VI. ‹De mesureors›

Li prevoz done aucion en fet contre le mesureor des chans, car il ne convient pas que il nos deceue s’i est contenz par aucunes des bones ou se le vendeor ou se l’achateor volent savoir combien le champ tient. Et por ce mist il avant ceste aucion, car li encien ne crurent mie que loange fust entre tex persones, mes san plus entendre en leu de benefice, et ce que l’en li done sera por li regar doner, et par ce l’apele l’en honore. Et se l’en a aucion de loage, l’en puet dire que ce ne vaut rien. ¶ {1} Ceste aucion requiert solement male tricherie. Car assez est que l’en contraigne le mesureor s’il fet barat à celui home qui n’est pas vers lui obligiez ; et s’il en est travaillez par le barat au mesureor, bien si gart que tel barateor i mist. Et se li sires le fist par negligence, le mesureor n’a garde, bien i gart sa grant colpe ; car c’est ausint comme barat. Et s’il en prist loer, tote la cope n’est pas soe por les paroles dou ban, car li prevoz set bien que il i a loer. ¶ {2} Il sera tenuz de ceste aucion quil le renia ; et asez renie por soi qui par autre renie.

Ou par lestres. {1} Et se je mande qui es mesureor que tu mesurasses ce champ, et tu le mandas à Tabert, et cil i fet aucun barat, tu en seras tenuz, car tu feis barat qui à tel le mandas.

Se je le mande à .ii. et il font enbedos conchiement, je porrai contre aus .ii. pledier por le tot ; et se li uns fet gré, li autres est delivrés. ¶ {1} Ceste demande avient à celui à qui il ne convient pas que la fause mesure fust fete, ¶ c’est au vendeor ou à l’acheteor à qui ce nuit. ¶ {2} Ponponius dit que se l’achateor done plus à vendeor por le reniement1 par ce que il en pot pledoier par ce que il en a plus doné, il n’en puet pledier ou le mesureor ; car il ne nuit rien à l’acheteor quant il en puet pledier ¶ li pledeors quant il ne randi ce que il devoit ne fu pas vendeor, et lors ne sera pas tenu le mesureor. {3} Et se le vendeor li baille greignor mesure, et li mesureors le conchie, Poponius dit anprés que l’en n’a pas aucion contre le mesureor ; car l’en n’a aucion de vençon contre l’achateor, se l’achateor n’est rendables. ¶ {4} Ponponius dit que se le mesureor i est mis par droit et il me triche, il m’est tenuz se je an perte plus par droit. Et se li juiges li a mis et il me conchie, Ponponius dote s’il est tenuz à moi de ce, car il i pert le plus. ¶ {5} Ponponius dit que l’en doit doner ceste aucion à l’oir et à itex persones, mes ele ne doit pas estre donee contre les heirs ne contre itex persones. {6} Et en non de [62vB] serf convient que l’en ait aucion de forfet, ja sé ce que l’en est aucion droite de chatel.

Ceste aucion dure toz jorz, car ele prant commoincement non pas de conchiement mes de l’afere qui est commoinciez.

Se le mesureor ne dit pas fause mesure mes il la retarde2, et por ce avient que li vendeor est delivrés, car il promist que il assigneroit mesure dedanz certain jor, ceste aucion n’a pas leu. Et dit Ponponius que il ne doit pas avoir autre ; donc convendra il qu’i et recors à aucion de tricherie. ¶ {1} Com l’en eust recors de fause mesure et li achateor eust pledié o le vendeor, il en porra pledier o le mesureor ; mes il n’en a de ce que fere, car il ne convient pas condempner le mesureor. Et s’il plede o le vendeor de ce qui estoit mien tot et anprés de mons, Ponponius dit que l’en puet pledier de remenant o le mesureor. ¶ {2} Li prevoz entendi ce droit plus largement, car s’il recorde fause mesure d’aucun ne autre chose, ceste aucion li avient. Ausi comme s’il le detint en mesure de edefice, ou de mesure de forment, ou de vin.

Ou de lesse de voie ou de servité mestre ou oster, ou s’il i mant en mesure .i. ere ou un chevron ou une pierre.

Ou d’aucunne autre chose il sera tenu ; {1} et se li mesureor l’a deceu, l’en li donra ceste aucion contre lui. ¶ {2} Et encore, dit Ponponius, ce moismes contre celui qui ne fu mie mesureor il le deçut, l’en a contre celui ceste aucion. {3} Et ausint contre le mestre qui fist la meson qui deçut le seignor, car li enpereor le commanda. {4} Et ausi cuide je de l’osteler qui conchia son oste à contier.