§ {14.3.3} Ulpianus. Institor.

Il est apelé « institor » li marcheanz por ce que il est curios de sa besoigne fere ; ne il ne fet pas moult se il est metre de taverne ou d’autre marchandie.

§ {14.3.4} Paulus. Cum interdum.

Car il enporte aucunne foiz marchandies à prodes homes et la lor vendoit ; ne le leu où vient ou l’en eschate ne mue pas la cause de l’au[74rA]cion, comme avient en l’une meniere et en l’autre que li marcheanz vent et achete.

§ {14.3.5} Ulpianus. Quocque.

Donques, quiconques est mis à fere la besoigne est apelé institor à droit, et c’est à dire marcheant ; {1} car Servius et Labeo distrent à Brutus : se aucuns fet marchié o charpenter, ou o celi que aucun mist et fist sire de la meson ou l’establi à achetier froment, cil est tenuz de tot. ¶ {2} Labeo dit : se aucun a mis aucun à prester à usure ou à terre coitiver ou à marchandise mener, il est tenuz de tot. {3} Et se aucun a mis aucun serf metre à sa table, il sera tenuz de celi serf. ¶ {4} Et nos apelons cez « institors », qui portent teles et autres choses à vendre. ¶ {5} Et itex puet l’en apeler proprement chacerranz. ¶ {6} Et cil qui sont mestres des folons, de sartriniers, et qui sont herbergeor sont institors. ¶ {7} Et se aucun taverner envoie son serf en leu estrange à acheter marcheandie et que il la li envoiat, Labeo dit que il est en leu de marcheant. ¶ {9} Ausi dist il : se aucun talemeler a à costume envoier son serf en aucun leu certain à vendre son pain, enprés cil reçut l’argent dou pain, il fausa sa foi, l’en ne doit pas doter que s’il li otroia issi à doner la marchandie il est tenuz, et non pas li sers. ¶ {10} Et se li felon qui aloit hors dou païs pria son serf que il fust mestres sor ses menesteres à qui il avoit lessé sa taverne à garder, et quant ce felon s’en fust alez cil sers prist le dras et s’enfoit, li felon n’est pas tenuz se cil fust lessié comme procurators ; et s’il fust lessié comme marcheant, il est tenuz ; et s’il le establi à estre mestre sor les ovriers, il ne sera pas tenuz de ceste aucion mes do loage. ¶ {11} Et tot ce a l’en fest o le marcheant n’oblige pas celi qui li mist ; et si li marchiez fut fez o li par celui marchié, et par cele cause dont il est mis à la mestrie, {12} et s’il le mist à vendre marchandie, il sera tenuz de aucion d’achat ; et se je l’e mis à achetier, je serai tenuz de la vente. ¶ Et se je ne l’ai pas mis à achetier et il vent, ne à vendre [74rB] et il achate, il en sera tenuz ; et Casius à ce s’acorde. ¶ {13} Et se aucun tret peccune au marcheant à achetier marcheandies, le creancier avra leu à ceste aucion ; et ausint est s’il establist à estre mestre de la taverne ; c’est verité se l’en ne li deffendi que il n’empruntat. {14} Se l’en a presté oile à celui que li mestre establi à achetier ou à vendre oile, ceste aucion avra leu. ¶ {15} Et se le marcheanz quant il ot l’oille vendue prist un agnel en erres et il ne le reçut mie por gage, li sires n’est pas tenuz de ceste aucion s’il le vandi ; car il ne fet pas ce que l’en li comanda se l’en ne li manda par avainture que il le vendist. Et por ce, se li marcheanz prist gage por le pris et il le vandi, ceste aucion avra leu. ¶ {16} Ausi avra li plege qui plevist por le marcheant ; il est tenuz de la plevine. ¶ {17} Se un autre establist le marcheant, et cil se muert, qui li mist, et s’il a hers qui aent l’usage de ce marcheant, sanz dote il convient que l’en soit tenu. Et se l’en fist marchié avant que il eussent demandé l’eritage, bien est que cil qui rien n’en savoient aient aucion de marchendie. ¶ {18} Et se mis procurator, mis tutor, mis curator establist un marcheant, l’an dorra contre moi aucion, ausi comme se je li eusse mis.

