XI. De convenances fetes don la cause n’est pas segue [rubr.]

Se l’en done deniers por fere chose qui est honeste, que autre fust mis hors de ban, ou que le serf fust franchi, ou se l’en lesse le plet, se la chose est segue, l’en ne puet les deniers redemander. ¶ {1} Se je te done .x. solz por la convenance tenir, et de maintenant je la lesse por l’eritage demander ou les lés, ‹…›.

Je te done ma peccune que l’en ‹n’› alast en plet ; je demant, se je puis demander la se l’en ne me done caucion que l’en jauge, se l’en ne me promest que l’en jauge. Et il est voir que il ja fiert mult savoir se je donoi l’argent solement por ce que l’en ‹n’› i alast, ou se l’en me doit prometre que l’en ‹n’› i irra1 pas, la condicion cesse tant comme l’en ‹n’› i vet. ¶ {1} Ausi sera se je te done .x. solz por franchir Tebert, et segont ceste devise l’en porra redemander ou deffendre le. ¶ {2} Et se je te done .x. solz por franchir Tebert, se tu ne le fes je le puis demander [66vA], et se je m’an repant, je le puis lessier. {3} Et se je lesse doing ci issi que cil fust franchiez dedanz certain tens, se li tens ne passe, je ne le puis demander se je ne m’en repant ; et se li tens passe, je le puis demander. Et se Tebert se muert, l’en demande se je le puis demander. Et Proculus dit que s’il muert enprés celui tens que il puet estre franchiz, l’en puet demander ce que l’en m’a doné, se non non. ¶ {4} Et se je ‹ne› te donoi por franchir celui et tu voloies bien que je te donasse, tu avras contre moi aucion ; c’est que tu me poeras demander ton loier, tot soit celui mort que tu franchis. ¶ {5} Se franc home qui me servit en bone foi me done deniers que je le franchise, et je le fet ou faz, et enprés est prové que il est franc, l’an demande s’il me puet demander l’argent. Et Julianus dit que oïl. Neraces reconte que Paris Pantomimus redemanda à Domicia fille Neron .x. besanz que il avoit donez por soi franchir, et les li fist li juige avoir, ne ne fust il pas demandé s’ele prist l’argent s’ele savoit que il fust franchiz. ¶ {6} Se aucun comme franc me done .x. besans, comme l’en ne li eust pas commandé, que il donnat .x., Celsus dit. {7} Se le serf à qui l’en commanda que il rendist .x. besans à l’oir et que il fust franc, et fust franchi puremant, et ce serf ne set rien et done à l’oir .x. besans, l’en demande s’i les puet redemander. Et il dit que Celsus ses peres cuide que il n’es poist pas redemander. Mes Celsus, qui est sis filz, qui est ameuz par naturel equité, cuide que il les puisse redemander. Et ceste sentence est la plus veroie, ja sé ce que l’en sache bien, si comme il dit, que cil face le don par tel esperance que il en cuida estre guerredoné de celui qui le prist, ou qu’i l’en amast plus ; et par ce ne pot il redemander s’i n’est deceu par fause opinion. {8} Et oncore an parle il plus sotivement, savoir se cil qui fist le don cuida que il fust franc, ne li denier ne sont pas à celui qui les reçut, por ce que il bailla les deniers à celui qui estoit heir non pas ausi comme siens, qui estoent plus siens que à celui qui les renda enprés la franchise qui avenoit à celui par le testamant. Et je cuit, s’i le fist par tel corage, li denier ne sont pas sien ; car quant je te baille mes deniers au [66vB] si comme tiens, li denier ne sont pas tien. ¶ Et que sera s’il ne done les deniers à l’oir mes à autres à cui il cuida que il fust commandé ? S’il i dona les choses propres, li denier ne furent plus à celui qui les reçut ; et se un autre les bailla por lui, ou s’il les bailla et il est franchiz, li denier sont à celui qui les prant. {9} Tot soit il ostroié à celi qui vee estre franc doner deners por acomplir la condiction, se li hers veust, il puet les deniers sauver ; car il puet deffandre que il ne les baille. Et issi sera fet que cil qui est serf sera franc, ausi comme la condicion fust acomplie à qui l’en deffendi que il n’obeist mie, et li denier ne seront mie perdu. Mes celui à qui fu fez le testamanz qui vodra prandre, avra aucion de fet contre l’eir por fere la volenté à celui qui fist le testamant.

Si un estrange dona doere por la feme, et fist convent que en quelque meniere li mariages fust feniz li doeres li fust randuz, ne les noces ne furent segues, por ce que tant solemant fut fet convenz de cez cas qui sequent le mariage, eles ne furent pas fetes, l’en demande à qui avient la condiction, ou à la feme ou à celui qui fist le doere. Et il est senblant à voir, en cest quas se doit garder car quant la cause n’est segue il puet demander son don que il fist por le doere quant le mariage ne fust complez, se la feme ne mostre par bones proves que il eust fet plus por la feme que por lui. {1} Et se li peres done por la fille, et issi est en convent, se l’en ne motre que autrement soit fet, Marcellus dit que li peres puet demander ce que il a doné.

Quant aucun en sa maladie fet don et quant il garist le veaut rapeler, il puet demander les fruiz des choses donees, et les anfanz et quanque il apartient à la chose.

Se l’en rent à faus procurator chose qui n’est pas deue, l’en ne puet demander rien au procurator se li sires tient à fet ; mes li sires en est tenuz, si comme Julien dit. Et se li sires n’eust à fet, tot fust la peccune rendue, l’en la poist demander au procurateor ; et ce qu’est baillié n’est pas demandé comme chose qui n’est pas deue, mes ausi comme ce qu’est doné por chose qui n’est mie fete, por ce [67rA] que l’en a mie ferni ce que a esté fet ou se le procurateor a fet larrecin de peccune qui n’ot mie, l’en puet o lui pledier de larrecin et demander la li.