VIII. Quant aucion de peccune est finee en un an [rubr.]

Le prevoz dit cex paroles : « je donroi sentence enprés la mort à celi qui a esté en autrui poer, ou enprés ce que il a esté mis hors d’autrui bau, ou que il est franchi ou mis en autrui main por le chetel. Et se l’en l’a fet por conchiemant que le chatel soit apeticiez en cel an, cil qui ot l’autre en son poer premierement doit pledier ». ¶ {1} Tant comme fiz ou serf est en poer à autrui, aucion de chetel est durable. Et enprés la mort à celi, puis que cil sera mis hors de bau ou mis en autrui main ou franchi, ceste aucion n’est que d’un an. ¶ {2} Et l’en contera bon an ; et par ce, se obligacion est fete par condicion, Julien dist que de lors conte l’an, non pas des quant l’en pot le plet monoier, tant comme la condicion dura. ¶ {3} Li prevoz fist à droit en ce cas auction treporele ; car comme chetel estoint par mort ou por ce que il est mis en autrui main, il soffist que l’obligacion fust menee dusqu’am l’an. ¶ {4} Alienacion et manumission, ceste franchise apartient à sers non pas à fiz ; mort apartient et à fiz et à sers ; et metre hors de bau apartient au fiz. Et s’il est hors de la main au pere par autre meniere que par metre hors de sa main, l’aucion sera d’un an – c’est à dire que ele ne durra que un an et outre l’an ne durra pas. Et se il est hors d’autrui poer ou par mort de pere ou par essil, li heir au pere sera tenuz dedenz l’an. {5} En « metre en autrui main » est entendu vendeor et il est tenuz de ceste aucion dedenz l’an ; {6} et s’il a doné ou cheingié le serf ou doné en doere, ausi en est. ¶ {7} Encor demande l’en se li heir à celi qui le serf lessa s’il est tenuz dou [76vA] chetel ou s’i commanda que il fust frans. Et il m’et avis que l’en ne doit pas aucion de chatel n’an celui qui fu franchi ne en celi à qui fu fet le lés. Or demande l’en, li heir est tenuz ? ¶ Et Cecilius dit que il estoit tenuz – et en est tenuz – , car le chatel est ches celui que le rendi et se delivra de celi à cui il estoit lessié. Et Pegasus dit que il le devoit et que il en devoit doner segurté à l’oir par celui à qui le lés fut lessié, car li creancier vienent à lui ; par quoi se il rent senz segurté, il sera trez en plet. ¶ {8} Se quant li sers est pris et le chatel li heir est prez de rendre l’eritage, s’il est trez en plet do chetel, il n’avra pas barre, si comme Marcellus dit. Et cil à cui l’en a rendu l’eritage ne doit pas estre receu, comme Scevala dist, comme il n’a pas le chatel ne ne fist pas por quoi il ne l’eust. ¶ {9} Et se le usage est passé, l’en avra aucion dedenz l’an contre le fruitier.