§ {14.3.6} Paulus. Sed et.

Et contre le procurator sera donee ceste aucion se il est generaus.

§ {14.3.7} Ulpianus. Sed et si quis.

Et se aucun qui fest ma besoigne establist aucun à estre mestre et je l’oi establie, ausi en dira l’en comme de l’autre devant. ¶ {1} N’en a point de differance quex soit li marcheanz ou male ou femele, franc ou serf propre ou autrui, ne quil est cil qui l’establi. Car se feme l’establi, ceste aucion li avient à le guise de aucion des choses mises en nés ; ceste aucion est contre li se ele forfet. ¶ {2} Et se orfelin qui est fet marcheant et fet chose que il ne doet, il oblige celi qui li met de ceste aucion, car bien se gart cil qui li mist.

§ {14.3.8} Gaius. Nam.

Car aucunne foiz [74vA] aviant que aucun metent effanz et puceles garder taverne.

§ {14.3.9} Ulpianus. Verum.

Et se li orfelin les i mest, se c’est por l’autorité au tutot, il sera obligié ; si que non, non.

§ {14.3.14} Paulus. Idem.

Ausi sera se autrui serf est aloé et mis à commune marcheandie, l’en doit doner contre l’un et l’autre aucion de tot ; et ce que l’un rendra, li autre le li rendrunt por juigement de compoignie. Et la où action de compoignie ou de departir communauté cesse, chascun doit estre condempné por sa partie ; ausi comme se ceus, à qui serf l’en fist creance, estrabli .ii. heirs et franchi celi serf. Et heir doivent estre trest en plet por la partie, car auction de communauté cesse antre aus.

§ {14.3.15} Ulpianus. Novissime.

L’en doit savoir au derrenier que cez aucions doivent estre donees à toz jorz contre l’eir et contre les hoirs. ¶

§ {14.3.19}

{3} Serf establi à prester à usure, s’il enprunte, il n’oblige pas son seignor de tot comme s’il fust marcheant ; et s’il a promis à une autre à rendre de tele marcerie, l’en le porra demander au seignor.

§ 1.

Geffroi de la Chapele dit : Nus n'est qui ne sache bien qu'ant cest ban a mout de preu. Car com nos ne savon mie aucune foiz qués est, ne à qués nos fesons marchiez, por estre porté nos et noz choses en la nef, droiz est que cil qu'i met le metre i soit tenuz. Por ce est bien avenant que l'en face marchié o le metre de la nef, ou à celui à cui ele est baillie à marcheander. Ausi dison-nos de celui qui moine marcheandise par terre. Cil qui moine marcheandise par terre ou par eve n'est pas tenuz des aventures que l'en ne puet eschiver, se la colpe ne passe le quas, comme il set plus por la cope au seignor de la nef que por autre chose. Aventure si est tormente, roberie, feu, pecéement de nef, et plusors autres choses.

§ 2.

Emprès demende l'en se li sires de la nef nie que il n'oit mie receu la marchandie, comment l'en porra l'en atendre. Et l'en respont par tex paroles : Ge me plein de Gui, metre de cele nef, à qui j'é baillié mon avoir, une charge de poivre, et la me dut amener à Orliens, en ceste vile, ne je ne ai puis avoier ; et s'il veaut dire que il n'ait ma chose eue, et en ceste forme, je le sui prez de mostrer et de l'avérer, et par moi et par garanz, que si est ceste chose, si com ge le di. Il vet avant à la jostice, lui et son garant, et offre ce à mostrer ; et li mestre de la nef fet encontre tel ni et tel deffense comme il doit. L'en demende qu'en dit droiz. Et l'en respont que l'en doit demender la personne de celui qui demende et de son garant, et s'il est preudom et honeste, l'en le doit oïr, issint que li deffenderres est loissanz de prandre la prove de li et de son garant, et de quenoistre que c'est voirs, ou d'escondire par gage de bataille ; car en tel chose doit bien avoir bataille : car il i a traïson et mambre de larrecin. Tot outresint pot l'en apeler de marcheandise à mener par terre.

§ 3.

[p. 162] Et se l'en savet généraument, si come d'èse et de vins et de grosses choses que chascun vet, ci n'a point de gage qu'anqueste.