XII. De chose que l’en baille à garder que l’en apele depos [rubr.]

Deposee chose est qui est baillie à garder à aucun ; et l’en apele « deposee » por ce que ele i est posee ; car ceste preposicion croit le depos por senefier que il met tot sor la loiauté quanque apartient à la garde de la chose. ¶ {1} Le prevost dit : je donroi juigement de ce qu’est baillié à garder, non pas por acheson de guerre, ne de feu, ne de froissiez de nef, ne de trebucheiz, ¶ d’une chose contre celi qui avra la chose esgardé. Et des choses qui sont desus nomees, contre lui à doble ; et contre l’oier à celui don l’en dira que li mort i fist barat, d’une chose. ¶ {2} Le prevoz departit par droit ces causes de baillier choses en garde, que contienenent cause de aventure de bau, qui descent de besoing qui ne vient pas de volenté. ¶ {3} Et l’en entant que cil baille en garde par cause de feu, [78rA] de guerre, qui n’a nule autre cause de baillier en garde fors que le peril aparissant. ¶ {4} Ceste defenrance de causes n’est pas sanz reson ; car comme cil qui baille sa chose en garde par sa volenté à aucun en qui il se fie, il se doit tenir apaié de simple rente. Et quant il baille en garde par besoing, le crime au trecheor il le croist, et le doit comperer par le commun profist ; car c’est moult grant mauveté de froissier sa loiauté quant l’en reçoit chose en garde. ¶ {5} Ce qui s’esjont1 à choses baillies en garde ne sont mie desposees ; ausi comme se l’en met en garde un home vestu, la robe n’est pas por ce baillie ; ne se un chevau est baillié ou le chevoitre, car le cheval solement est desposé. ¶ {6} S’il est en convant que barat et colpe soent hors de bau, la convenance est bone, car li marchié prenent loi de la convenance. {7} L’en ne doit pas desloier ce que trecherie soit hors ; car, s’il i a trecherie et barat, ce est contre bones mors et contre bone foi, et por ce ne la doit l’en pas tenir. ¶ {8} Se robe que l’en a baillie à garder à celi qui garde les bainz est perrie et cil n’a eu nul loier de la robe garder, il est tenuz de bau, et cuit que il doit fere foi que il ne fist barat ; et s’il en ot loier, il est tenuz do loage. ¶ {9} Se aucun gete son serf qui estoit baillié à garder au pestrin, et se li petriseor et loer por garder le serf, je cuit que l’en a aucion contre celi do loage. Et se j’é pris loer por le serf que cil tient en son mestier, je puis avoier aucion de loage ; et se les ovres à celui serf furent baillies o le serf, c’est ausi comme loage. ¶ Et par ce que il n’i ot point de loier, ceste aucion est de paroles ; et s’il ne rent rien que le manger et tu n’eus rien de la besoigne au serf, ceste aucion est contre toi. ¶ {10} L’en ostera barat et tricherie de loage et d’autres convenances don nos avons desus parlé. Et se aucun reçoit un serf et il li done à mangier solement, l’en ne metra hors de ce que tricherie ; et ausi comme Ponponius dist, s’il i ot rien en convenance ne escrit, il n’i a [78rB] ura nus hors que tricherie vers cez qui le serf receurent ; et ceste tricherie doit estre ostee folement do depos. ¶ {11} Se ge te prie que tu portes mes choses à Tibert que il les me gart, l’en demande à Ponponius quele aucion je puis avoir contre toi. Et il cuide que de aucion de commandemant ; et se cil reçoit celes choses, il i a aucion de depos ; et s’il la reçoit en ton non et tu le mandas, tu es tenuz de commandemant et il t’est tenuz de depos ; et se tu es tret en plet de mandemant, tu me bailleras ceste auction. ¶ {12} Et se te baille la chose que se Tebert ne prist la chose tu la me gardasses, et il ne la prent pas, l’en doit voer se tu es tenuz solement de bau ou do commandemant ; et Ponponius en dote. Et je cuit que tant solement de aucion de commandemant, car plus fust à voier le mandemant que la garde. ¶ {13} Ausi dist Ponponius : se je te mande que tu me gardes ma chose que tu as receu en mon non de aucun et tu le fes, issi l’en demande se tu es tenuz de mandemant ou de depos. Et il dit que plus vaut de aucion de mandemant, car