École des chartes » ELEC » LI SIXIESME LIVRES » XIII. [67vB] De aucion de chose que l’en ne doit mie [rubr.]

XIII. [67vB] De aucion de chose que l’en ne doit mie [rubr.]

  • La première partie de ce titre est traduite du Dig., liv. 12, tit. 6 : de Condictione indebiti.

§ {12.6.1} Ulpianus. Nunc videndum.

Or devon voir de chose qui n’est pas deue1 que l’en rent. {1} Et se aucun rent chose que il ne doit mie, et rien n’an set, il la pot demander par ceste aucion ; s’il la rendi, et savoit, cil qui reçut que il ne la devoit mie ‹...›.

§ {12.6.3} Papinianus. Idem est.

Ausi est si novele cause est don l’en ne savoit rien de tot l’eritage ; ausint comme un enfant nest anprés la mort au pere que li hers ne savoit pas que la mere fust enceinte, ou se li autres enfant qui estoit en guerre revient que li peres disoit fausement que il estoit morz. Il convient doner bones aucions au fiz qui nest enprés la mort au pere, ou à l’autre qui gaaigne l’eritage contre cex qui ont eu les lés. Ticius et Antoninus enpereors distrent que cil qui tient l’eritage en bone foi est tenuz de tant comme il a plus gaignié que le peril de ceste chose ne remoinge à celui qui randi la chose sanz sa colpe.

§ {12.6.5} Ulpianus. Nec novum est.

N’est pas nouvele chose se un autre demande ce que autres a poié ; car comme cil qui n’a .xxv. anz quant il a demandé l’eritage et les lés renduz nicement est mis en point qui estoit avant, il ne puet demander ce que il a rendu, mes cil à qui la chose apartient les puet demander.

§ {12.6.7} Ponponius. Quod.

Ce qu’est rendu por niceté qui n’estoit pas deu, ce puet estre demandé ou autretant.

§ {12.6.8} Paulus. Quod.

Ce que un autre rent à la feme en non do mari qui ne puet rendre, il ne le puet demander, car la dete est à la feme.

§ {12.6.12} Paulus. Si fundi.

Se je te done l’usage et lo fruit de mon champ qui quidees fausement que je le te deusse, et je muir avant que je le te demande, la demande de cestui passe de cex en celui.

§ {12.6.14} Ponponius. Nam hoc.

Car c’est lëauté et nature que nus ne doit estre riches d’autrui domage.

§ {12.6.15} Paulus. Indebiti.

La demande de solte qui n’est pas deue est naturel ; et tot ce que apartient à sote puet estre demandee, si comme li enfes qui nest de la serve, ou ce que creue d’eve a amené en mon [68rA] champ ; et les fruiz, se cil à qui la sote est fete l’a pris en bone foi, sont demandables. {1} Et se l’en rent autrui deniers, l’en les puet demander si que l’est en et la sesine ; ausi comme se je cuide fausement que je te doie la sesine d’aucunne chose et je la demandasse. ¶ Et se je fis la possession toe, si que ele ne puet estre rapelee par lonc tens, tot puisse je pledier à toi par droit par ce que je te rendi chose que je ne te devoie mie. {2} Et se li fruiz et li usages qui estoit autrui est rendu o la chose, je la te demanderoi hors l’usage.

§ {12.6.16} Ponponius. Sub.

Se l’en rent par niceté chose qui estoit deue par condicion, ele puet estre demandee tant comme la condicion pent ; et quant ele est avenue, l’en ne la puet demander. {1} Et ce que l’en doit à jor nomé, ne puet estre demandé dusque le jorz soit.

§ {12.6.23} Ulpianus. Eleganter.

Ponpes demande trop bien, se aucuns cuide que pez soit fete de celui qui est heir ou de celui qui est procureor, et il done por cele pez qui n’est mie fete, l’en demande se l’en le puet redemander. Et il dit que oïl, car il est donez por fause cause. Ausi cuideré dire se la pez n’est fete por qui le don est fet ; et se la pez est depecee, ausi en doit l’en dire. ¶ {1} Se aucun fet pez aprés chose juigie et il rent, il porra redemander par ce que acordé est que la pez est nule ; et ce dit li enpereor. Et ce puet estre retenu en la cause dou juigement qui a esté rendu por cele pez.

