École des chartes » ELEC » LI SEPTIESME LIVRES » I. De aucion de marchandie menee en nés [rubr.]
[p. 160]

I. De aucion de marchandie menee en nés [rubr.]

  • Traduit du Dig., liv. 14, tit. 1, de Exercitoria actione.

§ {14.1.1} Utilitatem.

Nus n’est qui ne sache que en cest ban n’ait moult de preu ; car come nos ne savon mie aucunne foiz quex hon de quel meniere sont cex à qui nos feson marchié por estre porté en la nef, droiz fiz que cil fust tenuz qui mist mestre en la nef ; ausi comme cil est tenuz qui met marcheant à tavernerie mener ou à autre afere, comme il soit plus grant mester de fere marchié o le metre de la nef que o le marcheant. Et par ce, convient il que l’en voie au marcheant s’il fet marchié en la nef, au metre aucunne foiz ; que li leus ou li tens ne sofere mie que l’en soit sanz bon conseil. ¶ {1} Nos devon entendre « metre de nef » cil à qui la cure de tote la nef est commandee. {2} Et se l’en fet marchié en aucun des notoniers, l’en n’a pas aucion contre le metre, tot soit il tenuz de forfet que chascun met en la nef ; car il i a une cause de fere marchié et une autre de fere folie. Et cil qui mest le mestre en la nef sofre bien que l’en face marchié à noteniers et il doit garder que il ne facent barat ne tricherie. ¶ {3} Li mestre sont mis à loer les [72rB] nés, ou à merceries porter ou à aloier, ou armes vendre ou achatier ; et se cil est mis por acheter et por vendre, il oblige le seignor par ce. {4} Et l’en n’a que fere de quel meniere est cil metres, ou serf ou franc ou privé ou estrange, ne de quel aage, bien si gart cil qui li mist. ¶ {5} Nos apelon celui metre non pas solement que li sires mist, mes celui moismes que li metres i a mis ; et issi le dit Julien. Et se li sires le fet, et il li sofre user de mestrie en la nef, il senble que il i et mis ; et il m’est avis que c’est droiz. Et li metres que il mist doit regarder tot ce que il fet, si que non cil qui font marchié o lui seront deceu. Et l’en doit ce miauz entendre en mestre1 que en marcheant por le preu qu’i i est. Que sera s’il i mist metre par si que il n’i poist metre autre ? Recevron nos à la sentence ? Julien dit que l’en i doit voir, posé que il et deffendu nicement que Ticius ne fust mestre de la nef ; l’en doit dire que l’en doit regarder le preu à cex qui sont en la nef. ¶ {6} Nos devon entendre « nef » se ele est sor mer, ou en fluve, ou en estant. ¶ {7} Li prevoz ne done mie aucion de tote cause en seignor de la nef, mes de cele chose en qui non il fut iqui mis ; ausi comme s’il fust mis por porter fuerre ou aucunne chose, ou s’il achate aucunnes marchandies bones2 à porter en nef, ou s’il a despendu aucunne chose por rafetier la nef, ou si li notenier demandent aucunne chose de lor ovres. {8} Et s’il enprunte deners, savoir se c’est en non de cele chose ? Et Pagasus le cuide, s’il fist l’enprunt à l’usage de cele chose don il est mestre, il avra aucion ; et je cuit que il est voirs. Que sera s’il fist l’enprunt por aparellier la nef, ou por fere, ou por metre i notoniers ? {9} Donc Offilius demande : se cil fet enprunt por refere la nef et il met les deniers en son usage, l’en demande se l’en doit doner aucion contre le seignor de la nef. Et il dit que s’il les prist par tel convent que il les despendist en la nef et enprés mua son corage, il en est tenuz [72vA] ; et bien si gart li sires qui tel mestre mist en sa nef. Et s’il prist consoil au commoincement de co‹n›chier le creencier, et il ne li dist mie que il prenoit ces deniers por la nef amender, autre chose est ; et Pedius dit que ce est bien. {10} Et se li metres deçut son compoignon en pris des chose achatees, li domages sera son, non pas au creancier. {11} Et s’il enprunta d’autre, il delivra celui qui fist la creance à refere la nef ; et je croi que il a aucion. {12} Et dunc la mestrie done certoine convenance à cez qui font marchié. Por quoi, se il sires l’es mist en la nef por demander le pris de voitures, non pas que il les aloe qui l’avoit ja aloé, li sires n’en sera pas tenuz si li mestres a loé, ou s’il est establi solement à aloer non pas à demander. Ausint en dira l’en, ou s’il est posé que il aloe le portage, non pas que il preste la nef à mercerie ; ou s’il fet plus que il ne doit, il n’oblige pas le seignor. Et s’il l’aloe à porter certaines merceries, si comme à porter chenvre, leum, et