en la devoit tant garder qu'ele eust enfant. Et à teles est deffenduz feuz, eue, à cele qui est grosse, enfantera franche persone.

[p. 56] Quant mariages est fet, et enfant i a, li enfes sont le père, et li bastart fiz la mère. Se aucuns est forsenez, il ne pert pas por ce sa dignité, ains li remaint sa chose. Home franc qui se vendi, franchi après, ne retorne pas en son estat qu'il renia, ains est de la condicion as serfs franchis10.

§ 6.

Geufroi de la Chapele dist : Se feme serve enfante au tens qu'ele dut estre franchie segont la constitucion, li enfes nest frans. Cil est apelez bastart qui n'ose nomer son père, ne montrer ; ou s'il le puet montrer, il ne lor lait voir (avoir), et ités sont apelez avoutre. La loi est de tele nature que cil qui ne nest de mariage, sige sa mère, se la loi ne li fet grâce. Nos devons celi tenir à franc (noble), qui est par sentance franc (noble), tout ait-il esté franchi : quar chose jugé ert receue por vérité11. Cil qui sont en ventre, par droit de cité, sont tenu por nez : quar il ont lor héritages ; et se feme grosse est prisse d'anemis, ce qui est né de lui est frans, quar la condicions dou père et de la mère ne doit pas nuire à l'enfant ; et se serve grosse est emblée, tot l'ait marcheant achatée léaument, li enfes qui est nez est ausi comme chose emblée. Ne n'an puet cil husage (usucapio) avoir. Autretel est que franchi soit en autretel droit comme sont cil qui ont patron, tant com li fiz au patron met à nestre. Patron ne puet fere noble celi qui dit qui a esté franchiz par avoiement que li patrons face12.

§ 7.

Une serve a enfanz de un franc home an mariage et enfante ; l'en dit que li enfes est demi-serf, et qu'il servira au segnor demi le tans ; et se li pères est serf et la mère est franche, et ele enfante, li enfes sera la métié frans et sers ; et segont la costume des Berriuns, ne part au roi fors Sente-Croiz et Sent-Ainan13. Et se serf et serve de deus seignories ont enfant, li enfant sont de deus segnories.

§ 8.

Cil establissement est tex, que nus ne puet apeler autre de servage, se n'est por soi ou por home dou lignage. Et doit aler par enqueste, se les parties se consentent ; et se ne se consentent, la chose ira par batalle ; et se aucuns dit qu'il ait franchi par conduction son serf, et la conduction li soit niée, ara-il en ce batalle ? oïl, se la chose qui [p. 57] retint ou serf est tele qu'il en doi batalle issir. Et li demanderres se puet-il changier, ne li apelieres ? oïl, s'il i a essoine parant, et se n'est parant, non14.