III. Qui doit partir.

§ 1.

L'en dit ci que qui a partie en aucun héritage, que cil qui veaut partir a besoing de partir, doit partir, et li autres doit (é) lire. Et s'il ne veaut prendre de l'une des deus parties l'une, la jostice le li doit fere fere, ou fere le par le conseil des prodes homes.

Or est à savoir quex choses l'en doit partir : l'en doit partir toz vilenaiges, vavasoreries, totes manières des mobles, fors en choses que l'en ne puet partir, c'est à savoir chose que périst por partie fere, comme molin, comme feur, comme pressoir, comme marchié, et tex choses semblables.

[p. 154] Or demende l'en se l'en puet partir bête, qui vaut mains morte que vive ? Et l'en dit que non ; mès l'en doit fere contrepois de pécune contre la beste, et li chois est à celi qui n'a mestier de partir. Et de cele qui vaut miaus morte que vive, cele puet l'en partir, et li chois est à celui qui n'a mestier de partir.

§ 2.

Uns hons dit issi que quant partie est fete, que l'en ne puet redemender partie ; et qui alongue tenue d'un an et d'un jor, la tenue vaut. Quant l'en a fenit la tenue, et qui enfraint la tenue, cil qui aloigne la tenue la doit motrer par soi et par garanz ; et en tel chose a batalle. Et se la partie fut fete, et ele n'a pas un an, ele est tenable, se ele est de bonne foi. Et s'il nie que ele ne fut onques fête, et l'en alongue pas tenue, ce n'est que surmise ; et li chois de la prove est à celui à qui l'en demende.

§ 3.

Se aucuns demende partie por cause de mariage, et aucuns amis li donast héritages ou mobles por fere le mariage, tot vendra en partie, se li dons n'est apertemant donez à la persone.