École des chartes » ELEC » LI SIXIESME LIVRES » II. De rendre conte de choses communes et d'autres.
[p. 152]

II. De rendre conte de choses communes et d'autres.

§ 1.

Li commun d'une vile font une assise sor chascun une porcion de deniers, et fere le devoient. Uns borjois de la communie receit cele chose ; enprès, quant il a receu, si vient rendre conte de cele chose. L'en demende comment il porra rendre conte à fin. Et l'en dit que il face le ban crier ; et quant li bans sera criez, et il doit conter à cez qui i vandrant, por qu'il soient douze persones nécessaires ; et tex contes est à fin, et ne n'en puet-an rapeler, se l'en ne la rapele dedanz l'an et dedanz le jor. Il convient i noncier que l'en n'ait pas conté la chose que l'en demende.

Et se aucuns dit qu'il ait conté la chose que l'en dit qui n'est pas contée, ou qu'il a bien contée la chose que l'en dit qui est mal contée, et il offre à prover par soi et par garanz, et la commune face encontre tel ni et tel deffense comme il deit : l'en demende se de tel chose puet nestre bataille. Et l'en dit que nenil ; ainz sera el recort de cez qui auront esté au conte ; car bien est avenant que communs seit plus creuz [p. 153] en la chose de la communauté, que un, ne que deux qui seront de la communeté ; et tel chose det estre fete par serement.

Et se aucuns sergenz dit qu'il a conté à son seignor d'aucune chose que ses sires li demende, que li sergenz quenoist qu'il a receues, que li sergenz offre à jurer qu'il li a conté, et cil fet encontre tel ni et tel deffense comme il doit : l'en demende liquex seremanz vet avant. Et l'en dit que li chois vet au seignor, qui ne quenoïst pas le conte. Et se li sergenz offre à jurer par soi et par garanz, que il li ait paié et conté, et cil fet encontre tel ni et tel deffensse comme il doit : l'en demende se de tel chose puet nestre bataille. Et l'en dit que oïl. Et se li sires quenoist le conte, et il dit que l'en ait mal conté, et die de quoi, et l'offre à prover par soi et par garanz, et li autre fet encontre tel ni et tel deffense comme il doit ; l'en demende que dit droiz. Et l'en respont : quant contes queneuz est, que en tel chose n'a que sormise, et qu'il n'i a que prove, et li chois est à celui à qui l'en demende la mesprison. Et se li sires dit qu'il ne l'ait pas conté vingt sol qu'il a receu d'un home et l'offre à prover par soi et par garanz, qui furent au conte d'aus deus, et cil fet encontre tel ni et tel deffense que si a : l'en demende se par ces paroles nest bataille. Et l'en dit que cil est loisanz de prendre la preuve de lui et de ses garanz, ou de contredire que c'est voirs, ou d'escondire vers un des garanz par gaige de bataille.

De cetui droit don l'en use contre serganz, doit l'en user d'autel contre compoignons.