XVII. [69vB] De peccune promise à rendre [rubr.]

Li prevoz sostient cest ban car il garde les chose establies par acort ; car dure chose est aler contre sa foi. {1} Li prevoz dit : « cil qui establi à rendre deniers que il devoit » ; l’en doit ce issi entendre celui ou cele, car femes sont coneues de rendre ce que il en convenencent s’eles n’ont seignors. ¶ {2} Et tot ne soit il rien dit en cest ban de menor, [et] s’il establist soi à rendre sanz l’autorité au tutor, il n’est pas tenu. {3} Et se cil qui est encor au bau promest à rendre, l’en demande s’il est tenuz. Et je cuit que oïl ; et ausi li peres dou chetel ou fiz. ¶ {4} Cil qui promet vitement quant il veaut prometre que l’en ne li demant rien, il n’en puet pledier ; car il ne le fist pas par corage de establir se il a rendu, mes solement par corage de promestre. {5} Et l’en demande se l’en puet autre chose rendre que cele qui est deue. Mes quant il est acordé que l’en rendist chose por chose, ausi puet l’en rendre autre chose por ce que l’en doit. Et se aucun doit .c. solz et il rent froment au vaillant, ceste rente vaut. ¶ {6} Dete puet estre establie por tote cause, et por chascun marchié certain ou non certain, et se aucun doit argent por aucun achat ou de cause de doere ou de cause de ban ou d’autre marchié. ¶ {7} Dete ou sa nature sofist. {8} Et cil qui est obligiez de aucion non pas de droit de cité est tenu si s’atablist à rendre, quar la dete est aparissant qui est deue. Et por ce, si1 peres ou sires sont obligié de chatel, si s’atablissent à rendre il en seront tenuz jusque tant comme il avoit en chetel quant il fut promis ; et s’il promet plus en son non, il ne sera pas tenuz fors en ce que sera plus.

Et se tu establis à rendre .x. soz ou non dou fiz tot eit en chatel .v., il sera en diz par ce que il si establi.

Ausi est de .ii. qui ont promis quant l’en a enprés promis à l’un et anprés randu à l’autre ; car cil à qui l’en [70rA] a promis doit estre en leu de celui à qui l’en a rendu.

Et dusque itant veudra la promesse se l’en doit ce que l’en promest s’il n’en i a nul qui dee ; ausi comme s’il promest avant que il demant l’eritage au detor ou s’il est pres de randre, Ponponius dit que la promesse vaut par ce que l’argent estoit deuz. {1} Se aucun devoit .c. deners et en promé .cc., il n’est tenuz que de .c.

Et se aucuns devoit .xx., il est tenuz.

Se nos prometons .ii., l’en porra demander tot à l’un. ¶ {1} Et aucun puet establir en certain leu et en certain tens, et il ne puet pas solement demander la où l’en li promist mes aillors par tot. {2} Li prevoz dit : « s’il est aparissant que cil qui promist n’et rendu, ne qu’i n’et fet gré à celui à qui il doit comme cil fust pret de prandre ». {3} Et s’il ne failli en creancier, li autres est tenuz ; mes l’en doit secorre au detor. ¶ {4} Et les paroles que li prevoz dit « que se reus ne fist ce que il promist », savoir se ces paroles apartienent au tens de la promesse, ou se l’en doit regarder le tens que li plez fut entamez, l’en en dote ; et je cuit que les paroles doevent estre raportees au tens de la promesse.

Ce qu’est deu soz condicion, ou porement, s’il2 est promis en certain jor, il ne puet estre demandé dusque lors ; et cil est tenuz tant comme la condicion dure ; et s’ele faut, l’une et l’autre aucion faut. {1} Et se cil qui doit porement s’il promet sor condicion, Ponponius dit que l’en doit doner contre lui aucion. ¶ {2} Se li peres ou li sires prometent à rendre ce qu’estoit de chatel, le chatel n’apeticera pas por ce que il est ja obligiéz de cele cause ; et soit gasté le chatel, cil n’est pas barré.

Li prevoz dit : je donroi juigement de ce que l’en dira que l’en avra presté3. {1} Et l’espelement de cet ban n’est mie grief : une chose doit estre notee, que qui preste doit fere mencion de prest, et Plaucianus fist mencion de usage. Labeo dit que il a autel difference comme entre generauté ‹…› ; et issi le cuide Cassius et dit que l’en puet prester [70rB] meson à estage. ¶ {2} Cil qui n’ont .xiiii. anz ne sont pas tenuz de prest par ce que l’en ne puet prester à orfelin sanz autorité de tutor. Et s’il a .xiiii. anz et il fet barast ou tricherie en prest, il n’est pas tenuz de ceste aucion, car le prest ne valu rien au commoincement.

