§ {13.4.1} Gaius. Alio.

Il est apparissant que aucun ne puet pas demander chose en autre leu que la où ele fu promise. Et por ce que c’estoit iniquité se cil qui promist ne venist en leu où il avoit promis, s’i le fet à escient ou s’il le convenoit à force estre aillors et por ce ne poet venir en leu, por ce que acordé fust que l’en donast bone aucion en ceste chose.

§ {13.4.2} Ulpianus. Arbitraria.

Aucion arbitrere contient le preu de l’un et de l’autre, tant de l’autor comme de reus. Et se li reus i a domage, la condempnacion sera de moins que li plez ne fust ; ou se c’est à l’autor, la peccune sera creue. ¶ {1} Ceste aucion vient de ceste promesse, ausi comme se tu promez à doner .x. solz à Orliens. ¶ {2} Se aucun pledoie à Paris por .x. solz ou por un home que l’en li promist, il n’an puet pledoier aillors ; que reus ne prende1 le preu de ce leu. {3} Scevola. Non utique2. Les choses qui ne sunt pas nomees en promesses ne sunt pas toz jorz am poer au reus, mes ce qui doit estre en la volenté ou n’i doit pas estre, et por ce doit l’en esgarder le leu. ¶ Qui promest Tebert ou Gaubert, il puet choisir qui il rendra ce que il vodra tant comme il vivent ; et puis que li uns est morz, li chois est passez, ne il n’est pas en son chois quant il ne veust rendre le vif qui doit solement. Et por ce, cil qui promist à Paris ou à Orliens, il fust en son chois que il fust demandé la où il vosist, il n’i puet estre enpledié, ainz porra toz jors eslire un autre leu ; et issi avandra il que il sera à son chois s’il doit ou non ; par ce cuide l’en que l’en li puet demander en autre leu sanz nomer le leu, et issi nous devons à l’autor chois de demander. Et Scevola dit generaument que li demandeor doit avoir le chois de la où il demandere ; et reus3, de la où il redra, avant la demande. Par ce sera meslé4 le change des choses [69rB] au change des leus, et por le besoing fet il chois à l’autor, et por la chose ‹et› por le leu ; si que non il veust tolir l’aucion quant il veust garder au reus s’opinion. ¶ {4} Se aucuns promet à rendre à Paris et à Orliens, il fet que cil en puet demander en ce .ii. leus partie de la chose. {5} Se aucuns promet à fere une meson ne ne dit pas le leu, la promesse ne vaut riens. ¶ {6} Se aucuns promet à rendre .x. solz à Paris, s’il en plede avant le jor que il puisse venir à Paris, il fet que fos, car Julianus cuide que li jorz est entenduz en ceste promesse. Par ce cuide je que ce soit voir ce que Julien dit, que celui qui promet à rendre à Rome et hui promet rendre à Lion, il ne doit rien. {7} Oncor dit Julien : cil qui promist à rendre à Tebert à Paris, s’il le rent aillors, por ce ne remoint pas que cil ne puisse demander ? Et Julien dit que il n’est pas delivrés et par ce puet il demander son domage. Celsus dit autrement que Julien, et que l’en puet dire, se l’en rent aillors, cil est delivrés, comme il ne reçoive mie cele chose contre ma volenté ne forcie ; pleinement, se cil n’est delivrés, je puis demander tote la dete ; ausit comme se aucun eust fet une meson aillors où il ne promist, il n’est en rien delivrés. Mes il m’est avis que il a difference en rendre peccune et en fere meson, et por ce ne puet demander fors le domage que l’en i a. ¶ {8} Or devon parler de l’ofice au juige de ceste aucion, de la grandor dou marchié, s’il doit monter ou bessier ; que se reus fust à Paris, il eust miauz rendu que la où il fust tret en plet, ci a reson. Julianus segui l’opinion Labeonis et ot ausi la reson à l’autor que il puet avoir aucunne foiz domage se l’en li rendi à Paris. Et ausit doit l’en regarder le preu au demandeor. Et que sera s’i baille peccune à porter et à recevoir la à Paris sor poine par gages et li gages sont vendu et la poine est commise par ta demore ? Ou se aucunne chose est deue à la borse l’enpereor et la chose à celui [69vA] qui fist la promesse est rendue ? ¶ En ce regardera l’en le domage que l’en i a, et outre lëau mesure de usures. Que se cil soloit achetier marchandie, s’il doit demander le gaing que il eust fet ? Et je cuit que il doit avoir reson non pas solement de domage mes dou gaing que il poet avoir eu.

§ {13.4.5} Paulus. Si heres.

Se cil qui fist le testamant commanda à son heir que il rendist aucunne chose en certain leu, il i avint aucion à plesir.

§ {13.4.6} Ponponius. Aut si.

Ou s’il enprunte deniers por rendre les an certain leu.

§ {13.4.7} Paulus. In bone.

Aucion de achest ou de vente ou de chose baillie à garder est en juigement de bone foi s’il est en convent en marchié que la peccune soit rendue en certain leu, ne aucion à plesir n’i a leu. Et s’il promist à rendre en certain leu, il usera de ceste aucion.

§ 1.

Il est aparissant que l'en ne puet demender chose que là où ele fu promese ; et por ce que c'estoit iniquité que cil qui promist ne venist en leu où il avoit promis, fu acordé que l'en donast bone aucion contre lui.

Ceste aucion vint de tel promesse, aussi comme se tu me promeis dix soz à rendre à Orliens, tu ne les me doiz pas rendre à Paris ; car je perdroie le profist dou leu où tu les me devoies5.

§ 2.

Se aucuns promest à rendre à Paris et à Orliens, il fet que l'en li puet demender la moitié à Paris et la moitié à Orliens.

Et se aucuns promest à fere une meson et ne dit pas le leu, la promesse ne vaut riens.

Se aucuns rent à Paris et il doit à Orliens, l'en ne li puet riens demender ; car il n'i fist pas force ne peur.

§ 3.

Se cil qui fist le testament promist à rendre en certain leu, sis heirs r'est tenuz. Aucion d'achat ou de vente ou de chose baillie, a juigement de bonne foi6.

§ 4.

Uns promist à rendre à Orliens ; li créanciers dit qu'il promist à rendre à Paris, et l'est prez de monstrer et de l'avérer par soi et par garanz, qui en fere lo tierz plus. Et li detés fet encontre tel ni et tel deffense comme il doit. Et l'en respont que l'en doit regarder où li marchiez fu fez : s'il fu fez à Orliens, cil qui demende s'en passera, contre le créancier et contre son garant, par sa prove ; s'il fu fez à Paris, li chois de la prove est au créancier ; car en tel chose n'a pas bataille.