§ 1.

Chose qui est fete par prière si puet estre rapelée, issit comme vos porrez ci-emprès oïr.

L'en dit ci1 que ce que li ancessors a estrangé malement, cil qui viant emprès lui le puet rapeler, en tens que successor puet rapeler. Ce que ancessor mist mauvèsement, il n'est pas tenus en ce que si ancessors en fist.

§ 2.

Se ge otroi à aucun la moie chose par prière, l'en demende combien doit durer ce prest ? Et l'en dit tant comme ge vodroi. Et tel otroi est dépéciez, quant cil est morz qui presta o celui à qui l'en presta2.

Posé que je t'otroi ma chose par prest ; tu la mez aillors ; je la voil rapeler, puis le je fere ? L'en dit que oïl ; car il ne lest pas à autrui tenir ma chose sanz ma volenté. Posé que je te preste ma chose por ton besoing, la puis-ge demender d'avant que ton besoin fauge ? Nenil, se tu ne lessoies ton besoing à estanchier par malice, por tenir ma chose ; et lors la te porroie-ge demander.

Et se ge te preste ma chose jusque à un jor, la te puis-ge demender avant le jor por mon besoing ? Non, que male foi n'i soit entendue. Et s'il n'a que fere de la choze et ge en aie besoing, puis la ge demender ? Et l'en respont que cortoisie sera se ele est rendue por le besoing, quant cil n'en a afere, come l'en doie estre recorz des biens que li a fez.

Or demende l'en se chose est prestée et ele soit perdue, se l'en i est tenuz ? Et l'en respont que la division est tele : se la chose est prestée par si que l'en la rende, la convenance vaut. Et se la chose est prestée simplement, sanz division, li emprunterres ait mis ausi grant diligence en la chose garder, comme prodom doit fere, et la chose périsse, il n'en est pas tenuz. Et se la chose demuere à rendre enprès le terme qu'ele dut estre rendue, et ele périst, comment que ce soit, ele doit estre rendable3.

[p. 167] Et se li chevaus est menez plus grant jornée qu'il ne doit et plus tost que reson ne done, et il périst, est-il rendables ? Oïl ; car il apert plus que la chose soit desavancie par l'otrage que non.

§ 3.

Emprès l'en dit que quant l'en preste la chose à certain usage, que l'en ne la puet redemender ainz que la chose soit fete, por quoi l'en i mete diligence de prodome ; car l'en ne doit pas estre déceuz de bienfet, einz en doit l'en estre aidiez4.

Et se aucuns dit que la chose est prestée à certain usage, et li prestierres li nit ; ou s'il dit que l'en a presté simplement, et li presterres li nist : en tel chose n'a pas bataille, mès prove ; et li chois de la prove est au presteor.

Se li emprunterres nia la chose qui li a esté prestée, qu'ele ne li fu onques prestée, en tel chose a bataille, et se la chose est tele que bataille en doie nestre ; car se li presterres dit qu'il est prest de prover par soi et par garanz, qu'il li presta la chose, et die quele, et li autre die encontre qu'il fet tel ni et tel deffense comme il doit : droiz dit qui sera loisanz de prendre la prove de celui et de son garant, et de quenoistre que c'est voir, ou d'escondire par gage de bataille vers un des garanz.

Et en autre forme doit l'en dire de celui qui quenoist qu'il a emprunté, et dit qui li a rendu, et l'offre à prover par soi et par garanz.