XI. [77rB] De contrepois [rubr.]

Contrepoies est solte de dete et de creance l’un encontre l’autre.

Chescun oste son creancier et son detor qui demande s’il veut fere contrepois.

Et por ce est contrepois necessere, car c’est plus nostre preu de requenoistre la dete que de demander ce que l’en a rendu.

Ce que plesoit à Neracius est voier. Et Ponponius dit que li pleige doit moins par droit de tot marchié de tant comme li detor pot retenir de contrepois ; ausi comme se je demande tot au detor je demande malement, ausi le plege n’est pas tenuz en plus que cil por qui il plevist pot estre condempné.

Se l’en demande rien au plege, droiz est que il choissise le quel que il vodra miauz que l’en face contrepois à lui ou au detor de ce que l’en doit ; et s’il veaut l’un et l’autre trespasser, il doit estre oïz.

Et ce que l’en doit por nature vient en contrepois.

Ce que l’en doit à jorné sera pas contrepesé jusque li jor viegne. {1} Se le juige ne velt pas fere contrepois, la demande remoint sauve, ne l’en ne li pot metre encontre barre de chose juigie. Je diroi autre chose se il ne velt fere contrepois, ausi comme s’il n’eust point de dete, lors avroi ge contre moi barre de chose juigie.

Se nos somes .ii. compoingnons et nos somes [77vA] ausi l’un comme l’autre negligenz en noz aferes, l’en doit dire que nos leson à estre obligié et que l’en doit garder le contrepois de la negligence. Et ausi prove l’en se l’un prent rien de la chose commune et li autre fust tant negligent que bien valut sa niceté par la proece à l’autre, l’en porra ci fere contrepois et delivrer l’un et l’autre. ¶ {1} Se aucun doit fere contrepois et rende2, il porra demander ausi comme s’il eust rendu chose que il ne devoit. ¶ {2} À totes les foiz que aucion nest de male foi, si comme de larecin et de tex malefices, se l’en plede de tel chose por avoir deniers contrepois a leu ; ausi est se l’en plede de cause de larrecin. ¶ Et cil qui est tret en plet de cause de forfet pot metre avant contrepois. ¶ {3} Et en promesse a ceste aucion leu ; et segont ce que Julien dit, en la promesse ou aucion de promesse porra l’en metre contrepois avant.

Quant l’un doit deners à l’autre sanz usure et li autre doit usure, Severus li enpereor establi que de tant comme chescun a il ne doit pas rendre l’usure.

Ausi est non pas solemant en privez aferes que en communs ; et s’il a usure ça et la, et il i a diverses3 usures, contrepois a leu de que l’un doit à l’autre.

Ce que Labeo dit n’est pas sanz reson, que se l’en fet especiaument contrepois à aucunne demande, ele ne sera pas misse contre cez autres choses.

J’é promis à baillier deners à Tebert en certain leu, cil les me demande ; je demande se l’en doit ce contrepeser de tant comme je ne vossisse que el ne fust rendue en certain leu. Je di, se Tebert demande cel argent que il promist en certain leu, il convient ce contrepeser ou sa cause, c’est à dire por combien il ne vosist que la peccune ne fust rendue, la où ele fust promisse.

Se un4 autre est heir à chevaler et un autre heir est, et le detor qui est obligié à l’un des heirs veault contrepeser ce que li autres li doit, il ne sera pas oïz. ¶ {1} Quant cil qui est condempné à Tebert plede de la chose jugie dedanz le jor que la chose fu jugie [77vB], l’en n’avra pas contrepois, car autre chose que le jor de l’obligacion n’est pas venu ; autre chose est s’il done terme de rendre por sa debonereté. ¶

Et cil qui est condempné por ce que il ne fist largece de blé quant le herbaut fu, n’est pas senblant que il done l’argent do froment, et por ce avra il contrepois.

Se curator est condempné de ce que l’en li commanda que il foist avoir en l’ost quant il i fut, ne fust pas escordé que il receust l’argent par contrepois, car il n’est pas contrepoissé.

Puis que il fut acordé entre tot5 que ce que l’en dut ça et la fust contrepoissé - Paulus -, se le procurator à celi qui estoit hors do païs est tret en plet, il ne devra pas doner caucion de fermeté ; car il n’i a point de contrepois et au commoincement li doit l’en moins demander.

Se tu doiz .x. solz et tis averseres ne veust fere contrepois, li contrepois de ceste dete est issi fet se li averseres dist en apert que il le vosist ou non.

Se le tutor demande ce qu’est deu en non de orfelins, l’en ne porra metre avant le contrepois de cel argent que li tutor doit à l’aversere en son non.

Li enpereor commanda que cil fust oïz qui voloit prover que il li devoit et que il l’en fut tret en plet.