c’est celi premer marchié. ¶ {14} Ausi demande Ponponius : se quant je vol deposer ma chose ches toi, tu commandas la metre chiés ton serf, l’en demande se j’é contre toi ceste aucion. Et il dist : se ge li mis en ton non, ausi comme se tu le gardasses, j’é contre toi ceste aucion. Et se tu me diz que je mete ma chose ches toi, je n’é nule aucion contre toi, et ceste aucion est o celi, ne tu n’es pas tenuz do commendement, car tu fois mes choses. Mes se tu commandas que je le moisse ches celi en ton peril, je ne voi pas por quoi il n’i eist aucion de mandemant. Et se tu fus son plege, Labeo dist sanz faille que tu es tenuz non pas solement se cil fist barat me·s’il a la chose. Et que sera se cil fu forsené qui ot la chose ou s’il est orfelin ou il n’est heir, ne ne tient les biens ne cil n’ot nul heir ? Il sera tenuz et convient que il rende le bau. ¶ {15} L’en demande se l’en doit doner [78vA] aucion contre l’orfelin à cui l’en a baillé à garder sanz l’autorité au tutor. L’en doit voer se il set point de barat ; l’en i a aucion s’il fet barat de tant comme il i a gaignié ; et s’il n’i fet barat, ausi est il tenuz. ¶ {16} Se l’en rent la chose enpiree que l’en a en garde baillie, l’en pot avoir aucion ausi comme se ele ne fut pas rendue ; quar quant ele est rendue peor, l’en pot dire, por le barat qui est, que el n’est pas rendue. ¶ {17} Se mon serf baille aucunne chose en garde, je avroi aucion de bau. ¶ {18} Se ge baille à sers ma chose en garde et ge plede o franchi, Macellus dit que il n’i a point de aucion, ja soit ce que nos solons dire que chescun est tenuz de barat qui est fet ou tens que aucun est serf ; car li forfez doivent estre puniz or convendra aler à autres aucions convenables. ¶ {19} Ceste aucion est rendue à cez qui tienent les biens et lor heirs. ¶ {20} Et l’en n’avra pas aucion solement de barat qui est passé mes de celi qui est à venir, c’est à dire enprés ce que plet est entammé. {21} Et d’iqui dit Neracius : se chose baillie en garde est perdue sanz barat et ele est trovee enprés ce que le plet en fu terminé, por ce ne ravient pas que cil qui l’ot ne soit tenuz à rendre la, ne ne doit pas estre delivré s’il ne la rent. ¶ Oncor dit li enpereor : ja soit ce que l’en n’et pledié o toi de bau, et tu n’as poer de rendre moi la chose, car li grenier por avointure sont clos, se tu as poer de rendre la avant ce que tu es condempnez à rendre la, tu doit estre condempnez se tu ne la ranz, car tu l’as ; lors doit l’en demander se tu i ferés barat quant tu n’as pas la chose. ¶ {22} Julien dit que cil qui deposa la chose pot demanois avoir aucion de demander la ; car il apert que cil qui la chose reçut i face barat quant il ne la vost rendre à celi qui la demandoit. Et Marcellus dit que cil ne fest pas barat toz jorz s’il ne rent la chose à celi que ele est ; car par aventure la chose sera loing de celi [78vB], ou il ne porra pas ovrir les graniers au jor que il fut condempné de rendre la, et la condicion de rendre2 la n’est pas echevé. {23} Il ne convient pas doter que ceste aucion ne soit de bien et de lëauté. {24} Et por ce doit l’en dire que l’en pot demander par ceste aucion les fruiz de la chose baillie et les feons et toute la cause, que la chose ne soit rendue mie si comme ele fut baillie. ¶ {25} Se tu vendis la chose qui ce fut baillie et enprés la rachetas, se ele perist puis, tot n’i ert il point de barat, tu en es tenuz, car tu fois barat une foiz quant tu la vendis ; {26} et en ceste auction jure l’en en plet. ¶ {27} Non pas mes se cili qui me sert en bone foi balle chose en garde droit esgarde et sera que je en ee aucion s’il balla chose qui m’apartenoit. {28} Et ausi se g’e usage et fruit en serf, se ce que il bailla en garde fut do chetel qui n’i apartenoit ou se la chose fut moie, je porrai avoir ceste aucion. ¶ {29} Se serf heriter baille chose à garder, li heir qui avra l’eritage avra ceste aucion. ¶ {30} Se serf baille chose en garde s’i mort ou s’il vit, li sires avra ceste aucion à droit ; et se