VII. De porter mort en autrui leu [rubr.]

Cil qui despant aucunne chose por mort, li mor li est tenuz ausint comme s’il eust fet marchié o li, non pas o son heir.

Aristo dit que li leus est religios où li serf est morz et enterrez. ¶ {1} Cil qui mist mort en autrui leu ou metre li fist, il est tenuz de aucion de fet. Nos devon entendre « autrui leu » se c’est autrui champ ou en [63rA] autrui edefice. Et ceste parole done aucion au seignor, non pas à celui qui tient en bone foi, car quant il dit « en autrui leu », il fet mencion do seignor à qui le leu est. ¶ Et se le fruitier li porte, il sera tenuz au seignor de la proprieté. ¶ L’en demande se le compoignon est tenuz s’i le porte en la partie au compoignon ; mes il est voir que il puet estre trez de aucion de departir communauté en plet ou de choses à mesnie. ¶ {2} Li prevoz dit : si home mort ou ses os sont portiez en leu qui est autrui ou en sepulcre où il n’a droit, cil qui a ce fet sera tenuz de aucion de fet et sera tenuz de poine de deniers. {3} Et li prevoz entendi de celi qui est portez, que l’en fet por enterier. ¶ {4} Li leus est dit pur qui n’est ne seinz, ne sacrez, ne religios. ¶ {5} Sepulcre est où cors ou os d’ome sont mis. ¶ Celsus dit que li leus qui est donez à sepulcre n’est pas tot religiou, ne mes tant comme li cors en tient. ¶ {6} Monumanz est qui est fet por remembrance. ¶ {7} Se aucuns i a son fruit ou son usage, il ne fet pas le leu religios. Et se li uns i a l’usage, li autres la seignorie, il ne feront pas le leu religios se cil qui lessa l’usage ne porta par avainture le cors en celui leu quant il ne le peust bien metre aillors ; et issi le dit Julien. Autremant ne sera pas le leu religios contre la volenté au fruitier, mes bien le sera s’il consent. ¶ {8} Nus ne fet le leu religios qui doit servise se cil ne s’i acorde à qui l’en doit le servise. Et s’il ne puet user de servise moins bien par autre leu, il ne puet ce fere por empechier le servise, et por ce ne sera pas le leu religios ; et c’est bien reson. ¶ {9} Cil qui a le champ engagié, s’il i mest un serf mort, il le fet religios ; et ausi est s’il i est enterrez, mes il ne le puet pas ostroier à autre.

Et par l’acort de toz puet l’en bien dire que li leus est religios ; et issint le dit Ponponius.

Cil qui mist mort en autrui leu est tenuz de oster le ou de rendre le pris que il va[63rB]ut por aucion de fet qui avint à l’eir et contre l’eir et est pardurable. ¶ {1} Li contes done aucion de fet contre celui qui a porté mort en autrui here de pierrele1, que li morz n’estoit pas oncore enterré, car il n’avoit pas bien fet.

L’en demande se li sires puet oster les os ou le cors que un autre met en sa chose sanz commandemant d’evesque ou de prince. Et Labeo dit que il doit atandre le roi, l’evesque, ou le commandemant au prince, si que non l’en avra aucion de injure contre celui qui le cors feret desfoir. ¶ {1} Se l’en venst leu religios por peor, li prevoz done contre lui aucion à celui qui la chose apartient ; et ceste aucion est contre l’oir ausi comme cele qui contient aucion d’echat. ¶ {2} Se aucuns mest mort en leu establi à communs usages, li prevoz done juigemenz contre lui s’il le fet por barat et en devra bien estre puni par reson. Et s’il le fist sanz barat, il en est quités. ¶ {3} Et en ceste aucion apel de leu pur est atandu à edefice. ¶ {4} Ne ceste aucion n’avient pas solement au seignor, mes à celui qui a l’usage de tel leu ou aucunne servitute, car il ont poer de deffandre lo. ¶ {5} Aucion de fet avient à celui à qui l’en a deffendu que il ne portast le mort en celui leu où il avoit droit de porter lou ; et deffanse li avient se l’en ne li a deffendu, et son procurator a autele aucion car l’en antant que l’en li a ausi deffendu.

