École des chartes » ELEC » LI SEPTIESME LIVRES » VII. Do conseil au fil ou au serf [rubr.]

VII. Do conseil au fil ou au serf [rubr.]

  • Traduit du Dig., liv. 15, tit. 1 : de Peculio.

§ {15.1.1} Ordinarium.

Li prevoz cuida que ce fut ordre et bien de mestre avant les marchiez à cez qui sont en autrui poer, qui donent aucion de tot ; vient l’en à ce que l’en done aucion de chetel. ¶ {1} Ce ban est [76rA] tres bon, car aucion vient ‹ou› de chetel, ou de ce que est au preu au seignor, ou de commandemant. ¶ {2} Les paroles dou ban sont teles : ce que l’en fera o celui qui est en autrui poer. ¶ {3} Il parle de masculin non pas de feme ; et si donra l’en aucion por la feme. ¶ {4} Se l’en fet marchié o celi qui n’a .xiiii. anz ou qui est serf, l’en donra ausi aucion contre le pere ou contre le seignor dou chetel se lor chetel en est creuz. ¶ {5} La parole « do poer » doit estre prise communaument ausi ou fiz comme ou serf. {6} Ne l’en ne doit plus regarder le seignor à serf que le poer de avoir les ; ne nos ne seron pas solement tret en plet por noz sers propres ne de ceus qui sunt communs, mes encores de cex qui nos servent en bone foi, soient fiz soient autrui.

§ {15.1.2} Ponponius. Ex ea causa.

L’en done aucion de chetel solement de cele cause don li serf frutier ou usagier requierent contre celui à cui est li usages ou le fruit ; des autres choses, l’en done auction contre le seignor de la proprieté.

§ {15.1.14} Idem.

L’en commanda en testamant en present jor que li serf franc fust : l’en doit pledier en toz les heirs do chetel, ne nus d’aus ne ostera plus do chetel que ce que l’en li doit. {1} Et quant li sers est morz au vivent au seignor, et enprés li sire lesse plusors heirs dedanz l’en, ceste aucion faut, et poier de metre rien hors do chetel.

§ {15.1.24} Ulpianus. Curator.

Cil qui a la cure de forcené pot tolir et doner l’aministracion do chetel ausi au serf au forsené comme au fiz.

§ {15.1.29} Si quis. Paulus.

Se aucun commande en son testemant que le siers soit franc et lesse hers cil qui font marchié ou le serf, ‹il› poent pledier o les heirs do chetel, car chescun est tenuz do chetel qui li remaint à quiconques plede do chatel. {1} Et si li sires deffant que l’en ne face marchié o le serf, l’en avra contre lui aucion de chetel.

§ {15.1.39} Florentinus. Peculium.

Chetel est ce que aucun a par s’aparne ou que il a gaignié par son servise que l’en [76rB] li done ou se il veut que sis sers soit son propre patrimoine.

§ {15.1.44} Ulpianus. Si quis.

Se aucun fet marchié ou celi qui est en bau, il a .ii. detorz ; le fiz por tot et le pere solement do chetel.

§ {15.1.45} Paulus. Et ideoque.

Et por ce, se li peres tolist le chatel au fiz, por ce ne remoint pas que li creancier ne puissent pledier o le fiz.