XIV. [68vA] De aucion de chose qui est rendue sanz cause [rubr.]

La meniere de ceste demande sera tele : que se aucuns promest sanz cause ou rent chose que il ne doit pas. S’il promest sanz cause, il ne puet pas demander tant comme la chose se monte que il n’a mie rendue, mes il puet demander l’obligacion moismes. {1} Et s’il promet por cause et la cause n’est pas segue, l’en doit dire que l’en puet demander ce que l’en a doné. ¶ {2} Se l’en a promis au commoincement sanz cause ou s’il i ot cause de prometre qu’i n’est pas segue, l’en puet dire que l’en puet demander. ¶ {3} Se aucuns puet demander à autre ce que il a eu sanz droite cause, ou s’i l’a doné por torte cause.

Se li felons baille ses vestemanz à laver et à polir et enprés que il les a perduz il rent au seignor par plet le pris que il valoient, et enprés li sires trove la robe, l’en demande par quele aucion cil puet demander la peccune que il a perdue. Et Cassius dit que il ne puet mie solement pledier ou le seignor de loage, ainz puet demander au seignor ce que il a rendu ; et je cuit que il a aucion de loage. Et l’en demande s’il puet demander cel argent. Car il rendi chose que il devoit, mes que tant i a qui rendi sanz cause ; por ce que la robe fut trovee, puet il demander ce que il i bailla.

[68vB] Cil qui sont obligié sanz cause ont aucion de chose qui n’est mie certaine, et la puet demander por fere que il seent delivrés.

Ne monte rien se aucunne chose est donee au commoincement sanz cause ou se la cause por quil ce fust promist ne fu pas segue.

Cele qui se devoit marier dona à l’ome peccune en doere, ne ne se maria pas ; l’en demande s’ele puet cel argent demander. Je dis por la ribauderie de cele qui done et de celui qui reçoit, se li denier sunt numbré l’en ne les pot demander ; et en tel jeu en a le meillor cil qui tient. Et segont ceste reson aucun dit que la feme ne puet demander rien de cele chose ; mes je cuit que la chose n’est pas lede, car ele ne fu nule, car li doeres fu nul comme cele peccune fu donee por mariage non pas por fotre. ¶ {1} La marrastre au fillastre, la bruz au serorge, donerent peccune en non de doere, ne il n’i ot point de noces ; il est veü que il n’i a point de demande, car entre tex persones lor assenblee est nule car il i a avotire ; et plus, et por ce que il n’i ot point de cause de doere, l’en le puet redemander s’il est doné.