§ {12.6.24} Idem. Si his.

Se cil qui se puet deffendre de pardurable barre, qui savoit bien que la barre li avoit mester, promest aucunne chose por soi delivrer, il ne la porra pas redemander.

§ {12.6.31} Idem. Is qui.

Cil qui par niceté rent plus que l’eritage ne se monte an creancer, puet demander ce que il a rendu comme ce que il ne devoit mie. ¶

§ {12.6.32}

{2} Se la feme est en tele opinion que ele croit que ele est obligie por le doere quanque le rendra por le doere, ele ne porra redemander ; quar quant la fause opinion est otee, ce qu’est rendu ne puet estre redemandé, ainz remoint por cause de pitié. ¶ {3} Cil qui promist home generaument est ausi comme cil qui doit un home ou .x. solz. Et par ce, s’il cuida que il eust promist Tibert et le rent, il ne le demandera pas [68rB] ; et s’il rent un home que tu vodras, il sera delivrés.

§ {12.6.44} Idem. Repeti‹ti›o.

La demande nest nule de celui qui reçoit la soe chose ; et totesvoies, se autres les rent que cil la devoit veroiment, cil la puet redemander.

§ {12.6.47} Celsus. Indebitam.

Tu promeis par mal2 deniers que tu ne devois mie ; cil qui plevi por toi la rendi. Je cuit que se li plege rent en ton non tu en est tenuz à lui, ne il ne convient pas à randre se tu l’as estable ou non ; car tu li peus mander qu’i les rendist en ton non. Et se li plege les rent en son non que il ne devoit pas fere, il les puet demander par ce que il rendi ce que il ne devoit mie ; et il porra demander par ton commandemant à celui à qui il rendi s’il ne mest barre contre celui qui demande par non sachance.

§ {12.6.48} Idem. Qui.

Cil qui promist à doner .x. solz s’il fesoit aucunne chose, ou se aucunne chose est fete, s’il rent ce que il promist avant que la chose soit fete, ‹...› que il a promis, et par ce les puet il redemander.

§ {12.6.49} Modestius. Hiis solis.

À cex puet l’en demader la peccune à qui ele est rendue en quelque meniere, non pas à cex qui ele profite.

§ {12.6.50} Pomponius. Quod.

Ce que aucun rent par si que il savoit que il ne devoit mie la chose et par corage que il la redemandast, il ne la pot redemander.

§ 1.

De aucion de chose que l'en ne doit mie, et comment l'en la puet demender, nos devon voier. Se aucun rent chose qui n'est pas deue, et riens n'en siet, il la puet redemender.

§ 2.

Se aucuns enfes est au ventre sa mère et ne set l'en pas que il i soit, l'en puet redemender le héritage, qu'il sera rendu à autre qui se fera heir. Ausint est se aucuns est heirs (hors) dou païs, et l'en cuide qu'il soit morz et revient. Et se aucuns rent por autrui, il ne puet redemender ce qu'il a rendu, tot ne soit la chose à celui ; mès cil por quoi la chose a esté rendue la puet redemender.

§ 3.

Et se mi procurators rent chose que je ne devoi mie, il la puet redemender ; et tutor et curator ausi. Ce qui est rendu par niceté, et n'ière pas deu, puet estre demendé ou autretant3.

§ 4.

Un home dit issint : Cel home me doit dix livres, que je li rendi, que je net li devoie pas ; si les démant, et s'il veust dire que ce ne soit voirs, je suis prez dou prover et de l'avérer, et par moi et par garanz qui en fera ce qu'il devra. Li copables fet encontre tel ni et tel deffense comme il doit. L'en demende qu'an dit droit. Et l'en respont que li demanderes est loisanz de prandre la prove de celui et de son garant, et de conoistre que c'est voirs, ou d'escondire par la soe. Car en tel chose n'a que sormise, comme il n'i oist cause dom il ait bataille, ne chetel ; et est aparissant que l'en ne poie pas volentiers chose qui n'est deue.


1 deue] desue dans le ms.
2 mal] mai dans le ms., cf. lat. per errorem
3 Dig., lib. 12, tit. 6, frag. 1, 3, 5, 6, 7.