Se aucun a sepulcre et il n’i a pas voie et li voisin li deffendent que il n’i auge, li enpereor dit que il doit demander sa voie et que il la doit avoir, et que il l’et de celui qui a son champ ajoint. Et c’est commandemant qui ostroie que l’en demant la voie d’une aucion de cité ; et li prevoz doit contendre par droit pris que il face la voie, par si que li juiges voie la voie, que li voisin n’i soit perdant. {1} Le senator establi que usages de sepulcres ne soit conchiez par changes, c’est à dire que il ne soit mis en autre usage. ¶ {2} Li prevoz dit que se despans est fet par acheson de mort, je commanderoi que cil rende à qui la chose apartient. {3} Cest ban est proposez por droite cause [63vA], que cil qui fist le despans por le mort que il en ait ce que il i mist ; car autremant remainsissent les cors à enterer, et que aucun ne feist despens d’autrui. ¶ {4} Il convient que cil face le despens que le mort commanda et eslut. Et s’il ne le fet, il n’i a point de poine, se aucun molumant ne li est por ce lessiez ; et lors s’il ne fet la volenté au mort, il le doit perdre. Et se le mort n’en parla, cil qui fet le despens ne doit rien avoir et celui lessera as hers ; et s’il n’en i a nul, il sera à coisins et à plus prucheins. ¶ {5} L’en juige despens à mort segont ce que il a et segont la digneté. ¶ {6} Li prevoz ou li mestres doit juigier quex despens l’en doit fere por mort ; s’i i a deniers en l’eritage, s’il soit fet de deniers. S’il n’en i a, s’i vende des choses qui ne sont pas boens à tenir et qui chargent l’eritage. Et s’il i a or ou argent, l’en commandera que il soit venduz ou angagié por fere le despens.

Ou s’il i a detors, s’il pueent rendre maintenant.

Et se aucuns empeche celui qui achata que les choses vendues ne li fussent baillies, il convient que li prevoz i doit metre conseil et que il deffende ce fet se nul vient encontre. ¶ {1} Se cil qui est morz est coitiver2, ne il n’i a dont l’en li face les despens de sa mortaille, Ponponius dit que l’en li doit fere son despens de ce que il a en sa meson ; et s’il i a rien de remanent, que il soit rendu por ce que il doit de son ostel. Et se cil qui fist le testamant lesse choses et l’en pledoie des despens de sa mortaille, ne il n’i a de quoi l’en les puisse fere, il convient que l’en mete ses mains en ces choses lessies ; car plus vaut que li morz soit en voriement mis en terre do sien que autres eussent les lés et il i fust à honte mis. Et se li heritages est aprés demandez, l’en ne doit pas tolir à l’achateor la chose, car il la tient en bone foi, et ait la seignorie cil qui l’achate par l’autorité do juige [63vB]. Mes il convient que cil à qui l’en fist le lés ne perde pas son los dou testemant se li her l’en puet garder de domage ; et s’il ne puet, miauz vient que cil à qui l’en fist le lés perde que li achateor i ait domage. ¶ {2} Se cil qui fet le testamant manda à aucun que il face les despens de sa mortaille, et il prant l’argent ne n’en fet rien, l’en dit que l’en doit doner contre lui aucion de tricherie ; et je croi que li prevoz le doit forcier à fere le despens. ¶ {3} L’en voit que li despens est fez por mortaille sanz qui l’en ne puet le cors enterer, ausi comme se l’en a rien despendu por le cors enterrer et por le porter. Et se l’en a rien doné por lui la où il fu enterré, Labeo dist que c’est despendu par acheson de la mortaille ; car à force convient que li leus soit aparelié où li cors est mis. ¶ {4} Le despens que l’en fet d’estrange cors de home mort por son cors portier doit estre rendue, tot ne soit encore le cors mis en terre. Et ausint est s’il est baillié à garder ou an commande, ou se l’en despent rien en sarcuez ne en taille. {5} Car ce convient metre ou les cors, ne n’i convient metre plus que cil autre home povre i metent. ¶ {6} Ceste aucion qui est de mortaille est de bien et de lëauté, et si contient en soi despense. L’en regarde equité de la digneté à celui qui est enterré et le tens et la cause et la bone foi ; que l’en ne conte plus que l’en a despendu, ne que tant comme l’en a despendu, ne que tant comme l’en a fet. ¶ Se l’en a plus despendu que l’en ne doit, l’en doit regarder le chatel au mort et comment il est alez ¶ et la chose qui est despendue sanz reson. Et que sera se l’en a despendu aucunne chose par la volenté au mort ? L’en doit savoir que l’en ne doit pas segre la volenté au mort se l’en fet desreson de despandre, car l’en doit fere le despens segont le chatel.