Ne l’en ne doit pas doner aucion de prest en desvé, mes l’en fera la chose monstrer por le chalungier.

Et il m’est avis se li orfelins gaigne en la chose prestee, li enpereor dit que l’en donra aucion contre li de prest. {1} Se la chose prestee est rendue peor que ele ne fu prestee, ele n’est pas rendue, puis que ele est enpiree, se l’en ne rent l’enpirement. ¶ L’an dit propremant que la chose est randue quant ele n’est enpiree. ¶ {2} En ceste aucion jurra l’en ausi comme en autres causes ; et li tens la chose jugie tant comme la chose vaut sera tenuz, tot soit gardé li tens que li plez fust entamez en plez de droit estroit. ¶ {3} Li heirs à celui qui ot la chose prestee sera enplediez por tant comme il tient, s’il n’a poer de rendre tote la chose et il ne la rent mie ; lors le condempne li juiges a tot rendre. ¶ {4} Se l’en preste à serf ou à filz, l’en pledera solement dou chetel ; et porra aucun pledoier droitement o le fiz ou o le serf. ¶ Et se l’en preste à serve ou à fille, l’en ne plediera que lors chetel. {5} Et li peres ou li seignor ne sont pas condempné solement de barat à ces persones ; ainz dit Julien que li baraz au pere ou au seignor vient environ aucion de gage. ¶ {6} Ce que puet estre gasté par usage ne puet estre presté, se aucun ne le prent por renier ou por mostrer.

L’en preste deners aucunne foiz por l’amor de celui qui les reçoit.

