IX. De mandemant [rubr.]

L’en dona par droit aucion de tot demandemant au seignor contre celi o qui l’en fet marchié par son commandemant. {1} Nos entendon « commandemant » se aucun commande en son testamant ou par letres ou par paroles ou par message ou especiaument en un marchié. Et par ce, se il dit issi : ce que tu voidras foi à Tibert mon serjant ; bien mi gart à ce commander se je ne prove que li marchié est coruz en autre meniere. {2} Et je demande se je puis rapeler cet commandemant avant que cil soit creu. Et je cuit que cil ausi, comme je eusse mandé et puis enprés rapelé mon commandemant ; et je fis celi de certain. ¶ {3} Et se li peres ou li sires mande, il est veü que il commande. {4} Et se li sires seele au serf cez letres, il est tenuz dou commandemant. {5} Et que sera s’il plevist le serf ? Marcellus dit que il n’est pas tenuz de ceste aucion, car iloc parlent si comme estrange ; ne par ce n’est il pas tenuz de la cause de la plevine, mes par ce qu’autre chose est commander et autre choses est plevir. Et encor dit il que se il nicemant plevist, cil n’est pas obligié comme s’il eust commandé ; et ceste sentence est veraie. ¶ {6} Se aucun a establi ce que son sers a establi o le fiz, ceste [76vB] aucion est contre aus. ¶ {7} Se li orfelins est sires, il n’est pas tenuz se le tutor no commanda ausi. ¶ {8} Se le serf fist le marchié par le commadement au frutuer ¶ et ausi de celi à cui il sert en bone foi, Marcellus cuide que ceste aucion soit contre aus ; et je cuit que c’est bien. ¶ {9} Se l’en fet marchié au curator de vallet ou de desvé ou de gaste blé, Labeo cuide que l’en doit ceste aucion contre aus à cui a esté le serf. Et ausi est en veroi procurator ; et s’il n’est verai procurator, Labeo dit que l’en donra aucion contre lui.

Se l’en fet creance au serf de l’orfelin por le commandemant au tutor, je cuit que, se l’en fet la creance par le preu à l’orfelin, l’en avra contre lui auction de ce que le tutor commada. ¶ {1} Se l’en fet creance par le commandemant au seignor à la serve, ou à la fille por le commandemant au pere, ceste aucion doit estre donee contre. ¶ {2} Se l’en fet marchié ou autrui serf par mon commandemant et enprés je l’achate, je ne seroi pas tenuz de ceste aucion, que ce que premerement ne valut rien soit fet bon por avainture.

Li sires qui commanda que l’en creut à usure à son serf deniers à prest, est tenuz de tant comme il commanda ; ne obligacion de gage n’a point de leu en teneures que li sers a obligiés se n’est par la volenté au seignor.

Se l’en fet marchié o le serf de la cité por le commandemant de celi qui estoit sire, Ponponius dit que l’en a contre lui ceste aucion.

Se li peres ou li sires qui voloiet deners enprunter, et les commaderent conter à lor serf ou à lor fiz, ce n’est nule demande que il ne lor puissent demander ; et en cest cas, n’a point ceste aucion de leu. ¶ {1} Se un des seignors au serf commanda fere marchié o celi, cil sol en sera tenuz ; et se .ii. le commandent, l’en a aucion contre les .ii., car il sont .ii. commandeors.