§ 1.

Obligement de mendement est fez par consentement de corage de cez qui font marchié ensemble ; et tex mendement puet estre receuz par mesage ou par letres ; et encor se ge vos pri, ou se ge voill, ou se ge mende, l'en a auction de mendement contre moi. Mandement puet estre porloignez jusqu'à jor, et puet estre fez par condicion1.

§ 2.

Mandement, s'il n'et à gré de l'un et de l'autre, ne vaut riens. Mandement si est commoincement de servir et amitié, et s'en en prent loer, ce regarde plus loage que amitié. Mandement si viant entre nos, si comme ge te mande que tu faces aucune chose por l'amor de moi ou d'autrui, ou por autrui amor ou por la moie, ou por autrui [p. 163] solement ; ou se ge te mende por amor de te (toi) solement, le mandemenz est nus. Mandemanz viant avant por l'amor de moi, ausint com se ge te mandasse que tu feisses mes aferes, ou que tu m'achetasses une teneure, ou que tu me plévisses2.

§ 3.

Mandement d'autrui amor viant avant, ausint com se ge te mandasse que tu feisses les aferes Gaubert, que tu li achètes une teneure, ou que tu li plévisses. Por autrui amor et por la moie est ausint fet mandement, ausint comme se je te mande que tu faces mes aferes et les Gobert, ou que tu plévisses por moi ou por Gaubert, ou que tu achates une teneure por moi. Por la toe amor, ausint com se ge te mandoie que tu feisses créance à celui qui me prestoit sor ma chose3.

Mandemenz por autre (toi) et por autrui est ausint com se ge te mande que tu feisses créance à Gaubert par autrui amor, et par tel chose vient mandemant avant.

Por l'amor est mandemant, ausint com se ge te mende que tu changasses ta teneure à un autre, ou que tu feisses ta meson abattre ; et tex parole est plus conseil que mandement ; et por ce n'est-il pas obligiez de consoil, tot n'ait-il mestier à celui cui l'en done ; car chascun doit panser en son corage que conseil li est bons ou mauvès4.

§ 4.

Nus ne doit fere commendement, fors purement le mandement : car s'il fet plus que l'en ne li mende, s'il fet moins, il fet moins que l'en ne li mende. Mès la cause de celui qui mende puet estre fete meillor, ausi com se ge te mandasse que tu achatasses un cheval vingt sols et tu l'eusses por quinze sols.

§ 5.

Mandement de lède chose est nul5.

Un home dit que Gaubert me manda que je li achetasse un cheval cent sols, ge li achate ; je requiers les deniers qu'il les me rande et praigne le cheval. Gaubert nie qu'il ne se panssa onques ; cil l'offre à prover par soi et par garanz, qui vit le commendement fere à celui qui aporta le mendement, et oï le mandement ; et li copables fet encontre tel ni et tel deffanse comme il doit. L'en respont que li copables est loissanz de prendre la prove de celui qui demende et de son garant, [p. 164] ou d'escondire par la soe. Mès s'il eust chetel en sa chose qu'il manda, et l'en l'eust dit en la demende, et offert à prover, il i eust gage.