École des chartes » ELEC » LI SIXIESME LIVRES » VIII. De metre mort en terre et de fere sepulcre [rubr.]

VIII. De metre mort en terre et de fere sepulcre [rubr.]

  • Traduit du Dig., liv. 11, tit. 8 : de Mortuo inferendo et sepulchro œdificando.

§ {11.8.1} Ulpianus. Pretor ait.

Li prevoz dit : je deffant que l’en ne face force à celui ne à cele que il ne puisse porter son mort et enterrer maugré toz. {1} La où cil avra droit de metre son mort, qu’i n’est pas deffendu que il ne li mete ; il est aparissant que il eist defandu à porter le mort se li deffant la voie. ¶ {2} Li sires de la chose puet user de ceste aucion que li avient de pur leu. ¶ {3} Se l’en me doit voie en champ par qui je voil porter le mort et l’en me deffant la voie, acordé est que j’é ceste aucion par ce que l’en me deffant la voie et tot ce i sera se l’en a autre servise sor le champ [64vA]. {4} Cest entredit est deffandables. {6} Cest entredit est entreposé par ce quar il apartient à religion que les monumanz seent bien atorné et aorné. ¶ {7} L’en ne deffant à nul que il1 ne face sepulcre ne monument la où il a droit. {8} Aparissant est que cil deffent edifier qui deffant que l’en n’i port ce qu’a mestier à fere le sepulcre ou le monument ; et s’il deffendi que li ovrer n’i venisssent qui i avoient mestier, cest antredit a leu ; et s’il deffant à un à porter l’angin qui a mestier à celui ou leu qui doit servise. Et se tu veauz metre ton angin en ma terre, je ne serai pas tenuz de l’entredit se je ne le te soffre. ¶ {9} L’en entent que cil edefie qui fet nove ovre et ausi cil qui veut refere aucunne chose. ¶ {10} Cil qui fet chose par qui li sepulcres chiee est tenuz de cest entredit.

§ {11.8.2} Marcellus. Negat.

Li rois deffant que feme grosse d’enfant ne soit enterree s’ele muert dusque li enfes li soit trez ors dou cors ; qui fera contre ce, aparissant est que il avra tué l’enfant.

§ {11.8.3} Ponponius. Si propius.

Si aucuns mesone prés de tes mesons en sepulcre fessant, tu ne porras pas apoier c’ovre nove ; et se l’ovre est fete, tu n’avras nule aucion fors que de force et de injure. ¶ {1} Se aucun mort est porté prés d’autrui edefice dedanz le an mesure, li sires de l’edefice ne li porra pas deffandre que il ne mete un autre mort en celui leu, ou que il ne face edefice se li sires le sot au commaincement.

§ {11.8.4} Ulpianus. Longa.

Longe teneure ne done pas droit de fere sepulcre à celui qui n’i a droit.

§ {11.8.5} Idem. Si in meo.

Se l’en met os en mon sepulcre qui n’est pas fet, n’i a point de destorber que il ne soit parfez. {1} Et se li leus i est ja fez religios, li evesques doivent encerchier et voer commant l’en puisse refere le leu, sauve la religion.


1 il] il e dans le ms.