Celsus dit que quant la feme muert l’en li doit fere sa mortaille dou doere qui remoint [64rA] à l’ome et des cez autres biens que la feme avoit.

Et issi convient il le mariz et l’eir despendre en la mortaille. {1} Le mariz ne sera pas plediez de ceste aucion s’il rent à la feme son doere, et ausit comme Marcellus dit ; et c’est voir en cet quas, où il lust ce fere par loi3. {2} Et encore cuide je que li mariz est tenuz de ceste aucion de tant comme il en puet fere, car il est veü tant gaagnier comme il à la feme rendit s’il en fust trez en plet.

Et s’il n’i ot point de doere, il convient que li pere à la fame i fust tenuz de fere despans commun, si comme Ancillinus dit, ou metre hors de ban les hers à la feme. Et s’ele n’a nul heir, ne li peres n’a que poer, il convient que li mariz face tant comme il en porra fere de despens que sa feme ne remoinge à este enterree.

Se feme enprés ce que ele est departie de son mari, et ele est a autre marié, et s’il muert, Fulcinus cuide que le pretre et le doere et que il face despens de mortailles.

Se cil qui tient l’eritage fet le despens de la mortaille et il ne demande pas ce que il a despendu, ceste aucion li est bone. ¶ {1} Se li ons et la feme morent en un moismes tens, Labeo dit que l’en doit doner ceste aucion en l’oir à l’onme segont sa partie par ce que il a ce en non de doere.

Se aucun est heir et enprés li est l’eritage tot let comme à celui qui n’est pas digne, droiz est que li droiz de l’eritage li remainge quant a despans.

Li ancien ne cuiderent pas que l’en deust plorer celui qui vet à destruire et ses enfanz et son poïs ; ausi comme se li fiz eust ocis son pere, ou le peres le fiz, sanz felonnie, il establirent que cel le comparast.

Quant guerrier ont pris leus, il ne sont plus sainz [64rB] ne religios, ausi comme l’ome franc devienent serf ; et s’il sont delivré de ceste chestiveté, il revienent arieres en l’anciene franchise.

Nos entendons despens de mortaille quanque l’en despent por le cors, si comme pour oignemanz, por le pris de la terre où il est enterré, et de sarcuez et la voiture ; et quanz l’en i metra de despens avant que il soit enseveliz, je cuit que tot ce est despens. ¶ {1} Divus Adrianus dit que c’estoit monument de sepulcre quanque l’en i despant por fere le leu où li cors est mis ; et se cil qui fist le testamant commande fere aucunne chose, si comme un porche ou un edefice, ce n’est pas dou despens de mortailles.

Cum aucun est enterré en divers leus, l’un ne l’autre leu ne est pas religiou, car d’une sepulture ne puet l’en mie fere plusors sepulcres. Il m’est avis que cil leu est religios qui est fez principaument par cors enterrer, dont l’image i est por qui nos somes coneuz. {1} Quant l’en ostroie que reliques i soent portees, li leus est religios.

Li despens de la mortaille doit estre fet toz jorz de l’eritage, et i doit estre li despens avent que l’en rende rien quant li heritages ne puet rendre les detes.