S’il est convent que li prez soit renduz en certain leu ou en certain tens, li juiges amesurera l’afere dou leu et dou tens. ¶ {1} Se aucun plede de ceste aucion et il reçoit l’esme que l’en [70vA] li offre, la chose est à celui. ¶ {2} Or doit l’en voir que vient en aucion de prest, savoir se barat ou colpe et se tot le peril ; et en marchiez solement le barat i vient, et aucunne foiz la cope. Barat est ou chose baillie en gar, car cil n’i a nul preu qui l’a en garde ; et par ce i vient tricherie solement s’il n’i a loer et lors i vient la cope ; ou s’il est en marchié mis que s’il pert la chose, que il eit le peril et la cope, cil qui a la chose en garde. Mes la où li uns et li autres a preu, si comme en achat ou en loange, comme en doere, comme en gage, comme en compoignie, et barat et cope est baillié. ¶ Prest contient aucunne foiz le preu à celui qui preste, et por ce est veroie la sentance Quincii qui cuida que colpe et diligence i fust. ¶ {3} Et se la chose qui est preté est esmee, cil doit avoir tot le peril qui reçut l’esme de la chose. ¶ {4} Et ce qui avient par vilece ou par maladie en ce que larrons tolent ou aucunne autel chose avient, cil qui reçut le prest ne doit pas avoir de ce riens sor soi se aucunne cope n’i avient. ¶ Et se aucunne chose avient par trebucheiz ou par feu ou aucunne aventure, il ne sera pas tenu s’il ne pensa plus de sauver les soes choses que les prestees. ¶ {5} Et il doit garder diligement la chose prestee. ¶ {6} Li ancien doterens se l’en doit metre garde en home presté ; car aucunne ‹fois› doit l’en metre garde en home, s’il est prestez liez ou s’il est de tel aage que il ait besoing de garde. Et s’il est issi que cil qui le prist le gart, l’en doit dire que il doit la garde. {7} Et aucunne foiz le domage de la mort est sus cetui qui ot le prest, car se je prestoi un cheval por mener à la vile et tu le moines en bataille, tu seras tenuz dou prest ; ausi sera d’un home. Et se je te prestoi le cheval que tu le menasses à la bataille, le peril en est mien. Et se je te preste un serf texier ou covreor et il chiet de sus la meson, le peril est mien, ce dit Julien ; et je cuit que c’est voir se je le [70vB] te prestoi que il montast sor la meson. Et s’il fust prez que il feist besoingne à plainne terre sanz monter en haut et tu le mois en haut, ou se l’ovre chei par ce que il ne l’avoit pas liee ou les perches furent viez et porries par villece, je di que li perilz est à celui qui enprunta la chose. Car Mela dit que se serf est presté à pereor et il le tue en la perriere, li mestres en est tenuz, qui lia mauvesement l’asteler. {8} Et cil moismes qui use de la chose prestee autremant que il ne doit est tenuz non pas solemant de aucion de prest mes de larrecin, si comme Julien dit. Ausit comme se je te preste un livre et tu i fez escrire que ton detor te doit et je l’efface4. Et se je t’avoie presté por escrire ta dete, j’en sui tenuz à toi, et tu me feis savoir que ta dete i fust escrite ; et se tu non me feis savoir, tu es tenuz à moi de prest et ancor de larrecin, por ce que tu as usé de la chose prestee autrement que je ne voloie ; ausi comme cil est tenuz de larrecin qui use autrement de cheval ou de robe que li pret ne fut fez. {9} Et l’en doit metre diligence en la chose prestee, dusque à tant que l’en doit garder la ‹…› diligemant la chose prestee ; ausi comme se je te prestoi une ege que son polein seguet, li encien dient que il te convient garder le polein. ¶ {10} Et aucunne foiz cil qui enprunta sera tenuz de tricherie solement en la chose prestee s’il fet le prest por soi, par aventure por la feme que l’en li amenast honestement et bien vestue, ou se aucun presta au jeu ou li prevoz i joet, ou se aucun presta au prevost moismes. ¶ {11} Or doit l’en voir en quex choses aucion de prest a leu, et li encien doterent de ce. ¶ {12} Je te baille aucunne chose que tu baillasses en gages à ton creancier, tu les li baillas, tu ne la dagas mie por rendre la moi. Labeo dit que aucion de prest a ci leu, et je cuit que c’est voir ; s’il ost le loier en convent, lors avra l’en aucion de loage, ou [71rA] de fet. ¶ Pleniement, se j’engage ma chose por toi par ta volenté, je avrai aucion de commendement contre toi ; et issi dit Labeo droitemant. Se la cope est en moi dou degagier et le creancer ne veaut rendre le gage, tu as aucion contre moi de prest que je te donge aucion contre lui. Je n’i é point de colpe se j’é rendu l’argent ou je sui prez de rendre le ; il convient que cil qui fist le prest sache le despens dou plet. ¶ {13} Se tu me prie que tu me portes un serf et meine escuele et li serf pert l’escuele, le peril en est tien, car l’acuele fust preste, por quoi je doi garder que je n’i e colpe. Et se li serf s’enfuist o l’escuele, cil n’en est pas tenuz qui enprunta s’il ne fut en colpe de la fuite. ¶ {14} Se tu me prias que tu m’apareillasses ta chambre et que je baillasse argent à ce, et je le faz, et enprés tu requiers que je face autretel à l’autre jor, et comme je ne usese pas deniers à ma volenté en ma meson, je lesse ce illoc, et enpire, l’en demande quele aucion le puet avoir et à qui est li perilz. Labeo dit, de peril que il a restoroit se je i lessoie5 garde ou non ; se je lessoie, le peril est à celui à qui je lessoi la chose en garde ; si non, le peril est mien. Et cuit que l’en a aucion de prest, et que cil doit amender la chose que il ot en garde se autre convenent n’i ot. {15} Se charrete est prestee à .ii. ou loee ensenble, Celsus dit l’en puet demander se chascun est tenu por tot ou por partie ; et il dit que la seignorie ou la possession ne puet pas estre à .ii. de tot, ne l’un ne puet pas fere partie d’un cors, mes de tot le cors sanz devise puet il avoir seignorie en partie. Mes il puet avoir l’usage de boing, ou de galerie, ou d’un camp tot ; ne n’en i ei pas moins mon usage que li autres. Et en charrete loee ou prestee, j’ai mon usage en partie, car je ne tiens pas6 toz les leus de la cherete. Mes il dit voir que je doi garder que il n’i et barat ne colpe et que il i et bone garde, et par ce seront il tenuz en dui ; et se li uns est trez en plet et issi se deli[71rB]vre, il delivre l’autre et en dui ont aucion de larrecin.

Nos poon prester autrui chose que nos porseon, tot sechein nos que ele est autrui.

Tu me prestas une chose, tu la me emblas ; enprés tu la me demandas et je ne savoie pas que tu l’eusses sotresté, li juige me condempne et je rendi la chose ; anprés j’ai apris que tu l’avoies sotresté, quele aucion ai je contre toi ? Je di que je n’avoie mie contre toi aucion de larrecin mes de prest contre toi. ¶ {1} Je prestoi en l’ost à compoignons vessiaus à user à commun peril, et mi sers la sostret, et s’enfuit à noz guerriers, et anprés revint sanz les vaisseaus. Il est voirs que j’é aucion de prest contre les compoingnons chascun par sa partie ; et il puent contre moi avoir aucion de larrecin en non de mon serf, car le forfet suit7 la teste au serf. ¶ Et se je te preste aucunne chose au ser à ton peril et mon serf l’emble, tu puez pledier à moi en non de serf.

Se je te preste un cheval à aler jusqu’à un certain leu, se li chevaus enpire en la voie sanz ta cope, tu n’es pas tenuz dou prest ; me je seroi en cope, qu’i l’e presté à aler si longue voie que il ne pot sostenir.