le serf est franchi, il ne la porra avoier. ¶ Et s’il est mis en autrui main, il avra ceste aucion cis cui est le serf quant il fist le bau, car l’en doit regarder le commencement do marchié. ¶ {31} Se le sers qui bailla la chose en garde est à .ii. seignors, chescun avra à ceste aucion par sa partie. ¶ {32} Se tu rendis à Tebert la chose que li serf avoit baillie en garde et tu cuidas que il en fust sires et ne l’estoit pas, tu n’es pas tenuz de ceste aucion ; ce dit Celsus, car il n’i à point de barat et li sires pledera o Tebert ou o celi qui la chose a, et la mostree en demandera à avoier. ¶ Et s’ele li est monstree, il la chalongera. Et s’il despandi la chose qui savoit que ele estoit à autrui, il sera condempné, car il fist par son barat que il ne l’ot pas. ¶ {33} L’en fet une demande trop bele à Julien : se le serf me bailla deners en garde par si que ge les donasses à son seignor por lui franchir et ge les li done, l’en demande se ge sui [79rA] tenuz dou bau. Et Neracius dist : se je les baille issi que el fut à moi baillé por ce et je le te faz savoir, tu n’as pas ceste aucion contre moi ; car tu seus bien l’afere quant je t’e baillé l’argent et issi n’i faz ge point de barat. Et se je baille les deniers comme miens por lui franchir, g’en seroi tenuz, et m’est avis que c’est voir ; et cist ne randi pas la chose sanz barat, et si ne la rendi pas ; car autre chose est rendre et autre chose est doner do sien.

Se cil à cui tu as baillié la chose à garder la baille à un autre, et cil pert aucunne chose por le barat à celi à cui il le bailla enprés, cil est tenuz à cui tu la baillas.

Bone foi que l’en demande en marchié deserre que l’en face lëauté. Mes l’en demande se l’en le doit esmer segont le droit à genz ou segont le droit à prevoz. Ausi comme se cil qui estoit condempné à perdre la teste te bailla .c. solz en garde et il fust envoié en essil et ses chose sont totes sesies, l’en demande se l’en li doit ce rendre o metre o les choses sesies. Se nos regardon droit naturel et de gent, le doit rendre la chose à celi qui la bailla ; mes segont droit de cité et segont loi, il doit rendre les choses o celes qui sont sesies, car li maufesor doit avoir soffroite por espoenter les autres. {1} Et oncor devons nos regarder se nos devon voier solement bone foi entre cex qui ont fet lor marchié sanz autre jointure ne sanz autres persones à cui apartient ce que l’en fet. Et vez l’esample : ¶ un lierres mist en garde ches Gaubert la robe que il me tolit, cil Gaubert n’en savit rien de larrecin, l’en demande à cui je Gaubert vendrai la chose, ou au larron ou à celi que eles sont. Se nos regardon celi qui baille et celi qui reçoit, c’est la bone foi que cil ait la chose qui la bailla ; et se l’en regarde equité de totes les persones qui avienent à cest afere, l’en me doit rendre la chose, et par ce les doit perdre li lerres. Et por ce, di ge que c’est droiz qui rent à chescun ce qu’est droiz. Et se je ne demande la chose, el doit estre rendue à celi qui li mist, tot i eit il mis chose que n’estoit mie soe. Et [79rB] ausi dit Macellus en toleor et en robeor. Et se li lierres n’en sot rien que la chose fust au fiz ou au serf à qui il la tolit, et il la met en garde chiés le pere ou ches le seignor, par droit de genz ne vaut rien ce bau, qui a tel poer que la chose doit estre baillee au seignor à l’autre non pas qui est baillie comme estrange à garder. Et se li lerres me baille à garder la chose que il m’a emblee et rien n’en soi, l’en dira par droit que li bau est nul, car il n’i a point de bone foi et il est tenuz de rendre ses choses au seignor. Et s’ele estoit baillie do seignor qui rien n’en sot, il la pot redemander ausi comme de cause de bau.

Ce que Nerva dist que grant colpe estoit tricherie ne plesoit pas à Proculus ; car se aucun n’est pas si diligent comme nature desierre, s’il ne fu si diligent à sa maniere en la chose garder, il n’a point de barat. Et, sauve la foi, il ne metra menor diligence en cele chose garder qu’an la soie.