cil l’aloe à porter pierre ou fuz, il ne sera pas tenuz. ¶ Car aucunnes nés sont porteresses et autres sont à autre mester. Li uns mande as autres noteniers que il recevent les porteors, et que il augent en certein leu et en certone mer ; ausint comme nés qui sont à Brandiz ou à Jafés, que li notenier moinent, qu’i ne sont pas bones à porter ; et les autres nés ne sunt preuz à aler par mer. ¶ {13} S’il i a plusors metres et lor ofices ne sont pas devisé, quanque l’an fera o l’un obligera le seignor ; et se li office sont devisé, que le un aloe l’autre, li sires sera obligé por l’ofice à chescun. {14} Et se li sires les i met, isint que li un ne face rien sanz l’autre, ausint comme l’en fet aucunne foiz, bien si gart cil qui fet marchié o l’un. ¶ {15} Nos apelon celui « seignor de la nef » qui a totes les issues et les rentes de la nef, se il est sires de la nef ou se il l’a aloee ou à ja ou à toz jorz. ¶ {16} Petit motre se cil qui est sires est male ou fumule, perre, ou fez, ou serf ; et se [72vB] menor est sires de la nef, il i convient l’autorité de tutor. ¶ {17} Il est ou nostre chois de trere en plet le seignor ou le mestre de la nef. {18} Et cil qui est sires de la nef n’a pas aucion contre ceaus qui firent marchié o le mestre, car il ne li afiet pas ; mes si pot avoir aucion de commandemant contre le mestre, ou de loage s’il ne li rent le loer. Et ce solent fere li provost por le mestre de l’annone ; ¶ et ausi solent fere li seignor des provinces es marchiez que li metres de nés funt ou autres. ¶ {19} Se cil qui est sires de la nef est en autrui poer, et cil en est sires par la volenté celui, l’en avra aucion de ce que l’en fera o le mestre de la nef contre celi en qui poer li sires de la nef est. {20} Se cil est sires de la nef par la volenté à celi en qui poer il est, et il est tenuz de tot, puis que cil est metres de la nef par sa volenté ; car usage de nef apartient au commun profit. Mes n’est pas issi de marcheanz ; ¶ et por ce, cil qui font marchié o lui sont tenuz sanz plus de trëu ; cil qui moinent marchandie de lor chetel au seu lor seignor, et s’il font marchié o le mestre au seu au seignor et il ne le veust mie, donron nos action de tot contre li, ausi com s’i le vosist, ou aucion de trëu ? ¶ Puis que la chose est dotose, miauz est que l’en segue les paroles de loi, et que l’en ne meste pas sus au pere ou au seignor qui sache le fet au mestre de la nef ; que il ne soient obligié par tel volenté se cil moinent le miauz de lor propre chetel. Et issi le dit Ponpinius : se li sires de la nef est en autrui poer et por la volenté à celui est cil sires de la nef, il est obligié de tot ; se ce n’est par sa volenté, il n’est tenuz que do chatel. ¶ {21} Nos entendon « estre en poer » filz, filles, serf, serves. ¶ {22} Se serf est sires de nef par la volenté au fiz cu’il estoit, li peres ou li filz qui ne le vost mie contredire sera obligié de tost. ¶ {23} Ja soit ce que li prevoz doigne aucion solement de ce que l’en fet o le mestre, Julien dit : se l’en fet marchié ou le seignor de la nef, li peres au fiz ou li sires au serf seront tenuz de tost. ¶ {24} Ceste aucion sera donee contre le seignor par la persone [73rA] au mestre ; et se l’en plede o l’un d’aus ou à l’autre, l’en ne plediera pas à l’autre ; et se l’en rent aucunne chose, l’obligacion au mestre apetice. ¶ Et se l’en rent en non dou seignor ou en non do mestre aucunne chose, l’obligacion sera apeticee, por ce que se aucuns rent por moi, je sui quité. ¶ {25} Se plusors sont mestre de la nef, l’en porra pledier o le quel que il vodra de tot.

§ {14.1.2} Gaius. Ne in plure.

Quar cil qui fist marchié ne soit forcé de avoir tant aversaires ensenble.

§ {14.1.3} Paulus. Nec quicquam.

Ne aucuns d’aus ne pot pas mostrer combien que il a en la nef de partie, et cil qui avra mené le plet avra ses despens des autres par juigement de compoignie.

§ {14.1.6} Paulus. Si servus.

Se li sers est sires de la nef sanz la volenté au seignor, s’il le sot, il avra contre lui aucion de trëu ; s’il ne le set, il avra aucion de chetel. ¶ {1} Se serf commun moine neff por la volenté au seignor, l’en dira contre toz aucion de chetel por tot.


1 mestre] mestir dans le ms., cf. lat. et facilius hoc in magistro quam institore admittendum propter utilitatem
2 bones] pones(?) dans le ms., cf. lat. ad onera inhabiles