École des chartes » ELEC » LI SEPTIESME LIVRES » VI. Do consoil do senator macedonien [rubr.], qui parole ainz que li peres ait obligé le fet au fiz.

VI. Do consoil do senator macedonien [rubr.], qui parole ainz que li peres ait obligé le fet au fiz.

  • Traduit du Dig., liv. 14, tit. 6 : de Senatusconsulto macedoniano.

§ {14.6.1} Ulpianus. Verba.

Les paroles do senator Macedoniain sont teles : « come Macedo eust pris autrui avoir entre cez autres felonies, que nature l’aministre, et comme il donast à mauvés homes matiere de pechier, cil qui devoit l’argent que l’en doit plus, et cuidoit que ce fust bien fet que l’en ne donast aucion ne demande au fiz enprés la mort au pere, li quel fiz avoit l’argent enprunté, et cil usurer fesoient ce que li fiz n’eussent nul non en atandre la mort lor pere »1. ¶ {1} Se le fiz est en branle ou il n’est pas o soi, si comme il avient que le pere est en guerre, l’en dote se le senator s’en doit entremetre ; car se il rechiet en poer au pere, ceste aucion a leu ; si non, ele n’a pas leu, et entretant ne doit l’en avoir contre le fiz point de auccion. ¶ {2} Et se cil qui est avoez enprunte, et il est restabbi et nus hors de bau, ceste aucion avra leu car il fut ou bau. ¶ {3} Dignité ne fet rien en fiz qui est ou bau que ceste aucion n’oit leu ; car s’il est conte ou il a autre dignité, se il a chetel por soi, lors n’a point de leu ceste aucion.

§ {14.6.3} Idem. Si quis.

Se aucun cuide que cil fust sires, et le cuida certainement, et por ce que aucun le cuidoient, car en tel non fesoit il quanque il fesoit et marchiez et autres choses, ceste aucion n’avra point de leu contre lui ; {1} et [75vA] ausi dit Julien de celui qui avoit paage aloé, que establi fut que ceste ‹aucion› n’avoit point de leu contre lui. ¶ {2} Et ausi en celui qui ne pot pas savoir se cil estoit en bau, Paulus dit que ceste aucion cesse, comme en orfelin, comme en menor de .xx. anz. Et a ice dit le prevost : que l’en doit secorre quant il i a cause por quoi ; et ausi a orfelin, par autre reson cesse ceste auction, por ce que le prest est nul que li orfelin a fet sanz l’autorité au tutor. Paulus. Se fiz qui est en bau croit, ceste auction n’a leu por ce que la creance est nule, tot soit il sires de son chatel ; car li peres ne li ostroie mie à perdre son chetel quant il li ostroie que il euse ; et por ce puet li piere demander l’argent. ¶ {3} Celi solement mostre ceste auction : qui presta l’argent à celi qui estoit en bau et ne fist pas autre marchié, si comme loer, si comme vendre, ou qui fist marchié en autre maniere, car li pere virent que li marchiez estoit mauvés. Et por ce, se je fis creance au fiz qui estoit en bau ou d’achat ou de autre marchié où il ne conta pas l’argent, et je le fis promesse, tantot commeince il à fere lor tort, par ce que l’a‹r›gent ne fut pa conté ceste aucion cesse. Et ce doit estre issi entendu : s’il n’i a boidie que cil qui ne pot croire ne pot vendre, que cil eust le pris en maniere de prest. ¶ {4} Se je enprunte do fiz qui est en bau, et quant il ert pere je li faz creance, ou s’il est en mauvés estat, ou se si peres est morz, ou s’il est sires de les choses, ceste aucion doit cesser, car il a receu l’argent comme pere et comme seignor.

§ {14.6.4} Scevola. Quia.

Et ce que l’en dit communaument que l’en ne pot fere creance à fiz qui est en bau ne doit pas estre entendu à paroles mes au numbre de la peccune.

§ {14.6.5} Paulus. Ergo.

Et donc sera cil do tot ‹condamné›, non pas de tant comme il pot fere.

§ {14.6.6} Scevola. Contra.

Et encor dira l’en droitement encontre : « se tu enpruntes do pere et enprés fez creance au fiz [75vB], ceste aucion avra leu, car la sustence de l’obligacion est esconplie ».

§ {14.6.7} Ulpianus. Idem.

Se fiz qui est en bau plevist, Neracius dit que ceste aucion n’a point de leu.

§ {14.6.14} Julianus. Filium.

J’é un fiz et de lui un neveu ; l’en fest creance à mon neveu par le commandemant son pere ; l’en demanda se l’en fist ce contre ceste aucion. Je di, se li fiz furent non aagé et au bau dou pere, hou il et contre les paroles au senator, ¶ ausi devra l’en dire dou neveu comme dou fiz ; et que le commandemant au pere nuise – ou ne nuise – que la creance fust esmee contre ceste aucion, comme ceste cause fust de li meismes comme cil qui ne pot enprunter contre la volenté son pere.

§ {14.6.15} Marcellus. Nichil.

Ne monte rien qui fet creance à fiz qui est en bau, ou privé, ou commun, si comme une cité; car Severus et Antoninus distrent que ceste aucion a leu en cité se l’en fet prest à fiz qui est en bau.

§ {14.6.16} Paulus. Si filius.

Se li fiz, quant li peres n’est pas au païs, ausi comme por son commandemant enprunte et en fist letres et les envoia à son pere que il rendist cele pecune, li peres, se ne li plest, doit demanoies mander que li enprent est fez contre sa volenté.

§ {14.6.17} Idem. Filius.

Se li fiz enprunte deniers por doner les à sa seror en doere, li peres est tenuz de cele peccune s’ele est mise en son preu ; car se la fille muert2 en mariage, il pot demander le doere.

§ {14.6.20} Idem. Si is.

Se cil deviant pere à cui tant comme il estoi en poer furent li denier baillié, et il qui n’estoit pas sage balla un rendeor por soi, se l’en li demande cel argent, il avra por soi barre de fet.


1 Come Macedo… pere : passage qui pose problème
2 muert] avet dans le ms., cf. lat. ipsi enim mortua in matrimonio puella repetitio dotis datur